හෙක්ටර් කොබ්බෑකඩුව ගොවිකටයුතු පර්යේෂණ හා පුහුණුකිරීමේ ආයතනයේ අලෙවි ආහාර ප්‍රතිපත්ති හා කෘෂි ව්‍යපාර අංශය මඟින් රැස් කරනු ලබන ආහාර ද්‍රව්‍ය මිල තොරතුරුවලට අනුව පසුගිය සතියට සාපේක්ෂව මේ සතියේ මිල හැසිරීමට අදාළ සාරාංශගත විශ්ලේෂණයක් මේ සමඟ ඉදිරිපත් කර ඇත.
ප්‍රථමයෙන් සහල් වෙළෙඳපොළ මිල සලකා බැලීමේදී ආනයනික සුදු කැකුළු හැර අනෙකුත් දේශීය සහ ආනයනික සියලු සහල් වර්ගයන්හි මිල ගණන් සැලකිය යුතු වෙනස්වීමක් මේ සතියේ වාර්තා වී නොමැති අතර ආනයනික සුදු කැකුළු මිල පමණක් සුළු ඉහළයෑමක් වාර්තා විය. එසේම, අනෙකුත් ප්‍රධාන ආහාර භෝග ලෙස රතු ලූනු සහ ලොකු ලූනු මිල පසුගිය සතියට සාපේක්ෂව සැලකිය යුතු මිල වෙනස්වීමක් වාර්තා නොවේ. ඒ අනුව ආනයනික ලොකු ලූනු කිලෝවක් රු.70.00 -90.00 අතර මිලකට ද රතුලූනු කිලෝවක් රුපියල් 140.00 -200.00 ත් අතර මිලකට අලෙවි වීම ද දක්නට ලැබිණි.විශේෂයෙන් දේශීය රතු ලූනු අස්වනු වෙළෙඳපොළට ලැබීම සහ ප්‍රමාණවත් ආනයනික ලොකු ලූනු තොග ලැබීමත් මේ පහළ මිල මට්ටමට හේතු වී ඇත. එසේම, අර්තාපල් මිල සලකා බැලීමේදී ආනයනික අර්තාපල් කිලෝවක් රුපියල් 70.00 සිට 100.00 දක්වාද නුවරඑළිය අර්තාපල් කිලෝවක් රුපියල් 120.00 -160.00 ත් අතර මිලකට ද අලෙවි වීම දක්නට ලැබේ. එසේම රතු පරිප්පු මිල තවදුරටත් පහළ මට්ටමක පවතින අතර එහි මිල කිලෝවක් රුපියල් 120.00-130.00 අතර වාර්තා විය.
පසුගිය වසරට සාපේක්ෂව මේ මිල ගණන්හි පහළ යාම පරිප්පු සඳහා 21% ද අර්තාපල් සඳහා 19% හා ආනයනික ලොකු ලූණු සඳහා 15%ක්ද ලෙස වාර්තාවිය. විශේෂයෙන් රතු පරිප්පු සඳහා ලෝක වෙළෙඳපොළ තුළ පවතින ඉහළ සැපයුමත් සමඟ ආනයනික මිල සහ තොග මිල පහළයාම හේතුවෙන් ඉදිරි සතිය වනවිට දැනට පවතින පරිප්පු මිලෙහි තව දුරටත් පහළ යෑමක් අපේක්ෂා කළ හැකිය.
