එළ­වළු මිල

 ආනයනික ලොකු ලූනු කිලෝවක් රුපියල් 70.00 - 90.00

 රතුලූනු කිලෝවක් රුපියල් 160.00 - 200.00

 යාපනය අර්තාපල් කිලෝවක් රුපියල් 80.00 -100.00

 නුවරඑළිය අර්තාපල් කිලෝවක් රුපියල් 100.00 -160.00

හෙක්ටර් කොබ්බෑකඩුව ගොවිකටයුතු පර්යේෂණ හා පුහුණුකිරීමේ ආයතනයේ අලෙවි ආහාර ප්‍රතිපත්ති හා කෘෂි ව්‍යපාර අංශය මගින් රැස් කරනු ලබන ආහාර ද්‍රව්‍ය මිල තොරතුරු වලට අනුව පසුගිය සතියට සාපේක්ෂව මෙම සතියේ මිල හැසිරීමට අදාළ සාරාංශගත විශ්ලේෂණයක් පහත දක්වා ඇත.

ප්‍රථමයෙන් සහල් වෙළෙඳපොළ මිල සලකා බැලීමේදී ආනයනික සුදු කැකුළු හැර අනෙකුත් දේශීය සහ ආනයනික සියලු සහල්වර්ගයන්හි මිල ගණන් තවදුරටත් රුපියල් 2.00 ත් 3.00 ත් අතර අගයකින් පහළ යාමක් වාර්තා වේ.විශේෂයෙන් මෙවර මහ කන්නයට අදාළ අස්වනු වෙළඳපොළට ලැබෙමින් පැවතීම මෙම මිල පහළයාමට ප්‍රධාන හේතුව වී ඇත. කෘෂිකර්ම දෙපාර්තමේන්තුවේ බෝග පුරෝකතන වාර්තාවට අනුවමෙවර මහ කන්නයේ අපේක්ෂිත සහල් ප්‍රමාණය මෙ.ටො. ලක්ෂ 16කට ආසන්න වන අතර එය රටේ දේශීය සහල් අවශ්‍යතාවයෙන් මාස 8කට පමණ ප්‍රමාණවත් වේ. කෙසේ වුවද මෙවර මහ කන්නය තුළ ඉහළ අස්වැන්නක් පැවතිය ද පසුගිය වසර තුළ මෙන් තරඟකාරී ලෙස වී මිල දී ගැනීමට මහා පරිමාණ මෝල් හිමියන් ඉදිරිපත්ව පැවතීම හේතුවෙන් වී මිලෙහි අසාමාන්‍ය මිල පහළයාමක් වාර්තා නොවේ.මෙම තත්ත්වය තුළ රජය විසින් තීරණය කර ඇති වී මිලට වඩා ඉහළ මිලක් බොහොමයක් නිෂ්පාදන ප්‍රදේශ තුළින් වාර්තා වේ. ඒ අනුව ඉහළ අස්වැන්නක් පැවතිය ද දේශීය සහල් මිල සැලකිය යුතු ලෙස පහළ නොයාමට පවතින සාපේක්ෂ ඉහළ වී මිල හේතු වී තිබේ.

