ඔවුහු මුළු මනුෂ්‍ය සංහතිය අතරින් හුදකලා කර ඇත්තේය. ඔවුන් හා ගැවසීමට ඔවුන්ම හැර අන් කිසිවකුත් නැත. ඔවුන්ගේ දුකට ඔවුන්ම පමණක්මය. එහෙත් ඔවුන් සවිමත්ය. දැනට දින දහයකට ආසන්න කාලයක් ඔවුන් වෙසෙන්නේ ලෝකයෙන් හුදකලාවය. එහෙත් ඔවුහු සාමූහිකව ගී ගයමින් තම ආත්ම ශක්තිය වඩවා ගනිමින් සිටිති. චීන බසින් ‘ වූහන්.. අපිට පුළුවන්.. අපි ජයගනිමු‘ යනුවෙන් ඔවුන් එකාමෙන් නිවෙස් තුළට වී හඬ නගන සංවේදී දර්ශන මේ දිනවල සමාජ ජාලවල දිස්වන්නේ නෙතට කඳුලක් එක් කරමිනි.
මේ වන විට වැළැක්වීමට කොතෙක් උත්සාහ දැරුවද නව කොරෝනා වයිරසය ලෝකය පුරා පැතිරී අවසන්ය. විශේෂයෙන්ම ආසියාවේ රටවල් කිහිපයකින්ම නව කොරෝනා වයිරසය ආසාදිත වූ රෝගීන් හමුවී තිබේ.
දැනට චීනය ඉතා විශාල වෙහෙසක් දරමින් නව කොරෝනා වයිරසයට ප්‍රතිකර්ම සොයමින් සිටින්නේය. කොරෝනා වයිරස යනුවෙන් හඳුන්වන්නේ සතුන්ගෙන් මිනිසුන්ට බෝ වන්නා වූ රෝග කාරක වයිරසයන්ය. මීට පෙර 2003 වසරේදී සහ 2012 වසරේදී කොරෝනා වයිරස දෙකක් චීනයෙන් ඇරඹී ලොව පුරා පැතිර ගිය අතර ඒ වයිරස දෙක පසුව සාර්ස් සහ මාර්ස් යනුවෙන් නම් කරන ලදී. දැන් මේ නව කොරෝනා වයිරසය සමග සටන් කිරීම මුළු මහත් මිනිස් වර්ගයාගේ එකම අරමුණ වී තිබේ. එහි අභියෝගය චීන ජාතිකයන්ට පමණක් නොවේ. මුළු මහත් මිනිස් වර්ගයාටමය.
දැනට ලොව පුරා විද්‍යාඥයන්ගේ අදහස වන්නේ කොරෝනා වෛරසය ඉදිරි දින 7 ත් 10 ත් අතර උපරිම තලයට පත් වී ඉන්පසු ක්‍රම ක්‍රමයෙන් වර්ධන වේගය අඩුවී අවසන් වනු ඇතැයි යනුවෙනි. එහෙත් ඔවුන් තවදුරටත් පවසන්නේ කොරෝනා වෛරසය උපරිම තලයට පත්වන දින වකවානු සම්බන්ධව ස්ථිර නිගමනයක් පැවසිය නොහැකි බවයි. දැනට හුදකලා කර තිබෙන නගර එසේ කිරීමෙන් දින 14කට පමණ පසු කොරෝනා වෛරසයේ උපරිම තලය ඇතිවිය හැකි බවත්, ඉන්පසු හුදකලා කර තිබෙන නගරවලින් රෝගීන් මෙන්ම මරණ සංඛ්‍යාවද උපරිම ලෙස වාර්තා විය හැකි බවත් විද්‍යාඥයන්ගේ අදහස වී තිබේ. එහිදී අවශ්‍ය රෝගීන් රෝහල් ගත කර අවශ්‍ය ප්‍රතිකාර ලබා දීමටත් එසේම එම දින 14 අවසන් වන විට වූහාන් නගරයේ සිටින, එහෙත් වයිරසයට ගොදුරු නොවූ ජනතාව නිරෝගී පිරිස් ලෙස සලකා නැවත සාමන්‍ය ජීවිතය පවත්වා ගෙන යාමටත් ඉඩ ලබාදෙනු ඇතැයි පැවසේ.
