අවුරුදු මිලියන ගණනක් පැරණි ෆොසිලයකින් මතු වන මදුරුවකුගේ කුස තුළ රැඳි රුධිර බිඳුවකින් ලබා ගන්නා ජාන වර්ධනය කර ඩයිනෝසරයන් යළි මිහිමත ඇති කිරීමේ අපූර්වතම කතාව සිනමාවට ගෙන එමින් ස්ටීවන් ස්පිල්බර්ග් ලෝකයම එමගින් රසාලිප්ත කිරීමට සමත් වූයේය. එහෙත් සැබවින්ම සත්‍ය ප්‍රබන්ධයට වඩා සුන්දරය. අනික් අතට ප්‍රබන්ධය කවර හෝ මොහොතක සත්‍ය බව දැන ගැනීමටද ලැබිය හැකිය. එවන් වූ පුවතක් පසුගියදා සයිබීරියාවෙන් වාර්තා විය.
ඊශාන දිග සයිබීරියාවේ කැණීම් කටයුතුවල නිරත වෙමින් සිටි විද්‍යාඥයන් පිරිසකට පතුලේ අයිස් ස්ථරයක සිරවී තිබුණු කුරුළු සිරුරක් හමුවිය. බැලූ බැල්මට එය පැය කිහිපයකට පෙර මිය ගිය කුරුල්ලකුගේ සිරුරක් මෙන් විය. එහෙත් එතරම් ආසන්නයේ මිය ගිය කුරුල්ලකු අයිස් ස්ථරයක අභ්‍යන්තරයේ සිරව සිටින්නේ කෙසේද? එම පැණය ඔස්සේ යමින් මේ කුරුලු සිරුර පර්යේෂණාගාරය වෙත යැවීමට විද්‍යාඥයෝ කටයුතු කළහ. පර්යේෂණාගාරයේදී කුරුලු සිරුර විච්ඡේදනය කළ විද්‍යාඥයෝ පුදුමයට පත් වූයේ මේ කුරුල්ලා මිය ගොස් ඇත්තේ පැය කිහිපයකට පෙර නොව අදින් වසර 46000කට පෙර බව තහවුරු කර ගැනීමෙනි.
අදින් වසර 46000ක් යනු මේ මහ පොළොව මත දිගු මවිල්වලින් පිරුණු සිරුරින් යුක්ත වූ මැමත් ඇතුන් රජ කළ යුගයයි. මේ කරුල්ලා ජීවත් සිට ඇත්තේ මැමත්වරුන් අතරය. එමෙන්ම මේ කරුල්ලා හෝර්න් ලාක් වර්ගයට අයත් බවද විද්‍යාඥයන් තහවුරු කර තිබේ.
එම යුගය පෘථිවියේ අවසන් අයිස් යුගය ලෙස සැලකේ. එම යුගයේදී දැන් සයිබීරියාව පවතින ප්‍රදේශයේ තුන්ද්‍රා වර්ගයේ දේශගුණයක් පැවති බවට ද සැක මතුවී තිබේ.
2018 වසරේදීද සයිබීරියාවේ බෙලියා ගෝරා ප්‍රදේශයේ කැණීම්වලදී මෙවැනිම ඉපැරණි කරුලු සිරුරක් හමුවී තිබේ. එම සිරුර සම්බන්ධව පර්යේෂණ සිදුකළ ස්ටොක්හෝම් විශ්වවිද්‍යාලයට සහ ස්වභාවික විද්‍යාව පිළිබඳ ස්වීඩන කෞතුකාගාරයට මේ පසුගියදා සොයා ගත් කුරුලු සිරුරද පර්යේෂණ සඳහා බාර දීමට කටයුතු යොදා තිබේ.
ඇතැම් විට වැඩිදුර පර්යේෂණ සාර්ථක වීමෙන් යළි මේ මිහිතලය මත මැමත් සතුන් බිහි කිරීමට විද්‍යාඥයන්ට හැකි වුව හොත් එය මයිකල් ක්‍රිච්ටන්ගේ ජුරාසික් පාර්ක් ප්‍රබන්ධය යථාවක් වනු ඇත.