එසේම අනෙකුත් ප්‍රධාන ආහාර භෝග ලෙස රතුලුනු සහ ලොකුලූනු මිල පසුගිය සතියට සාපේක්ෂව තවදුරටත් පහළ ගොස් ඇත. ඒ අනුව ආනයනික ලොකු ලූනු කිලෝවක්රු.70.00 -90.00 අතර මිලකට ද රතුලූනු කිලෝවක් රුපියල් 160.00 -200.00 ත් අතර මිලකට අලෙවි වීම ද දක්නට ලැබිණි. විශේෂයෙන් දේශීය රතුලූනු අස්වනු වෙළෙඳපොළට ලැබීම සහ ප්‍රමාණවත් ආනයනික ලොකුලූනු තොග ලැබීමත් මෙම මිල පහළ යාමට ප්‍රධාන හේතුව වී තිබේ.එසේම අර්තාපල් මිල සලකා බැලීමේදී ආනයනික සහ යාපනය අර්තාපල් කිලෝවක් රුපියල් 80.00 සිට 100.00 දක්වාද නුවරඑළිය අර්තාපල් කිලෝවක් රුපියල් 100.00 -160.00 ත් අතර මිලකට ද අලෙවි වීමදක්නට ලැබේ.එසේම රතු පරිප්පු මිල තවදුරටත් පහළ මට්ටමක පවතින අතර එහි මිල කිලෝවක් රුපියල් 120.00-130.00 අතර වාර්තා විය. පසුගිය වසරට සාපේක්ෂව මේ මිල ගණන්හි පහළ යාම පරිප්පු සඳහා 21% ද අර්තාපල් සදහා 20% හා ආනයනික ලොකු ලූනු සඳහා 16%ක්ද ලෙස වාර්තාවිය. විශේෂයෙන් රතු පරිප්පු සඳහාලෝක වෙළඳපොළ තුළ පවතින ඉහළ සැපයුමත් සමඟ ආනයනික මිල සහ තොග මිල පහළයාමහේතුවෙන් ඉදිරි සතිය වනවිට දැනට පවතින පරිප්පු මිලෙහි තව දුරටත් පහළ යාමක් අපේක්ෂා කළ හැකිය. මෙම මිල පහළයාමේ තත්වය හේතුවෙන් ආනයනික පරිප්පු සඳහා පනවා තිබූ උපරිම සිල්ලර මිලද ඉවත් කිරීමට මේ සතියේ පැවති ජීවන වියදම් කමිටුව තීරණය කරන ලදි. මන්ද කප් වර්ගයේ පරිප්පු හැර අනෙකුත් පරිප්පු තොග මිල කිලෝවක් රුපියල් 100.00-108.00 දක්වා පහළ ගොස් තිබීම හේතුවෙනි.

එසේම එළවළු මිල සලකා බැලිමේදී සියලුම වර්ගයන්හි මිල මට්ටම් තවදුරටත් පහළ යාමක් වාර්තා වන අතර විශේෂයෙන් පහතරට ප්‍රධාන නිෂ්පාදන ප්‍රදේශ වන කල්පිටිය, තඹුත්තේගම, දඹුල්ල ,යාපනය වැනි ප්‍රදේශවලින් ඉහළ සැපයුමක් පැවතීමමේ සඳහා හේතු වී ඇත.විශේෂයෙන් එළවළු වගා කරන ප්‍රධාන නිෂ්පාදන ප්‍රදේශයන් සඳහා හිතකර කාලගුණික සහ දේශගුණික තත්ත්වයක් පැවතීම මෙන්ම අස්වනු සමය තුළ අනපේක්ෂිත වර්ෂාපතනයක් නොලැබීම මෙම ඉහළ සැපයුම සඳහා හේතු වී ඇත. කොළඹ සහ අවට මෙන්ම ප්‍රධාන පාරිභෝගික ප්‍රදේශයන්හි වෙළඳපලවල්හි මිල සලකා බැලිමේදී උපරිම මිල මාළුමිරිස් සදහා වාර්තා වන අතර එය කිලෝවකට රුපියල් 250.00ක් ලෙස වැල්ලවත්ත වෙළෙඳපොළ තුළින් වාර්තා විය. අනෙකුත් සියළුම එළවළු වර්ග වල මිල කිලෝවකට රු 160.00 කට වඩා අඩු අගයක් බොහොමයක් වෙළෙඳපොළවල් තුළින් තවදුරටත් වාර්තා වී ඇති අතර දිවයිනේ ප්‍රාදේශීය පොළවල්හි මිල මට්ටම මෙම මිලට වඩා පහළ අගයක් ගත් අතර ඒ අනුව බොහොමයක් වර්ගයන් සඳහා රු.120.00ක උපරිමයක් වාර්තා විය.

එසේම පොල් මිල සලකා බැලිමේ දී සැලකිය යුතු මිල වෙනස්වීමක් වාර්තා නොවන අතර කුඩා ප්‍රමාණයේ ගෙඩියක් රුපියල් 65.00-80.00 අතර ද ප්‍රමාණයයෙන් ලොකු ගෙඩියක් රුපියල් 85.00-90.00 අතර දබොහොමයක් කොළඹ අවට සිල්ලර වෙළෙඳපොළවල් තුළින් වාර්තා විය. කෙසේ වුවද කොළඹින් පිට පලාත්වල සිල්ලර ‍ තුළින් වාර්තා වුවද මිල ම සිල්ලර මිලද ඉවත් කිරීමට මෙම සතියේ පැවති ජීවන වියදම් කමිටුව තීරණය කරන ලදි.වෙළෙඳපොළවල් තුළින් මෙම මිලට සාපේක්ෂව අඩු මිලක් වාර්තා විය. එසේම, මෙම ඉහළ පොල් මිල එළඹෙන අප්‍රේල් මස තෙක් තවදුරටත් අපේක්ෂා කරන අතර මැයි මස ආරම්භයත් සමග මිල ගණන් පහළයාමක් අපේක්ෂා කළ හැකිය.