සැබවින්ම චීනය මේ තත්ත්වයට අති සාර්ථකව මුහුණ දෙමින් සිටින බව පැවසිය යුතුය. මේ සා විශාල වයිරසයක් පැතිරී ගියද ඔවුන් කණගාටුවෙන් හෝ බලාපොරොත්තු බිඳ වැටුණු ස්වභාවයෙන් පසුවනු කිසිසේත් දැක ගන්නට නැත. ඒ වෙනුවට ඔවුන් ඉතා දැඩි ලෙස අපේක්ෂාසහගතව උත්සාහ කරමින් සිටිති.
රෝගය තදින් පැතිරී ගිය ප්‍රදේශවල රෝහල්වල ඇති රෝගීන්ගේ තදබදය කල්තබාම අවබෝධ කරගත් චීනය අතරමග වැඩ නතරකර තිබු, එනම් මැයි මස විවෘත කිරීමට සැලසුම් යොදා තිබු වූහන් හි ගොඩනැගිල්ලක් දින 2 ක් ඇතුලත ජල නල කාර්මිකයින්, විදුලි කාර්මිකයින් ඇතුළුව ඉදි කිරීම් සේවකයින් දහසක් සහ හමුදාව යොදවා එහි අවසන් අදියරේ වැඩ කටුයතු දින දෙකකින් අවසන් කර පසුගිය බදාද දින රෝහලක් බවට පත් කර වෙද්‍යවරුන්ට බාර දීමට සමත් විය. එහි රෝගීන් දහසකට නේවාසික ප්‍රතිකාර ලැබිය හැකිය.
ඉදිරියේ තත්වය තවත් උග්‍ර විය හැකි බැවින් ඔවුන් තවත් ඇදන් 1000 රෝහලක් දින 10 න් නිමවා පෙබරවාරි 03 දින රෝගීන් ඇතුලත් කර ගැනීමටත්, එසේම තවත් ඇදන් 1300 තවත් රෝහලක් පෙබරවාරි 05 දින ඉදිකිරීම් අවසන් කර රෝගීන් ඇතුලත් කර ගැනීමටත් දින වකවානු යොදා ගෙන ඇත.
චීනයෙන් ලැබෙන මාධ්‍ය වාර්තා අනුව පෙබරවාරි මුල් සතියේ කොරෝනා වයිරසය එහි උපරිමයට පැමිණීමට ඉඩ තිබේ. එහෙත් දැනට බොහෝ පිරිස් බලාපොරොත්තු වන්නේ ඉදිරි සතියක් හො තවත් දින 10ක් තුල රෝගීන් හා මරණ උපරිම වී ඉන්පසු පැතිරීමේ වේගය ක්‍රම ක්‍රමයෙන් අඩුවෙමින් යා හැකි බවයි. එහෙත් තවදුරටත් වයිරසය තවත් යම් කාලයක් පවතිනු ඇතැයි විශ්වාස කෙරේ.
ලෝක සෞඛ්‍ය සංවිධානයේ ප්‍රධානි ටිඩොරොස් ඇඩ්නොම් ගෙබ්රියසස් හා ප්‍රධාන විධායක නිලධාරීවරයා චීනයේ සිදුකල සංචාරයෙන් පසුව පවසා සිටියේ වයිරසය පාලනය කිරීමට චීනය ගන්නා ක්‍රියාමාර්ග ගැන තමන් ඉතාමත් ප්‍රසාදයට පත් වූ බවයි.
පසුව ඔවුන් මුළුමහත් ලෝකයටම මහජන සෞඛ්‍ය හදිසි අවස්ථාවක් ද ප්‍රකාශයට පත්කර තිබේ. ඔවුන් සෙසු රටවලින් ඉල්ලා සිටින්නේ මේ අර්බුදයේ භයානක බවත් වටහා ගෙන තම රටවල් තුළ එය පැතිර යෑම පාලනය කිරීමට දැඩි ක්‍රියා මාර්ග ගන්නා ලෙසයි. ලැබී ඇති නවතම වාර්තා අනුව මේ වනවිට කොරෝනා වෛරසයෙන් මේ වන විට මරණ 213 වාර්තා වී ඇත. එසේම දැනට චීනයෙන් සොයා ගෙන ඇති රෝගීන් සංඛ්‍යාව 10000 දක්වා වැඩි වී තිබේ. එසේම දැනට රෝගීන් 2000කට ආසන්න සංඛ්‍යාවක් අසාධ්‍ය තත්වයේ පසු කන බවට වාර්තා වේ.
