විරුද්ධ පක්ෂයේ දේශපාලනඥ ඇලෙක්සෙයි නවල්නිට විෂ ශරීරගත වී ඇති බව තහවුරු වේ.
ලෝකයේ හොඳම සෞඛ්‍ය සේවය පවතින ජර්මනියේ වෛද්‍යවරු පසුගිය සැප්තැම්බර් 10වැනිදා වන විට නවල්නි කෝමා තත්ත්වයෙන් මුදා ගැනීමට සමත්ව සිටියහ.
රුසියාවේ විරුද්ධ පක්ෂයේ ප්‍රධාන දේශපාලන ක්‍රියාකාරිකයක් වන ඇලෙක්සෙයි නවල්නි මේ වන විට ජර්මනියේ බර්ලින්හි රෝහලක සුවය ලබමින් සිටින බව වාර්තා වේ. ඔහු පසුගියදා හදිසියේ රෝගාතුර වූයේ ගුවන් ගමනක් අතරතුරදීය. වහාම ඔහු ජර්මනියේ රෝහලක් වෙත ගෙන යන ලදුව රෝගී තත්ත්වයට හේතුව සොයා ගැනීමට පර්යේෂණ කිහිපයක් පවත්වා තිබේ. එහිදී රටවල් තුනක් විසින් ස්වාධීනව සිදුකරන ලද පර්යේෂණ මගින් තහවුරු වී ඇත්තේ නවල්නිගේ ශරීරයේ ස්නායු අක්‍රිය කරනවන විෂක් අන්තර්ගත වී ඇති බවයි.
ඇලෙක්සෙයි නවල්නි ලෝකය හඳුනා ගන්නේ රුසියාවේ විරුද්ධ පක්ෂයේ කැපී පෙනෙන චරිතයක් වශයෙනි. ඔහු ආණ්ඩුවට විරුද්ධ දේශපාලන උද්ඝෝෂණ රැසකට නායකත්වය දී තිබේ.
තවද පුටින්ගේ ආණ්ඩුවේ දූෂණ වංචා ලෝකයට හෙළිදරවු කිරීමේ කටයුතුවලදීද ඇලෙක්සෙයි නවල්නි පෙරමුණ ගෙන කටයුතු කර තිබේ.
පසුගියදා රුසියාවේ තොමස්ක් සිට මොස්කව් දක්වා ගුවන් ගමනක යෙදෙමින් සිටියදී නවල්නි හදිසියේ රෝගාතුර වූයේය. ඔහු එක්වරම දැඩි වේදනාවෙන් කෑ ගසන්නටත්, දඟලන්නටත් පටන්ගෙන තිබේ.
එම අවස්ථාවේදී ගුවන් යානය තොමස්ක් වෙත යළිත් හදිසි ගොඩබෑමකට ලක් කළ යානයේ නිලධාරීහු නවල්නි තොමස්ක්හි රෝහල් වෙත ගෙන යෑමට කටයුතු කළහ. ඒ වන විටද නවල්නි පසුවී ඇත්තේ ‘කෝමා‘ තත්ත්වයෙනි. නවල්නිගේ තත්ත්වය අයහපත් බව වටහාගත් විරුද්ධ පක්ෂ සාමාජිකයන් සහ ඔහුගේ පවුලේ සාමාජිකයන් දින දෙකකට පසු ඔහුව ජර්මනිය කරා ගෙන යෑමට කටයුතු කළහ.
ඔහුව රෝහල්ගත කිරීමෙන් දින දෙකකට පසුව එනම් පසුගිය සැප්තැම්බර් 2වැනිදා ජර්මනිය නිල වශයෙන් ප්‍රකාශ කර සිටයේ නවල්නිගේ සිරුරේ විෂ අන්තර්ගත වී ඇති බවට පැහැදිලි සාක්ෂි ලැබෙමින් පවතින බවයි.
එම විෂ වර්ගය ඔහුට ගුවන් යානයේදී ලබා දුන් තේ කෝප්පයට රහසේ එක් කර තිබෙන්නට ඇති බවද අනුමාන කෙරිණි.
ජර්මන් වෛද්‍යවරුන් පෙන්වා දී ඇත්තේ ඔහුට ලබා දී ඇත්තේ ස්නායු පද්ධතිය අක්‍රිය කරවන දරුණු විෂක් බවයි. එම විෂ මගින් ස්නායු පද්ධතියේ පණිවිඩ මොළයට ගෙන යෑම වළක්වන බව වෛද්‍යවරුන් පෙන්වා දී තිබේ.