එළවළු මිල සලකා බැලීමේදී සියලුම වර්ගයන්හි මිල මට්ටම් තවදුරටත් පහළ යෑමක් වාර්තා වන අතර විශේෂයෙන් පහතරට ප්‍රධාන නිෂ්පාදන ප්‍රදේශ වන කල්පිටිය, තඹුත්තේගම, දඹුල්ල, යාපනය, වව්නියාව වැනි ප්‍රදේශවලින් ඉහළ සැපයුමක් පැවතීමමේ සඳහා හේතු වී ඇත. විශේෂයෙන් එළවළු වගා කරන ප්‍රධාන නිෂ්පාදන ප්‍රදේශයන් සඳහා හිතකර කාලගුණික සහ දේශගුණික තත්ත්වයක් පැවතීම මෙන්ම අස්වනු සමයේ අනපේක්ෂිත වර්ෂාපතනයක් නොලැබීම මෙම ඉහළ සැපයුම සඳහා හේතු වී ඇත. කොළඹ සහ අවට මෙන්ම ප්‍රධාන පාරිභෝගික ප්‍රදේශයන්හි වෙළඳපළවල්හි මිල සලකා බැලිමේදී උපරිම මිල ලීක්ස් සඳහා වාර්තා වන අතර එය කිලෝවකට රුපියල් 180.00ක් ලෙස වාර්තා විය.
අනෙකුත් සියලුම එළවළු වර්ග වල මිල කිලෝවකට රු 160.00 කට වඩා අඩු අගයක් බොහොමයක් වෙළෙඳපොළවල් තුළින් තවදුරටත් වාර්තා වී ඇති අතර දිවයිනේ ප්‍රාදේශීය පොළවල්හි මිල මට්ටම මේ මිලට වඩා පහළ අගයක් ගත් අතර ඒ අනුව බොහොමයක් වර්ගයන් සඳහා රු.120.00ක උපරිමයක් තවදුරටත් වාර්තා විය. එසේම පොල් මිල සලකා බැලිමේ දී සැලකිය යුතු මිල වෙනස්වීමක් වාර්තා නොවන අතර කුඩා ප්‍රමාණයේ ගෙඩියක් රුපියල් 60.00-80.00 අතර ද ප්‍රමාණයයෙන් ලොකු ගෙඩියක් රුපියල් 85.00-90.00 අතර ද බොහොමයක් කොළඹ අවට සිල්ලර වෙළෙඳපොළවල් තුළින් වාර්තා විය.
පළතුරු මිල සලකා බැලීමේදී සියලුම පලතුරු වර්ගයන්හි මිල ගණන් පෙර සතියට සාපේක්ෂව පහළයෑමක් වාර්තා විය. බොහොමයක් වර්ගයන්හි අස්වනු සමය එළඹී තිබීම මෙම මිල පහළයෑමට ප්‍රධාන හේතුව වී ඇති අතර එළඹෙන මැයි මස තෙක් මෙම පහළ මිල මට්ටම පැවතිය හැකි වුව ද සියලුම කෙසෙල් වර්ගයන්හි මිල ගණන් පැවතිය හැකි ඉහළ ඉල්ලුම හේතුවෙන් උත්සව සමය තුළ ඉහළයෑමක් අපේක්ෂා කළ හැකිය.
එසේම මාළු සහ බිත්තර වෙළෙඳපොළ තත්ත්වයන් සලකා බැලීමේ දී ඉස්සා හැර අනෙකුත් සියලුම මාළු වර්ගයන්හි මිල ගණන් පහළයෑමක් වාර්තා වී ඇති අතර ප්‍රධාන මාළු අස්වනු ලැබෙන ප්‍රදේශයන් හි කුඩා ප්‍රමාණයේ මාළු අස්වැන්න ඉහළ මට්ටමක පැවතීම මෙම මිල පහළයාමට හේතු වී තිබේ.
බිත්තර මිල සලකා බැලීමේ දී දුඹුරු බිත්තරයක් රුපියල් 13.00-16.00 අතර ද සුදු බිත්තරයක් 12.00-14.00 අතර ද වාර්තා වූ අතර මෙම මිල පෙර සතියට සාපේක්ෂව බිත්තරයකට ශත 50කින් පමණ පහළයෑමකි.
ඩබ්.එච්.දුමින්ද ප්‍රියදර්ශන
හෙක්ටර් කොබ්බෑකඩුව
ගොවි පර්යේෂණ ආයතනය.