දැනට රෝගය ඇතැයි සැක සහිත තත්වයේ පසුවෙන පුද්ගලයින් 13167 පමණ චීනයේ රෝහල්වල ප්‍රතිකාර ලබමින් සිටිති. එසේම මේ කොරෝන වයිරසය අසාධනය වූ රෝගීන්ගේ ඥාතීන් වන 82 000ක පමණ පිරිසක් රෝහල්වල නිරීක්ෂණ මට්ටමේ තබා තිබේ. ඒ අතරින් 3000ක පමණ පිරිසක් නිරෝගී වශයෙන් සලකා වෛද්‍ය නිරීක්ෂණයන්ගෙන් නිදහස් කර ඇතැයි චීන වාර්තාවල සඳහන් වේ.
මේ වන විට ප්‍රතිකාර ලැබීමෙන් පසුව සම්පූර්ණයෙන් සුවය ලබා රෝහල්වලින් පිටව ගොස් ඇති සංඛ්‍යාව 124කි.
එසේම ප්‍රංසයෙන් 5 වන රෝගියා ද පසුගිය සතියේ වාර්තා විය. එක්සත් අරාබි එමීර් රාජ්‍යයෙන් එකම පවුලේ චීන ජාතිකයින් 4 දෙනෙකුටත්, එසේම සිංගප්පුරුවේ දෙදෙනෙක්ද වශයෙන් දැනට රටවල් 20ක් කොරෝනා වයිරසයට ගොදුරු වී ඇත.
කොරෝනා වෛරසයට ප්‍රතිකාරයක් සොයමින් චීනය, ඕස්ට්‍ර්ලියාව, ඇමරිකාව, හොං කොං ඇතුලුව ලොව රටවල් රැසක පරීක්ෂණ පැවැත්වෙමින් තිබේ. විදෙස් ආරංචි මාර්ග අනුව එවැනි ඖෂධයක් සොයා ගත්තද එය එක්වරම රෝගීන්ට ලබා දීමක් සිදු කල නොහැකි අතර එය ලෝක සෞඛ්‍ය සංවිධානයේ කමිටු හරහා අනුමත වී පිළිගත් බෙහෙතක් ලෙස හෝ එන්නතක් ලෙස ලබා දීමට කළ යුතු වේ. මේ සඳහා සැලකිය යුතු කාලයක් ගත වන බවද ප්‍රකාශිතය.
පසුගිය සතියේ ගුවන් සේවා සමාගම් හතකට වැඩි ගණනක් සේවකයින්ගේ ආරක්ෂාව හා මගීන් නොමති වීම හේතූන් ලෙස දක්වමින් චීනය දක්වා තමන්ගේ ගුවන් ගමන් නවතා ඇත.
පසුගියදා වුහන් නගරයෙන් ඉවත් කරගත් ජපාන ජාතිකයන් 206 දෙනාගෙන් සිසුන්ගෙන් තිදෙනෙකුට කොරෝනා වයිරසය වැළදී ඇති බවත් තවත් 13 දෙනෙකු උණ හා කැස්ස තත්වයෙන් රෝහල් ගත කර ඇති බවත් ජපන් සෞඛ්‍ය බලධාරීන් ප්‍රකාශ කර තිබේ. කෙසේ වුවද වූහන් නගරයෙන් තම පුරවැසියන් ඉවත් කර ගැනීමට සමත් වූ රටවල් සියල්ලම ඔවුන් ඉතා විධිමත්ම රඳවා ඇති බැවින් ඔවුන් සාමාන්‍ය පුරවැසියන් සමග ගැවසී බරපතල තත්ත්වයන්ට මුහුණ දීමට සිදු නොවනු ඇතැයි අපේක්ෂා කෙරේ.
කෙසේ වුවද වූහන් තවමත් හුදකලාය. එහෙත් මනුෂ්‍ය වර්ගයා වයිරසය සමග සටනින් ඉක්මනින්ම ජයග්‍රහණය කරණු නිසැකය.
