මලයාසියාවේ එක්තරා පෙදෙසක ජැක්ලීන් නම් දැරියක සිටියාය. ඇය ප්‍රාථමික පන්තිවල ඉගෙනුම ලබද්දී ගුරුතුමිය පැවරුමක් ලෙස රචනා ලිවීමට දෙන්න පුරුදු වී සිටියාය. කියවීම හා ලිවීම හොඳින් කළ හැකි දැරියක වුවද ඇය කිසි දිනෙක වාක්‍ය ගළපා රචනා ලිවීමට අසමත් වූවාය. පන්තියේ අනෙක් සිසුන් පිටු පුරා රචනා ලියද්දී, තමාට හිස් කොළයක් දෙස බලාගෙන, පැන්සල හපමින් සිටින්නට සිදු වන්නේ මන්දැයි ඇය කල්පනා කළාය. තොරතුරු විමසා බැලීමෙන් ඉක්බිති හේතුව හඳුනාගැනීමට තරම් ඇය සූක්ෂ්ම දැරියක් වූවාය. තමගේ නි‍ෙවසේ නැති සිය මිතුරන්ගේ නිවෙස්වල ඇති යමක් ඇයගේ කල්පනාවට හසු විණි. ඒ පොත් අල්මාරියකි. රචනා ලිවීම හා පොත් කියවීම අතර කිසියම් සබඳතාවක් ඇති බව ඇයට අවබෝධ වුවද ඉන් පසු කළ යුත්තේ කුමක්දැයි ඇය නොදත්තාය. නමුත් ඒ අතර ඇගේ යෙහෙළියක් ඇයට පොතක් දුන්නාය. ඒ කියවා නැවත ගෙනත් දෙන පොරොන්දුව පිටය. ඒ කාරුණික මිතුරියගේ පරිත්‍යාගශීලීත්වයත් සමග ඇය ඇගේ පළමු පොත කියෙව්වාය. කියවීම යනු කෙතරම් අපූර්ව අත්දැකීමක්දැයි ඇය ඒ පොත සමග අත්වින්දාය.
ජැක්ලින් අපට වැදගත් වන්නේ ලංකාවේ පාඨකයන්ට මෙරට තුළදී ලැබෙන සුවිසල්ම අන්තර්ජාතික පොත් සල්පිල් අත්දැකීම ගෙනෙන බිග් බෑඩ් වුල්ෆ් පොත් ප්‍රදර්ශනයේ නිර්මාතෘවරිය ඇය වන නිසාය.
අද වන විට කිසිදු දේශීය සාහිත්‍යයකට හුදකලා පැවැත්මක් නැත. අන්තර්සංස්කෘතික හා අන්තර්කලාපීය සංස්කෘතික හුවමාරුවේ දූතයන් ලෙස ක්‍රියා කරන්නේ පොත් පත්ය. අප පරිවර්තන පොත පතවලට මෙතරම් පෙම් බඳින්නේ ද එබැවිනි. ෆ්‍රෑන්ක්ෆර්ට්, ලන්ඩන්, ටියුරින්, මොස්කව්, ටෝකියෝ වැනි නගර කේන්ද්‍ර කරගනිමින් අති දැවැන්න පොත් ප්‍රදර්ශන බිහිවන්නේද එබැවිනි.
අන්තර්ජාතික පොත් ප්‍රදර්ශන සංවිධානය වන්නේ පාඨකයා නිරන්තරයෙන් ඉල්ලා සිටින සිය රටට පමණක් සීමා නොවන කියවීමේ අත්දැකීම පදනම් කරගනිමිනි. අන්තර්ජාතික වශයෙන් පළ වී ඇති පොත් මිලදීගැනීමට හා ඒ පිළිබඳව තොරතුරු සපයා ගැනීමටත් මෙවන් ප්‍රදර්ශන මහත් සේ ඉවහල් වේ. එමෙන්ම මෙවන් ප්‍රදර්ශන හුදෙක් සල්පිල් ලෙසින් පමණක් නොව සැණකෙළි සිරියකින් උත්සවාකාරයෙන් පැවැත්වෙන නිසා එයින් රට තුළ කියවීම් සංස්කෘතිය පිළිබඳව උද්‍යෝගයක් ඇති කිරීමට සමත් වේ. රටේම පොත් ගුල්ලන් නොඉවසිල්ලෙන් බලා සිටින වාර්ෂික සිදුවීමක් බවට පොත් ප්‍රදර්ශන පත් වන්නේ එබැවිනි.
