ගම්මිරිස් සමඟ පැපොල් ඇට මිශ්‍ර කර ඇත්තේ දැයි පරීක්ෂා කිරීමට ගම්මිරිස් ඇට අහුරක් ගෙන ජල බඳුනකට දැමූ විට ගිලී යන්නේ පරිණත ගම්මිරිස් ඇටය. ජලයේ පාවෙන්නේ පැපොල් ඇටය. කහකුඩු වලට මෙටැනිල් කහ වර්ණකය යොදා ඇත්තේ දැයි පරීක්ෂා කිරීමට තනුක අම්ල බින්දු කිහිපයක් යෙදූ විට කහ පාට රෝස පැහැයට හැරේ.
වෙ‍ෙළඳපොළ තුළ විකිණීමට කොතෙකුත් ආහාර පාන වර්ග ඇත. එහෙත් පාරිභෝගිකයන් විසින් මිලදී ගන්නා සියලු ආහාර පාන වල සඳහන් කර ඇති ගුණාත්මක බව ඒ අයුරින්ම පවතීදැයි යන්න වර්තමානයේ ගැටලු සහගතය.ඒ වෙ‍ෙළඳපොළ තුළ විකිණීමට ඇති ආහාර වර්ග කිහිපයකම අපමිශ්‍රණ ද්‍රව්‍ය තිබූ බවට ප්‍රවෘත්තින් නිරන්තරයෙන් වාර්තා වීමයි . ආහාර ද්‍රව්‍යයක ගුණාත්මක බව අඩු කරන වෙනත් ද්‍රව්‍යයක් ඒ සමඟ එක් කිරීම හෝ ආහාරයේ ප්‍රධාන සංචාරකයක් අඩුකිරීම මඟින් එහි අන්තර්ගත පෝෂණ මට්ටම හීන කිරීම ආහාර අපමිශ්‍රණය කිරීම හෙවත් ආහාර බාල කිරීම ලෙස සරලව හැඳින්විය හැකිය.
ආහාර බාලකරන ක්‍රම
ආහාරයේ ගුණාත්මක බව පහත හෙළීමට මුල් වන විවිධ ක්‍රම රාශියක් ඇත. ගම්මිරිස් ,කහකුඩු, මිරිස් කුඩු , එළකිරි වැනි දෛනික ජීවිතයේ පරිභෝජනයට ගන්නා ආහාර වර්ග රැසක් මෙලෙස බාල කිරීම්වලට ලක් වේ.
මෙමඟින් නිෂ්පාදකයින් බොහෝ විට බලාපොරොත්තු වනුයේ ආහාරයේ සත්‍ය පරිමාවට වඩා වැඩි ව්‍යාජ පරිමාවක් පෙන්වා ලාභ ඉපයීමය.
එසේත් නැතිනම් එක් කරන වර්ණක මඟින් ආහාරයේ නැති නැවුම් බවක් හා ගුණාත්මක බවක් පෙන්වා පාරිභෝගිකයා මුලා කරමින් අලෙවිය වැඩි කරගැනීමටය .උදාහරණයක් ලෙස ගම්මිරිස් ඇට මෙන් ප්‍රමාණයෙන් හා පෙනුමෙන් සමාන වන පැපොල් ඇට ගම්මිරිස් ඇට හා මිශ්‍ර කරනු ලැබේ.එවිට ගම්මිරිස් වල ප්‍රමාණය වැඩි වුවද ගම්මිරිස් වලින් ආහාරයට හිමි වන ලාක්ෂණික රසය මෙන්ම ගුණයද අහිමි වේ.
