ටයිම් සඟරාව මෙවර වසරේ පුද්ගලයා ලෙස ග්‍රේටා තන්බර්ග් නම් වන 16 හැවිරිදි ස්වීඩන තරුණිය නම් කර තිබේ. ග්‍රේටා පසුගිය සැප්තැම්බර් මාසය වන තෙක් කිසිවකුගේ වැඩි අවධානයට ලක් නොවූ සාමාන්‍ය තරුණියක වූවාය. එහෙත් ඈ තම ළමා කාලයේ සිටම ආරම්භ කළ පරිසරය රැක ගැනීමේ වැඩ පිළිවෙල දිගින් දිගටම ක්‍රියාත්මක කරමින් සිටියාය.
පසුගිය සැප්තම්බරයේ පැවති එක්සත් ජාතීන්ගේ කාලගුණ ක්‍රියාකාරී සමුළුවේදී ලෝක නායකයන් ඉදිරිපිට ඉතා හැඟිම්බර කතාවක් පැවැත්වූ ග්‍රේටා එසැණින් ලෝකයේ ප්‍රසිද්ධ පරිසර ක්‍රියාකාරිණියක් බවට පත්වූවාය. ඇය එහිදී ඉතා හැඟීම්බරව එහෙත් ඉතා දැඩි ස්වරයෙන් එහි රැස්ව සිටි ලෝක නායකයන්ට හා සමස්ත වැඩිහිටි පරම්පරාවට චෝදනා එල්ල කර සිටියේ දරුවන් වෙනුවෙන් ආරක්ෂා කළ යුතු ලෝකය විනාශ කර දමමින් සිටින්නේ යැයි චෝදනා නගමිනි. මේ සිදුවීම මුල් කර ගනිමින් ඇය ලෝකය පුරා පරිසරය ආරක්ෂා කර ගැනීම සම්බන්ධව ජනමතයක්ද ඇති කිරීමට සමත් වූවාය. එහි අතුරු ප්‍රතිඵලයක් වූයේ ඇය ටයිම් සඟරාවේ වසරේ පුද්ගලයා ඇතුලු තවත් සම්මාන රැසකට හිමිකම් කීමය.
2003 වසරේදී ස්වීඩනයේ ස්ටොක්හොම් හිදී උපත ලැබූ ග්‍රේටා තන්බර්ග් මාධ්‍යයට පවසා ඇති පරිදි කුඩා කළ සිටම පරිසරය ආරක්ෂා කර ගැනීම කෙරෙහි අවධානය යොමු කළාය. එමෙන්ම දැනට පරිසරය විනාශ වෙමින් පවතින බවත් පරිසරය ආරක්ෂා කර ගැනීමට දැන් සිට හෝ අවධානය යොමු නොකරන්නේ නම් අනාගත පරපුරට ලෝකයක් ඉතිරි නොවන බවත් ඇය වටහා ගත්තාය. එතැන් සිට ඇය තම කාලයෙන් වැඩි ප්‍රමාණයක් වෙන් කර ගත්තේ පරිසරය ආරක්ෂා කිරීම කෙරෙහි ජනතාවගේ අවධානය යොමු කරවීමටය. 2018 වසරේදී පරිසරය ආරක්ෂා කර ගැනීම සම්බන්ධව පාසල් සිසුන්ගේ අවධානය යොමු කරවීමේ වැඩපිළිවෙලක් ක්‍රියාත්මක කිරීමට ග්‍රේටා සමත් වූවාය. එම වසරේදී එක්සත් ජාතීන්ගේ කාලගුණ වෙනස්වීමේ සමුළුව ඇමතීමේ අවස්ථාවද උදා කර ගත්තාය. ‘කාලගුණ අර්බූදය‘ (climate crisis) යන්න ඇය විසින් ලෝක වාග්කෝෂයට එක් කරන ලද වචනයක් ලෙස සැලකේ.
ලෝකයේ කොහේ හෝ ස්ථානයක පාසල් සිසුන් වීථි බැස පරිසරය ආරක්ෂා කර ගැනීම සම්බන්ධයෙන් වැඩිහිටියන්ගේ අවධානය යොමු කරවන විරෝධතාවක නිරත වීම ඇයගේ වැඩපිළිවෙලක් වන අතර එය සාර්ථකව ක්‍රියාත්මක කරවීමටද ග්‍රේටා සමත් වූවාය. එමෙන්ම වසරක කාලයක් තුළ පාසල් සිසුන් මිලියනයක ප්‍රමාණයක් විථි වැස විරෝධතාවන්ට එක් කරවීමට ඇය සමත්ව සිටියාය.
අැය විසින් පරිසරය ආරක්ෂා කර ගැනීම සම්බන්ධව මිනිසුන්ගේ අවධානය යොමු කරවීමට ගත් උත්සාහය සහ එමගින් ඇතිවූ බලපෑම ජනමාධ්‍ය විසින් ‘ග්‍රේටා තන්බර්ග් බලපෑම‘ ලෙස හඳුන්වා තිබිණි. ඇය විසින් පරිසරය ආරක්ෂා කිරීම කෙරෙහි ලෝක ජනතාවගේ අවධානය යොමු කරවීමට ගන්නා උත්සාහය හේතුවෙන්ම ඇය මෙලෙස ජනතා ප්‍රසාදයට සහ ඇගැයීමට ලක්ව තිබේ.
