මේ දිනවල අමෙරිකාවේ පාර්ලිමේන්තුවේ එරට ජනාධිපති ඩොනල්ඩ් ට්‍රම්ප්ට එරෙහිව ඉදිරිපත් වී ඇති දෝෂාභියෝගය විභාග වෙමින් තිබේ. අමෙරිකානු පාර්ලිමේන්තුවෙ ස්තර දෙකකින් සමන්විත වන අතර ඒ නියෝජිත මන්ත්‍රී මණ්ඩලය සහ සෙනෙට් මණ්ඩලයයි. ට්‍රම්ප් ජනාධිපතිවරයාට ධූරය හැර යෑමට නම් දෝෂාභියෝගය ඉහත කී මණ්ඩල දෙකේම සාමාජිකයන් ගෙන් සම්මත විය යුතුය. නියෝජිත මන්ත්‍රී මණ්ඩලය තුළ ට්‍රම්ප් ජනාධිපතිවරයාගේ විරුද්ධ පාක්ෂිකයන්ට හෙවත් ඩිමොක්‍රටික්වරුන්ට වැඩි බලතල හිමිවුවද සෙනෙට් මණ්ඩලයේ වැඩි බලතල රිපබ්ලිකන්වරුන් සතු වන්නේය. එබැවින් දෝෂාභියෝගය සම්මත නොවීමෙන් ජනාධිපතිවරයා ආරක්ෂා වීමට වැඩි ඉඩකඩක් පවතී.
මේ දිනවල අමෙරිකාවේ සියලු මාධ්‍ය මේ දෝෂාභියෝගයේ විභාගය සම්බන්ධව පූර්ණ අවධානය යොමු කර ඇති අතර ශ්‍රී ලංකාවේ අපට වඩා ආසන්න වන්නේ මේ දෝෂාභියෝගය ඉදිරිපත් වීමටද හඬපට සිදුවීමක් මූලික වීමෙනි. මේ දිනවල ශ්‍රී ලංකාවේ ඇතැම් දෙනා හඬපට ආන්දෝලනයක් කෙරෙහි අවධානය යොමු කර සිටින නමුදු අමෙරිකාවේ ජනාධිපතිවරයාට දෝෂාභියෝගයක මුහුණ දීමට හේතු වූයේද හඬපට සාක්ෂි ලෙස ඉදිරිපත් කළ සිදුවීමක් බව නොදන්නවාට සැක නැත.
අමෙරිකානු ජනාධිපති ඩොනල්ඩ් ට්‍රම්ප්ගේ හඬපටවලට අදාළ සිදුවීම සිදුවන්නේ 2019 වසරේ ජූලි මස 25වැනි දිනයේදී ය. එදින ජනාධිපති ට්‍රම්ප් යුක්රේනයේ අලුතින් තේරී පත්වුණු ජනාධීපති ව්ලොඩිමියර් සොලෙන්ස්කිට දුරකථනයෙන් අමතන්නේය. එසේ අමතමින් ඔහු පවසන්නේ අමෙරිකාවේ ඩිමොක්‍රටික් පක්ෂයේ දැනට ඉදිරියෙන්ම සිටින, 2020 ජනාධිපති අපේක්ෂකයා වීමට වැඩි ඉඩක් පවතින හිටපු ජනාධිපති ඔබාමාගේ උප ජනාධිපතිධූරය හෙබවූ ජෝ බයිඩන්ගේ පුත්‍රයා හා සම්බන්ධ කතාවකි. ට්‍රම්ප් ජනාධිපතිවරයා එහිදී යුක්රේන ජනාධිපතිවරයාට පවසන්නේ ජෝ බයිඩන්ගේ පුතු හන්ටර් බයිඩන් යුක්රේන සමාගමක අධ්‍යක්ෂ ධූරයට පත්ව ඇති බැවින් ඒ සම්බන්ධව පරීක්ෂණයක් පවත්වන ලෙසයි. හන්ටර් බයිඩන්ට එම සමාගම් අධ්‍යක්ෂ ධූරයට පත්වීමට නිසි සුදුසුකම් නොතිබූ බවත් එම රැකියාව ලබා ගැනීමේදී ජෝ බයිඩන් කිසියම් ආකාරයකින් මැදිහත් වීමක් කර ඇතිද යන්නත් නිශ්චිතව සොයා ගැනීම ට්‍රම්ප් ජනාධිපතිවරයාගේ අරමුණ වී පැවති බවට විචාරකයන් මත පළ කර තිබේ.