මෙලෙසම කහකුඩු ,මිරිස් කුඩුවල ස්වාභාවික වර්ණයන්ට ගැළපෙන වර්ණකයන් යොදා ඒවායේ වර්ණය වැඩි කරලයි.මෙම වර්ණක බොහෝමයක් ශරීරයට අහිතකරය.තවද එළකිරිවලට ජලය මිශ්‍ර කරනු ලැබේ.එමඟින් එයින් ලැබෙන පෝෂණය නිසියාකාරව පාරිභෝගිකයාට නොලැබේ.මේ දේශීය වෙ‍ෙළඳපොළ තුළ වාර්තා වන අපමිශ්‍රණ ක්‍රම කිහිපයක් පමණි.එහෙත් සමහර අපමිශ්‍රණ ක්‍රම ගැන දැනුවත් වන විට ආහාර ගැනීමට ඇති රුචිය පවා දුරු වේ.දේශීය වෙ‍ෙළඳපොළ තුළදී පමණක් නොව මෙරටින් විදේශීය වෙ‍ෙළඳපොළ වෙත අපනයනය කරනු ලබන භාණ්ඩ වල පවා මෙලෙස අපමිශ්‍ර කිරීම් වාර්තා වීම සැබවින්ම කණගාටුවට කරුණකි.
“සිලෝන් ටී” හෙවත් මෙරටින් අපනයනය කරනු ලබන තේ සඳහා ලෝක වෙ‍ෙළඳපොළ තුළ ඇත්තේ ඉහළම ඉල්ලුමකි.එහෙයින්ම තේ යනු මෙරටට විදේශ විනිමය ගෙන එන ධන උල්පතකි.එය කෙතරම්ද යත් සමස්ත විදේශ විනිමයෙන් 15% ක දායකත්වයක් ලැබෙනුයේ තේ අපනයනයෙනි.කෘෂිකාර්මික අපනයනය ආදායමෙන් නම් එය 65%කි. මෙරට තේ කර්මාන්තය ආශ්‍රිතව සෘජුව හා වක්‍රව නියැලී සිටින පිරිස රටේ ජනගහනයෙන් ආසන්නව 20%කි.
මෙම පිරිසට දිගටම තේ කර්මාන්තය ආශ්‍රිතව තම ජීවිකාව පවත්වා ගැනීමට නම් ලංකාවේ තේ සඳහා ලෝක වෙළඳපොළ තුළ ඇති ඉල්ලුම එලෙසම පවත්වා ගත යුතුය.
ලෝක වෙළඳපොළ තුල ලංකාවේ තේ සඳහා ඉහළ ඉල්ලුමක් ඇත්තේ එහි ඇති ගුණාත්මක බව හා විශ්වසනීයත්ව ය හේතුවෙනි. එහෙත් මෙම අපමිශ්‍ර කිරීම් මෙරටින් අපනයනය කරන තේ ආශ්‍රිතවද වාර්තා වීම නිසා මෙකී විශ්වාසය පලුදු වෙමින් පවතියි.තේ ආශ්‍රිත ප්‍රධාන අපමිශ්‍රණ ක්‍රමයක් නම් වර්ණක එක් කිරීමයි.එහෙත් වර්තමානය වන විට මීට අමතරව සීනි හා හුනු මිශ්‍ර කිරීම්ද වාර්තා වේ.මෙරට තේ වගා කරන ප්‍රදේශ අනුව තේ වර්ග දෙකකි.ඒ උඩරට හා පහතරට තේ ය.
මෙයින් පහතරට තේ වල කළු පැහැය වැඩි වන තරමට එහි වටිනාකමද වැඩි වේ. තේ කොළ අඹරන අවස්ථාවේදී සීනි එක් කිරීම මඟින් එහි කළු පැහැය වැඩි කරගත හැකිය.
තවද තේ බෑග් (tea bag) වලට හුනු එක් කිරීම මඟින් එය උණු වතුරට දැමූ පසු ලැබෙන කහට ගතිය වැඩි වේ. මේ ක්‍රම නිෂ්පාදකයන් සුළු පිරිසක් අනුගමනය කිරීමට පෙලඹුනද එමඟින් මෙරට තේ වල විශ්වසනීයත්වය අඩු වී මෙරට තේ සඳහා ඇති ඉල්ලුම හීන වෙමින් පවතියි.