පසුව මේ බව තහවුරු කර ගැනීම සඳහා ස්වාධීන රටවල් තුනකට නවල්නිගේ රුධිර සාම්පල් ජර්මනිය විසින් ලබා දී ඇති අතර, එම රටවල් තුන මගින් ලැබුණු වාර්තා ද විෂ ශරීරගත වීම තහවුරු කර තිබේ.
මේ වාර්තා ලැබීමත් සමඟම ජර්මන් චාන්සලර් ඇන්ජෙලා මර්කල්ගේ මාධ්‍ය ප්‍රකාශකවරයා ප්‍රකාශයක් නිකුත් කරමින් ‘ඇලෙක්සෙයි නවල්නිගේ ශරීරයට විෂ ඇතුළු වූයේ කෙසේදැයි පිළිගත හැකි පැහැදිලි කිරීමක් රුසියානු රජය විසින් වහාම ඉදිරිපත් කළ යුතුව ඇතැයි‘ පවසා සිටියේය. එමෙන්ම මේ සිදුවීම ජර්මන් රජය තරයේ හෙළා දකින බවද ඔහුගේ ප්‍රකාශයේ සඳහන් ව තිබේ.
කෙසේ වුවද ලෝකයේ හොඳම සෞඛ්‍ය සේවය පවතින ජර්මනියේ වෛද්‍යවරු පසුගිය සැප්තැම්බර් 10වනදා වන විට නවල්නි කෝමා තත්ත්වයෙන් මුදා ගැනීමට සමත්ව සිටියහ.
සැප්තැමිබර් 11වැනිදා වචන මගින් අදහස් හුවමාරු කර ගැනීමට තරම් හැකියාවක් නවල්නිට ලැබී ඇති බව වාර්තා විය. ඒ සමඟම ජර්මනියේ විදේශ බුද්ධි සේවය පවසා ඇත්තේ නවල්නිගේ සිරුරේ තිබුණු විෂ වර්ගය මේ දක්වා නිශ්චිතව හඳුනා ගැනීමට නොහැකි වී ඇති බවයි. එබැවින් එය අලුතින්ම නිපදවන ලද විෂ වර්ගයක් විය හැකි බවද ඔවුන් වැඩිදුරටත් ප්‍රකාශ කර තිබේ.
මේ අතර නවල්නිගේ පෞද්ගලික ආරක්ෂකයන් පවසා ඇත්තේ ඔහුට වස දී ඇත්තේ ගුවන් යානයට ගොඩවැදීමට පෙර බවයි.
ඔහු නවාතැන්ගෙන සිටි හෝටල් කාමරයේ තිබී සැකසහිත හිස් වතුර බෝතලයක් ඔවුන්ට හමුවී ඇති අතර එමගින් ඔහු ගුවන් යානයට යෑමට පෙර විෂ ශරීර ගත කරවන්නට ඇතැයි අනුමාන කර තිබේ.
කෙසේ වුවද ජර්මන් බලධාරීන් පසුගියදා ප්‍රකාශ කර සිටියේ මේ වන විට නවල්නි යළි රුසියාවට යා හැකි තරමට සුවපත්ව සිටින බවයි.
මේ අතර නවල්නිගේ සිදුවීම සම්බන්ධව පුටින්ගේ ආණ්ඩුවද ප්‍රතිචාර දක්වා තිබේ. නවල්නි ජර්මනිය කරා ගෙන ගිය අවස්ථාවේදී මොස්කව් හි මාධ්‍ය ප්‍රකාශක දිමිත්‍රි පෙස්කොව් පවසා ඇත්තේ නවල්නිගේ සිදුවීම සම්බන්ධව රජය පූර්ණ පරීක්ෂණයක් පවත්වනු ඇති බවයි. එසේ වුවද පුටින්ගේ තතු දන්නා වැඩි දෙනා පවසන්නේ නවල්නිගේ දිවි ගැලවෙන්නේ ඔහු වහාම ජර්මනිය කරා රැගෙන යෑමට ඔහුගේ පවුලේ සාමාජිකයන්ට හැකිවීමෙන් බවයි.