කෙසේ වුවද මේ දුරකථන ඇමතුමෙන් පසු යුක්රේන ජනාධීපති සොලෙන්ස්කි, හන්ටර් බයිඩන්ගේ ධූරය සම්බන්ධව සොයා බැලීම ආරම්භ කර තිබුණි. ඒ අතර මේ දුරකතන සංවාදය කණ වැකුණු තවත් පිරිසක්ද වැඩකටයුතු අැරඹූහ. ඒ ට්‍රම්ප් ජනාධිපතිවරයාගේ විරුද්ධ පාක්ෂික ඩිමොක්‍රටික්වරුන්ය. හන්ටර්ගේ පත්වීම අදාළ කර ගනිමින් බයිඩන්ගේ කකුලෙන් ඇද 2020 මැතිවරණය ජයග්‍රහණය කිරීමට උත්සාහ ගත් ට්‍රම්ප් ජනාධිපතිවරයාට එරෙහිව ඩිමොක්‍රටික්වරු එම සිද්ධියම පෙරළා භාවිත කරමින් 2020 ජනාධිපතිවරණයෙන් ට්‍රම්ප් පරාජය කිරීමට යොදා ගැනීමට කටයුතු කරමින් සිටිති.
ඩිමොක්‍රටික්වරුන්ගේ තර්කය වී ඇත්තේ යුක්රේන ජනාධිපතිවරයාට ජෝ බයිඩන්ගේ පුත්‍රයා සම්බන්ධව කටයුතු කරන ලෙසත් නැතිනම් යුක්රේනයට ලබාදෙන හමුදා ආධාර කපා හරින බවත් පවසා බලපෑම් කරමින් තම ධූරයේ බලතල අයුතු ලෙස භාවිත කර ඇති බවයි. කෙසේ වුවද ආධාර කපා හරින බවට තර්ජනය කළද පසුගිය වසරේ සැප්තැම්බර් මස 11 වැනිදා යුක්රේනයට හමුදා ආධාර දීමට ට්‍රම්ප් ජනාධිපතිවරයා කටයුතු කර තිබිණි. එම මාසයේම 24වැනිදා ඩිමොක්‍රටික්වරුන් විසින් දෝෂාභියෝගය සභා ගත කරන ලදී.
සාක්ෂි ලෙස අමෙරිකානු ජනාධිපතිවරයා සහ යුක්රේන ජනාධිපතිවරයා අතර පැවතුණු දුරකතන සාකච්ඡාවේ හඬපටද ඔවුන් විසින් ලබාගෙන තිබුණු අතර ඒවා ඉතා ආරක්ෂාකාරී ලෙස තබා ගැනීමටද ඔවුන් කටයුතු කර තිබිණි. ඔක්තෝබර් වන විට ඩිමොක්‍රටික්වරුන් විසින් තවදුරටත් සාක්ෂි කැඳවා තිබුණු අතර ඒ සඳහා යුක්රේනයේ අමෙරිකානු තානාපතිවරයා සහ ධවල මන්දිර සේවකයන් ඇතුළු පිරිසක්ද අයත් වී සිටියහ.
මේ සඳහා ට්‍රම්ප් ජනාධිපතිවරයාගේ පාර්ශ්වයෙන් පිළිතුරු බඳිමින් ධවල මන්දිර ප්‍රකාශකයෙක් පවසා සිටියේ යුක්රේන ජනාධිපතිවරයා සමග කෙරුණු සියලු සාකච්ඡා අමෙරිකාවේ විදේශ ප්‍රතිපත්තියට අනුකූලව සිදු කෙරී ඇති බවයි. එමෙන්ම යුක්රේනයට ලබා දෙන හමුදා ආධාර කපාහරින බව පවසා ඇත්තේ පසුගිය කාලයේදී යුක්රේනයේ සිදුවී ඇති වංචා දූෂණ හේතුවෙන් බවයි.
ඔක්තෝබර් 31වැනිදා අමෙරිකා පාර්ලිමේන්තුවේ නියෝජිත මන්ත්‍රී මණ්ඩලය ජනාධිපතිවරයාගේ දෝෂාභියෝග යෝජනාවට පක්ෂව ඡන්ද 196ක් ලබා දෙමින් එය ඉදිරියට පවත්වාගෙන යෑමට අනුමැතිය ලබා දුන්නේය. ඒ අනුව පසුගිය නොවැම්බර් 13වැනිදා දෝෂාභියෝගය ඉදිරියට ගෙන යෑම කටයුතු ආරම්භ විය.