ආහාර අපමිශ්‍ර කිරීමේ ප්‍රතිවිපාක
අපනයන භාණ්ඩ අපමිශ්‍ර කිරීම් නිසා අන්තර්ජාතිකව වෙ‍ෙළඳපොළ තුළ මෙරට භාණ්ඩ සඳහා ඇති ඉල්ලුම අඩුවේ.එය මෙරට ආර්ථිකයට ප්‍රබල පාඩුවකි.ආර්ථිකමය වශයෙන් මෙන්ම පුද්ගල සෞඛ්‍යටද එය ප්‍රබල තර්ජනයකි.ආන්ත්‍රික රෝග,වමනය ,හිසරදය,ආහාර විෂවීම් ,ආසාත්මිකතා වැනි අයහපත් සෞඛය තත්ව ඇති වීම මෙන්ම පිළිකා වැනි මාරාන්තික රෝග සඳහාද මෙය අත වැනීමකි.සැබවින්ම පාරිභෝගිකකයාට ආහාරය සඳහා ගෙවන මුදලට සරිලන පෝෂණයක් මෙවැනි ආහාර වලින් නොලැබේ.ඒ වෙනුවට එම ආහාර අනුභවයෙන් සෑදෙන රෝගාබාධ සඳහා ප්‍රතිකාර ගැනීමට අමතර මුදල් හා ශ්‍රමය වැය කිරීමට පාරිභෝගිකයාට සිදු වේ.
ආහාර අපමිශ්‍ර කිරීම් හඳුනා ගැනීමේ ක්‍රම කිහිපයක්
තමා මිලදී ගත් ආහාර වලින් අපමිශ්‍රිත ආහාර වර්ග කිහිපයික් හෝ හඳුනා ගැනීමට හැකියාව ලැබේ නම් එය ඉතා අගනේය .ගම්මිරිස් සමඟ පැපොල් ඇට මිශ්‍ර කර ඇත්තේ දැයි පරීක්ෂා කිරීමට ගම්මිරිස් ඇට අහුරක් ගෙන ජල බඳුනකට දැමූ විට ගිලී යන්නේ පරිණත ගම්මිරිස් ඇටය.එහෙත් ජලයේ පාවෙන්නේ පැපොල් ඇටය. කහකුඩු වලට මෙටැනිල් කහ වර්ණකය යොදා ඇත්තේ දැයි පරීක්ෂා කිරීමට තනුක අම්ල බින්දු කිහිපයක් යෙදූ විට කහ පාට රෝස පැහැයට හැරේ.
කිරි හා ජලය මුසු කර ඇත්තේ දැයි පරීක්ෂා කිරීමට මිලදී ගත් කිරි වලින් බිංදු කිහිපයක් පිරිසුදු පිඟන් ගඩොළක් හෝ වීදුරු මතු පිටක් මතට දමන්න.
පිරිසුදු කිරිවල නම් සුදු පැහැ සීමා සලකුණක් දැක ගත හැකි වේ.
එහෙත් ජලය හා මිශ්‍ර වූ කිරි වල එසේ සළකුණක් දැකිය නොහැකි අතර එය ගලා යෑමක් සිදු වේ.
එමෙන්ම වර්ණ ගැන්වූ තේ කොළ තීන්ත පොවන කඩදාසියක් මත තබා ජලයෙන් තෙත් කළ විට කඩදාසිය වර්ණ ගැන්වේ.මෙවැනි ක්‍රම නිවසේදී ආහාර ද්‍රව්‍යය අපමිශ්‍ර වී ඇත්තේ දැයි පරීක්ෂා කළ හැකි ඉතා සරල වූත් ප්‍රායෝගික ක්‍රම කිහිපයකි.
තමා මිලදී ගන්නා ආහාර අපමිශ්‍රිත වී ඇති වග හඳුනා ගත් විගස අන් අය දැනුවත් කිරීමත්, මහජන සෞඛය පරීක්ෂකවරයා ඇතුළු ඊට අදාළ පාර්ශ්ව දැනුවත් කිරීම පාරිභෝගිකයන්ගේ යුතුකම හා වගකීමය.
එමෙන්ම පාරිභෝගිකයා මුළා කරන මෙවැන් බාල භාණ්ඩ අලෙවි කරන කූට වෙළෙඳුන් නීතීය හමුවට ගෙන ඒම කාලීන වගකීමකි.
උමයංගනා පූජනී ගුණසේකර
කෘෂිකර්ම පීඨය
රුහුණ විශ්වවිද්‍යාලය
