ලෝකයේ ළාබාලතම අගමැතිවරිය බවට පත්වෙමින් ලෝක වාර්තාවක්ද සමග ෆින්ලන්තයේ සන්නා මරීන් පසුගියදා එරට අගමැති ධූරයේ වැඩ භාරගත්තාය. ඇය මේ වන විට 34 හැවිරිදි වියේ පසුවන්නීය.
වයස අවුරුදු 27දී මරීන් දේශපාලනයට පිවිසියේ ඇයගේ උපන් ගම වන ටම්පෙරේ නමැති කර්මාන්ත පුරයේ නගර සභාවට එක් වෙමිනි. පසුව ෆින්ලන්ත පාර්ලිමේන්තුවට පැමිණි ඇය පක්ෂ පහක සභාගයක් ලෙස පැවති රජයේ පාලක පක්ෂයේ ප්‍රධාන නිලයක් දක්වා වේගවත් ගමනක නිරත වූවාය. ඇය මේ වන තෙක් සේවය කර සිටියේ එරට ප්‍රවාහන ඇමතිවරිය වශයෙනි.
පසුගියදා එරට පැවති තැපැල් වර්ජනයත් සමග අගමැති ඇක්ටි රින් ඉල්ලා අස් වූයේ ඔහු ජනතාවගේ විශ්වාසය අහිමි කර ගත් බවට ඔහුගේ සභාග ආණ්ඩුවේ සෙසු පක්ෂවල සාමාජිකයන්ගෙන් එල්ල වූ චෝදනා හේතුවෙනි. සන්නා මරීන්ට අගමැති ධූරය හිමි වූයේ ඇක්ටි රින්ගේ ඉල්ලා අස්වීමෙන් පසුවය.
ධූරයට පත් වීමෙන් පසු මාධ්‍ය හමුවේ ඇය පවසා සිටියේ ‘ජනතා විශ්වාසය දිනා ගැනීමට තමාට කළ යුතු කටයුතු රාශියක් පවතින බවය.‘ එමෙන්ම තම වයස හෝ ස්ත්‍රී පුරුෂ භාවය සම්බන්ධව තමා නොතකන බවත් ඒ වෙනුවට තමා දේශපාලනයට පැමිණීමට හේතු වූ කරුණ කෙරෙහි වැඩි අවධානයක් දක්වන බවත් ඇය වැඩිදුරටත් පවසා තිබේ.
අඩු වයස් රාජ්‍ය නායකයන් දැන් ලොව පුරා සුලබ වෙමින් පවතින අතර මේ රැල්ලේ සමාරම්භකයා ලෙස ප්‍රංස ජනාධිපති එම්මානුවෙල් මැක්‍රොන් දැක්විය හැකිය. මීට අමතරව වයස40ට අඩු රාජ්‍ය නායිකාවන් ලෙස යුක්රේන අගමැති 35 හැවිරිදි ඔලෙන්සි ෆොන්චරුක් සහ නවසීලන්ත අගමැතිනි 39 හැවිරිදි ජසින්ඩා අර්ඩ්න්ද දැක්විය හැකිය.
එමෙන්ම ෆින්ලන්යේ ප්‍රධාන දේශපාලන පක්ෂ පහේම දැනට සිටින පක්ෂ නායකයන් කාන්තාවන් වන අතර ඔවුන්ගෙන් සිව් දෙනෙක්ම වයස 40 අඩුය. සන්නා මරීන්ට අමතරව වාමාංශික පක්ෂයේ ලී ඇන්ඩර්සන් 32 හැවිරිදි වන අතර හරිත ලීගයේ මාරියා ඔහිසාලෝ 34 හැවිරිදි වේ. මධ්‍යම පක්ෂයේ නායිකා කැට්රි කැල්මුනි 32 හැවිරිදි වියේ පසුවන්නීය.