නොවැම්බර් 13වැනිදා සිට සාක්ෂි කැඳවීම් ආරම්භ වූ අතර එහිදී නියෝජිත මන්ත්‍රී මණ්ඩලයේ බුද්ධි කමිටුවේ ප්‍රධානී ඇඩම් චීෆ් ජනාධිපතිවරයා අල්ලස් ලබාදීමට උත්සාහ ගෙන ඇතැයි චෝදනා කර සිටියේය. එය ආර්ටිකල් ටූ නම් වන වගන්තිය යටතේ දෝෂාභියෝගයක් එල්ල කිරීමට ප්‍රමාණවත් චෝදනාවක් බව පෙන්වා දුන් බුද්ධි කමිටු ප්‍රධානියා ඒ සම්බන්ධව සාක්ෂි ඉදිරියට ගෙන යෑමට අවසර පැතුවේය. ඉන්පසු ඒ සම්බන්ධව සාක්ෂි ඉදිරිපත් වූ අතර රාජ්‍ය සේවකයන් 12දෙනෙක් ඒ සම්බන්ධයෙන් සාක්ෂි ලබා දීමට ඉදිරිපත්ව සිටියහ. පසුව අල්ලස් දීමට උත්සාහ කිරීම සහ බලය අයුතු ලෙස භාවිත කිරීම යන චෝදනා ද්විත්වයම ජනාධිපතිවරයාට එරෙහිව එල්ල කිරීමට ඩිමොක්‍රටික්වරු උත්සාහ දැරූහ.
එහිදී සිදු කරන ලද ඡන්ද විමසීමේදී සියලු රිපබ්ලික් පක්ෂ සාමාජිකයන් යෝජනාවට විපක්ෂව ඡන්දය ලබා දුන් අතර ඒ සඳහා ඩිමොක්‍රටික් සාමාජිකයන් දෙදෙනකුගේද ඡන්ද හිමිව තිබිණි.
මේ වන විටත් දෝෂාභියෝගයේ ඉදිරි කටයුතු සිදුවෙමින් පවතින අතර ට්‍රම්ප් ජනාධිපතිවරයාගෙන් ඒ සම්බන්ධව නොයෙක් ප්‍රතිචාරයන්ද ලැබෙමින් තිබේ. ඔහු ට්වීටර් ඔස්සේ අදහස් දක්වමින් පවසා ඇත්තේ නියෝජිත මන්ත්‍රී මණ්ඩලයේ ප්‍රධානියා සහ බුද්ධි කමිටුවේ ප්‍රධානියා රාජද්‍රෝහී වීම යන චෝදනා යටතේ අත්අඩංගුවට ගත යුතු වන බවයි. මේ දෝෂාභියෝගය ජනතාවගේ මතය, ජනතා කැමැත්ත සහ ජනතා නිදහස ඔවුන්ගෙන් උදුරා ඉවත විසි කර දැමීමට දරන්නා වූ උත්සාහයක් බවද ජනාධිපතිරයා පවසා තිබිණි.
මේ අතර දෝෂාභියෝගය සම්බන්ධව ජනතා මතය විමසූ එක් වෙබ් අඩවියක් ඉදිරිපත් කර තිබූ දත්ත අනුව අමෙරිකානු ජනතාවගෙන් සියයට 56ක් ජනාධිපතිවරයා ඉවත් නොකළ යුතුය යන අදහස දරණ බවයි. සියයට 26ක් ජනාධිපතිවරයා ඉවත් කළ යුතුය යන මතය දරන බවත් සෙසු පිරිස කිසිදු අදහසක් නොදරන බවත්ය.
මේ වන විටත් දෝෂාභියෝගය විභාගයට ගැනෙමින් පවතින අතර එහි ඉදිරි ප්‍රතිඵල ඉක්මනින්ම දැන ගැනීමට ලැබෙනු ඇත. කෙසේ වුවද මේ වසරේ නොවැම්බර් මාසය වන විට මීළඟ ජනාධිපතිවරයා තෝරා ගැනීම වෙනුවෙන් අමෙරිකාවේ ජනාධිපතිවරණය පැවැත්වීමට නියමිතය. තම ධූර කාලය ආරම්භ වූ තැන් සිට ඩිමොක්‍රටික්වරුන්ගේ කකුලෙන් ඇදීම් මධ්‍යයේ කටයුතු කළ ජනාධිපති ඩොනල්ඩ් ට්‍රම්ප් මීළඟ රිපබ්ලිකන් අපේක්ෂකයා වීමට වැඩි ඉඩක් පවතින බව දැනට පෙනෙන්නට තිබෙන කරුණයි. කෙසේ වුවද අප රටේ මෙන්ම අමෙරිකාවේද දේශපාලනඥයන් තම තමන්ගේ දුරකතන සාකච්ඡා සම්බන්ධව මින් පසු මීට වඩා අවධානය යොමු කරනු ඇති බවද සිතිය හැකියි.