බිග් බෑඩ් වුල්ෆ් ලංකාවට ගෙනෙන්නනේද එබඳු වින්දනීය අත්දැකීමකි. විදේශයන්හි ප්‍රකාශයට පත් වූ නවතම සහ වැඩිම අලෙවිය ඇති කෘති මෙන්ම විවිධ විෂයයන් අරභයා ලියැවුණු කෘතිද අති මහත් ප්‍රමාණයක් මෙහි තිබීම සුවිශේෂීත්වයක් වෙයි.
භූගෝලීය වශයෙන් වෙනත් රටවල් හා ඍජු සබඳතා සහිත දූපත් රටක් ලෙස අපට ඇති එක අභියෝගයක් නම් දැනුමේ සහ සංස්කෘතික ජීවිතයේ නිම්වළලු පුළුල් කරගැනීමේ අවස්ථා වැඩි වැඩියෙන් සොයාගැනීමය. බිග් බෑඩ් වුල්ෆ් අපට ඒ සඳහා නව මගක් විවර කර දෙයි. මෙයින් පාඨකයා වෙත ගෙන එන ඇතැම් කෘති මෙරටදී පහසුවෙන් සොයාගත හැකි ඒවා නොවේ. අගනුවර සීමිත පොත් හල් කීපයක නූතන ජාත්‍යන්තර සාහිත්‍යාදී කෘති ඇතැම් විට තිබිය හැකි වුවද, ඒ සා විශාල පරිමාණයෙන් නොවේ. නමුත් බිග් බෑඩ් වුල්ෆ් වෙත යන අප විස්මිත වන්නේ එහි පවතින පොත් පත්හි විවිධත්වය දැකීමෙනි. රසවිඳීමට පමණක් නොව දැනුමට හෝ විෂය ගවේෂණය පොතපත කරන පාඨකයන්ට ද තෘප්තියට පත් කළ හැකි පොත් මෙහි තිබේ.
කිසිවෙකුගේ විනෝදාංශය හෝ වෘත්තිය ද විය හැකි ඡායාරූප ශිල්පයවැනි තේමා ද, ගෘහනිර්මාණශිල්පය වැනි මෙරටදී පොත්පත් සොයාගැනීමට අපහසු තේමා ද, සූප ශාස්ත්‍රයේ මෙතෙක් නොදුටු පැතිකඩ අනාවරණය කරන පොත්ද මෙහි ඇති බව කිව හැක්කේ හුදෙක් උදාහරණ සැපයීමක් ලෙසිනි. එමෙන්ම කොමික් වැනි විශේෂ ශානරවලට අයත් පොත්ද ඇනිමේෂන් සිනමා කෘතිවල රූපරාමු සහ නිෂ්පාදන ක්‍රියාවලිය අනාවරණය කරමින් ලියවුණු පොත්ද මෙරට පාඨකයන්ට බිග් බෑඩ් වුල්ෆ් වෙතින් සුවිශේෂී මිලකට මිලදී ගත හැකිය. මේ වැනි විෂයන් කෙරෙහි විශේෂ ලැදියාවක් ඇති පිරිස් හට බිග් බෑඩ් වුල්ෆ් මහඟු අවස්ථාවක් වන්නේ ඒවන් පොත් මෙරටදී සපයා ගැනීම කෙතරම් අසීරුදැයි ඔවුන් දන්නා බැවිනි.
එමෙන්ම බිග් බෑඩ් වුල්ෆ් හැම විටම රටින් රටට යන්නේ ලෝක සාහිත්‍යයේ යාවත්කාලීන රිද්මය හසුකරගනිමිනි. ඒ අනුව අන්තර්ජාතික පාඨක අවධානය යහමින් දිනාගත් වැඩිම අලෙවිය සහිත කෘති මෙන්ම, විවිධ සම්මාන උළෙළවලදී සම්මානයෙන් පිදුම් ලත් කෘති ද මේ ආකාරයට ප්‍රදර්ශනය තුළ දී මිලඳී ගන්නට පුළුවන. එය පාඨකයාගේ මන දොළ සැපිරීමක් පමණක් නොව මෙරට සාහිත්‍යයට අවශ්‍ය පෝෂණය සැපයීමක්ද වෙයි. වැඩිම අලෙවියක් ඇති කොටස් කිහිපයකින් සමන්විත පොත් එකතුවක් ලෙසින් විශේෂ මිලකට ගැනීමට අවස්ථාව ලැබීම, එකම ලේඛකයාගේ පොත් ගොනු වශයෙන් ලබා ගත හැකි වීම ආදිය පාඨකයන් මෙහිදී ලබන වාසියකි.