පලතුරු මිල සලකා බැලීමේදී සියලුම පලතුරු වර්ගයන්හි මිල ගණන් පෙර සතියට සාපේක්ෂව පහළයාමක් වාර්තා විය. බොහොමයක් වර්ගයන්හි අස්වනු සමය එළඹී තිබීම මෙම මිල පහළයාමට ප්‍රධාන හේතුව වී ඇති අතර එළඹෙන මැයි මස තෙක් මෙම පහළ මිල මට්ටම පැවතිය හැකි වුව ද සියලුම කෙසෙල් වර්ගයන්හි මිල ගණන් පැවතිය හැකි ඉහළ ඉල්ලුම හේතුවෙන් උත්සව සමය තුළ ඉහළයාමක් අපේක්ෂා කළ හැකිය.

එසේම මාළු සහ බිත්තර වෙළෙඳපොළ තත්ත්වයන් සලකා බැලීමේ දී තලපත්, මෝරා, කෙලවල්ලා හැර අනෙකුත් සියලුම මාළු වර්ගයන්හි මිළ ගණන් පහළයාමක් වාර්තා වී ඇති අතර ප්‍රධාන මාළු අස්වනු ලැබෙන ප්‍රදේශයන් හි කුඩා ප්‍රමාණයේ මාළු අස්වැන්න ඉහළ මට්ටමක පැවතීම මෙම මිල පහළයාමට හේතු වී තිබේ.බිත්තර මිල සලකා බැලීමේ දී දුඹුරු බිත්තරයක් රුපියල් 14.00-16.00 අතර ද සුදු බිත්තරයක් 12.50-15.00 අතර ද වාර්තා වූ අතර මෙම මිල පෙර සතියට සාපේක්ෂව බිත්තරයකට ශත 50කින් පමණ පහළයාමක් ලෙස වාර්තා විය.

හෙක්ටර් කොබ්බෑකඩුව ගොවිකටයුතු පර්යේෂණ හා පුහුණු කිරීමේ ආයතනයේ අලෙවි ආහාර ප්‍රතිපත්ති හා කෘෂි ව්‍යාපාර අංශයේ ක්ෂේත්‍ර සහ වෙළෙඳපොළ මිලතොරතුරු වලට අනුව ඉදිරි සති කිහිපය තුළ ප්‍රධාන ආහාර භෝගයන් හි දැනට පවතින මිල ගණන් හි සැළකිය යුතු ඉහළයාමක් අපේක්ෂා නොකරන අතර විශේෂයෙන් අර්තාපල්,ලොකු ලූනු,රතු ලූනු, සහල්,පරිප්පු, කව්පි, සීනිසහ ප්‍රධාන එළවළු වර්ග වල පවතින මිල ගණන්හි කිසිදු ඉහළයාමක් අපේක්ෂා කළ නොහැක. පරිප්පු, ලොකු ලූනු, රතු ලූනු සහ සීනි මිල ගණන්හි දැනට පවතින මිල තවදුරටත් පහළයාමක් සිදුවිය හැකිය. ප්‍රමාණවත් දේශීය සහ ආනයනින තොග පැවතීම මේ සඳහා හේතු වී ඇති අතර එළවළු සැපයුම ද ඉහළ මට්ටමක පවතින අතර සැලකිය යුතු මිල ඉහළයාමක් කිසිසේත්ම අපේක්ෂා කළ නොහැක. කෙසේ වුව ද අප්‍රෙල් මස 05 -12 අතර කාලය තුළ ඇතිවිය හැකි ඉහළ ඉල්ලුමත් සමඟ දැනට පවතින එළවළු සහ කෙසෙල් මිල ගණන් 50% කින් පමණ ඉහළයාමක් අපේක්ෂා කළ හැකිය.

ඩබ්. එච්. දුමින්ද ප්‍රියදර්ශන

අලෙවි ආහාර ප්‍රතිපත්ති හා කෘෂි ව්‍යපාර අංශය

හෙක්ටර් කොබ්බෑකඩුව ගොවිකටයුතු පර්යේෂණ හා

පුහුණුකිරීමේ ආයතනය