කෙසේ වුවද තොමස්ක් හි රෝහල් බලධාරීන් ප්‍රථමයෙන් නවල්නිගේ බිරියටද ඔහු අසලට යෑමට ඉඩ දී නැත. ඇය මොස්කව් සිට පැමිණ ඇත්තේ ඔවුන්ගේ පවුලේ වෛද්‍යවරියද සමඟිනි.
අවසානයේ ඔවුන්ට ‘කෝමා‘ තත්ත්වයේ පසුවන නවල්නි අසලට යෑමට අවස්ථාව ලැබී ඇත්තේ ඔවුන්ගේ විවාහ සහතිකය රෝහල් බලධාරීන්ට ඉදිරිපත් කළ පසුවය.
එමෙන්ම නවල්නි ජර්මනිය කරා ගෙන යෑමට තීරණය කළ විට රෝහල් බලධාරීන් එයට විරෝධය දක්වා ඇත්තේ ඔහු ඉවතට ගෙන යෑමට තරම් නිරෝගීව නොසිටින බව පවසමිනි. එහෙත් කෙසේ හෝ එම විරෝධතා නොතකමින් ඔහු ජර්මනිය කරා රැගෙන යෑමට ඔහුගේ පවුලේ සාමාජිකයන්ට සහ දේශපාලන ක්‍රියාකාරීන්ට හැකියාව ලැබී තිබේ.
වැඩි දෙනා පවසන්නේ නවල්නි දිගටම රුසියාවේ රැඳුණේ නම් ඔහුගේ දිවි නොගැලවෙනු ඇති බවය.
එසේ පැවසීමට සාධාරණ හේතු ඇත්තේ මීට පෙර විෂ ශරීර ගත වූ රුසියානු ප්‍රබලයන් රැසක් දිවි බේරා ගැනීමට අසමත් වූ නිසාවෙනි. එම ප්‍රබලයන් සියලු දෙනාට පාහේ පුටින්ගේ විරුද්ධවාදීන් වීමද පොදු සමානකමකි. උදාහරණ ලෙස සර්ජි සහ යුලියා ස්ක්‍රිපාල්, ඇලෙක්සැන්ඩර් ලිට්විනෙන්කෝ යනාදීන් දැක්විය හැකිය.
සර්ජි ස්ක්‍රිපාල් යනු රුසියාවේ හමුදා නිලධාරියකු වූ අතර ඔහු බ්‍රිතාන්‍ය සහ රුසියාව අතර ද්විත්ව ඔත්තුකරුවකු ලෙසද කටයුතු කර තිබේ. යුලියා ස්ක්‍රිපාල් යනු ඔහුගේ දියණියයි.
2018 මාර්තු මාසයේදී බ්‍රිතාන්‍යයේ සැලිස්බරි හිදී මේ දෙදෙනා විෂ කැවීමට ලක්වූ අතර එහිදීද ලබා දී තිබුණේ ස්නායු පද්ධතිය අඩපණ කරවන විෂ වර්ගයක් බව සොයා ගෙන තිබේ.
ඇලෙක්සැන්ඩර් ලිටිවිනෙන්කෝ ද එවැනිම රුසියානු බුද්ධි අංශවල සේවය කළ පුද්ගලයෙකි. අවසානයේ ඔහුටද කිසියම් පිරිසක් විසින් විෂ ශරීරගත කළ අතර ඔහු මියගියේ ඇතිවූ සංකූලතා හේතුවෙනි.
මීට අමතරව තවත් දේශපාලන ක්‍රියාකාරීන්, ඔත්තු සේවා සාමජිකයන් අභිරහස් ලෙස මියගිය අවස්ථා කිහිපයක්ම වාර්තා වන අතර, ඒ බොහෝ අවස්ථාවන්හිදී මියගිය පුද්ගලයන් පුටින්ගේ රජයට විරුද්ධව යම් රහස් ආරක්ෂා කළ අය හෝ දේශපාලන විරුද්ධවාදීන් බව හඳුනාගෙන තිබේ. කෙසේවුවද තම විරුද්ධවාදීන් ඉවත් කිරීමට විෂ භාවිත කිරීම සම්බන්ධව රුසියානු නායක ව්ලැඩිමිර් පුටින්ට ඇත්තේ කුප්‍රකට ඉතිහාසයකි.
ඒ අනුව ඇලෙක්සෙයි නවල්නි සම්බන්ධව පුටින් එම සුපුරුදු ක්‍රියාමාර්ගයම අනුගමනය කළාදැයි උපදින්නේ සාධාරණ සැකයකි.