ළමා පොත් නිර්මාණය සම්බන්ධයෙන් නිසි අවධානය යොමු වී ඇති බව පෙනෙන අප වැනි රටකට ජ්‍යාත්‍යන්තර මට්ටමේ ළමා පොත් පෙළක් ගෙන ඒම පාඨකයාට පිරිනමන නැවුම් අත්දැකීමකි.
ලොව නම දිනූ විශිෂ්ට ළමා ලේඛකයන් සහ ප්‍රකාශකයන් ද එළිදක්වා ඇතිපොත් මේ එකතුවට අන්තර්ගත වී තිබේ. එමෙන්ම මෙවර බිග් බෑඩ් වුල්ෆ් ළමා පොත් ගොන්නට එකතු කොට ඇති ‘මැජිකල් බුක්ස්’ පොත් එකතුව ලාංකික පාඨකයන් විශේෂ අත්දැකීමක් වෙයි. එමගින් ළමයින්ට කියවීම වඩාත් වින්දනීය ක්‍රියාකාරකමක් බවට පත් කිරීමේ තාක්ෂණයක් පොත්වලට එකතු කොට තිබේ. මේ පොත් කියවීමට විශේෂ ජංගම දුරකථන යෙදවුමක් (ඇප් එකක්) භාවිත වන අතර, මැජිකල් පොත්වල තෝරාගත් පිටුවල ඇති සිතුවම් සජීවීකරණය වන ආකාරය එම ඇප් එක ඔස්සේ බලාගත හැකිය. මෙම පොත්වල තෝරාගත් පිටු කිහිපයකට පමණක් මෙම පහසුකම එකතු කොට ඇත්තේ දරුවන් තිරගත දෘශ්‍ය මාධ්‍යයට පමණක් ආකර්ෂණය වීම වැළැක්වීමටය.
2009 වසරේදී මුල් වරට මලයාසියාවේදී අරම්භ වුණු බිග් බෑඩ් වුල්ෆ් ප්‍රදර්ශනය මෙවර කොළඹදී ඔක්තෝබර 18 සිට 28 දක්වා පැවැත්වෙන්නේ තුන්වන වරටය. ලංකාවේ පමණක් නොව තායිලන්තය, ඉන්දුනීසියාව, පාකිස්තානය, මියන්මාරය, එක්සත් අරාබි එමීර් රාජ්‍යය ආදී රටවල් රැසක නගර විසි පහක එම ප්‍රදර්ශනය වාර්ෂිකව පැවැත්වේ. එමෙන්ම ප්‍රදර්ශනයේ අරමුණ වන්නේ තත්ත්වයෙන් උස්ස් පොත් අවම මිළකින් යුතුව පාඨකයා වෙත ලබා දීමයි. 50% සිට 90% දක්වා වට්ටම් ලබා ගන්නට පොත් මිලදී ගන්නන්ට අවස්ථාව ලැබෙන්නේ එබැවිනි.
කලාපීය ජනතාවගේ කියවීමේ ධාරිතාව ඉහළ නැංවීමට සහ කියවීම් සංස්කෘතිය ඔප් නැංවීම සඳහා උත්තේජනයක් සපයන්නට සමත් වූ මෙම පොත් සැණකෙළියේ නිර්මාතෘවරිය පවසන්නේ පොත් හා බැඳෙන අපූර්වතම අත්දැකීම වන්නේ ඒවා හුවමාරු කරගැනිම බවය. එබැවින් කියැවීමත්, පොත් බෙදාගැනීමත් අපි සැවොම පුරුදු පුහුණු කළ යුතු දෙයක් බව මේ ජැකලින් න්ග් නම් නපුරු වෘකයාගේ පාලිකාව නිරන්තරයෙන්ම කියා සිටියි.
