(කච්චතිව් සංචාරයෙන් පසු)
මීට වසර 111කට පමණ පෙර එනම් 1908 වසරේ දී ඉන්දියාවෙන් මුහුදු ගිය ධීවරයින් දෙදෙනෙක් තම ධීවර බෝට්ටුව සමඟ අනතුරකට පත් වූහ. මහ මුහුද මැද අතරමංවූ ඔවුහු කරකියාගත දෙයක් නොවූ තැන ශාන්ත අන්තෝනි මුනිඳු පිහිට පැතූහ. කෙසේ හෝ ගොඩබිමකට තමන් ආරක්ෂිතව ගෙන යන ලෙසත් එසේ යාමට ලදහොත් ගොඩබිම අසල ශාන්ත අන්තෝනි මුණිඳුන්ට පල්ලියක් සාදා දෙන බවටත් ඔවුහු මුණිඳුන්ට බාර වූහ.
පෙරළුණු ඔරුව බදා ගෙන සිටි මේ ධීවරයන් දෙදෙනා පාවී ගොස් දූපතකට සේන්දු වූහ. ඒ ඉන්දියාවත් ශ්‍රී ලංකාවත් අතර හරි මැදින්ම මෙන් පිහිටා ඇති මේ කච්චතිව් දූපතටය. ආපසු සියරට ගිය මේ ධීවරයෝ ධීවරයින්ටත් සියලු ඥාතීන්ටත් මේ විස්තරය පැවසූහ. තම ජීවිත ගැලවුණේ ශාන්ත අන්තෝනි මුනිඳුන් නිසා බව ඇදහූ ඔවුහු තම ඥාති මිත්‍රාදීන්ද හවුල් කරගෙන යළි දූපතට පැමිණ ඔවුහු මුනිදුන් උදෙසා දේවස්ථානයක් ඉදි කළහ. කච්චතිව් ශාන්ත අන්තෝනි මුනිඳුන්ගේ දේවස්ථානය යනුවෙන් හඳුන්වා එදා සිට මහත් භක්තියෙන් යුක්තව කිතුණු බැතිමතුන්ගේ වන්දනයට පත් වූයේ ඒ දේවස්ථානයයි.
මේ දූපත ඉන්දියාවේ සිට පැමිණි ධීවරයින් විවේක ගන්නා ස්ථානයක් ලෙස භාවිත කිරීම හැරෙන්නට ඉන් එහාට ඒ ගැන කතාවක් ඇති නොවීය. එහෙත් බ්‍රිතාන්‍ය පාලන සමයේ ලද නිදහස් බවක් නිසා උතුරේ ධීවරයින්ට තම දැල් ආම්පන්න සකසා ගැනීමට මෙන්ම විවේක ගන්නට මේ දූපත උපකාරී විය.
‘කච්චතිවු‘ යන නමින් හැඳින්වූ එම දූපත හරහා මාධ්‍යයට පුවත් මැවෙන්නට වූයේ එම දූපතේ පවත්වන්නට යෙදුණු ආගමික මංගල්‍යය නිසාය.
මේ දූපත සම්බන්ධ ශත වර්ෂයක අතීත කතාව එසේ වුවත් මෑත කාලීන කතාවක් ගැනද අපට පවසන්නට තිබේ.
ඒ හිටපු නාවික හමුදාපති වත්මන් ආරක්ෂක මාණ්ඩලික ප්‍රධානී අද්මිරාල් රවීන්ද්‍ර විජේගුණරත්න මහතා හා සම්බන්ධ සිදුවීමක් ගැනය. මීට වසර 30කට පමණ පෙර ත්‍රස්තවාදී යුද සමයේ ඔහු ගමන් ගත් බෝට්ටුව මුහුද මැදදී පෙරැළී ගියේය. පැය 17ක් පමණ මහ සයුරේ දිවි සටනක යෙදී ඔහුද පැමිණ ඇත්තේද කච්චතිව් දූපතටයි.
ඔහුද එදා තමන්ට දිවි රැක ගැන්මට උරදුන් මේ දූපතට දක්වන්නේ මහත් ගෞරවයකි.
වර්ග කිලෝමීටර් 1.15ක කුඩා බිම් වපසරියක් ඇති ශ්‍රී ලංකාවේ උතුරු කොනේ ඉන්දියාවේ රාමේශ්වරම් හි ප්‍රදීපස්ථම්භය පෙනෙන මානයක මේ දූපත පිහිටියේය. වසර පුරාම හුදෙකලාවේ පසුවී සතියකට ආසන්න කාලසීමාවක් ලොව පුරා අවධානයට යොමු වන්නේ දූපතේ පැවැත්වෙන ශාන්ත අන්තෝනි මුනිඳුන්ගේ මංගල්‍යය නිසාය. කච්චතිවු දූපත ජනශූන්‍යය. එහෙත් වසරේ දින දෙක තුනක් තුළ එතැනට දස දහසකට ආසන්න පිරිසක් පැමිණෙති.
යාපන අර්ධද්වීපයට ආසන්න ඩෙල්ෆ්ට් දූපතේ සිට කිලෝමීටර් 20ක් පමණ දුරකින් පිහිටි එමෙන්ම කන්කසන්තුරය වරායේ සිට කිලෝමීටර් 90ක් ඈතින් පිහිටි කච්චතිවු ඉතිහාසයට එක්වන්නේ එහි ඇති දෙව්මැඳුර කේන්ද්‍ර කොටගෙනය. ශාන්ත අන්තෝනි මුනිවරයා වෙනුවෙන් කැප කර ඉදි වූ දෙව්මැඳුරු බිමේ එම මුනිවරයා සිහිපත් කරමින් වාර්ෂිකව මංගල්‍යය උළෙලක් පෙබරවාරි මස අග හෝ මාර්තු මස මුල් සතිවල සිදු කෙරේ. මේ මංගල්‍යය උත්කර්ෂවත් උලෙළක් බවට පත් කරමින් වෙනත් දෙව්මැදුරක සිදු කෙරෙන මංගල්‍ය උළෙලක අසිරියම ලබාදීමට වසර ගණනාවක් පුරාම ඉදිරිපත්ව සිටින්නේ ශ්‍රී ලංකා නාවික හමුදාවයි.
මේ මංගල්‍යයට ඉන්දියාවෙන්ද බැතිමතුන් පැමිණීම විශේෂිතය. මෙරට පැවැත්වෙන ආගමික උත්සවයකට ඉන්දියාවෙන් බැතිමතුන් පැමිණෙන එකම අවස්ථාව වන්නේද කච්චතිව් මංගල්‍යයි. එසේ පැමිණෙන සියලු බැතිමතුන් වෙනුවෙන් අවශ්‍ය සියලුම පහසුකම් සපයා දෙන්නට නාවික හමුදාව කටයුතු කරයි.
මෙවර කච්චතිවු මංගල්‍යය පැවැත්වුණේ පසුගිය 16 වැනිදා පෙරවරුවේය. දිව්‍ය යාගය පැවැත්වූ යාපනය පදවි අනුනායක ජස්ටින් ඥානප්‍රභාසම් හිමිපාණන් පවසා සිටියේ මෙය වසරකට එක්වරක් හිමිවෙන දුර්ලභ අවස්ථාවක් බවයි. එමෙන්ම ජාති, ආගම්, භාෂා භේද නොමැතිව එකාවන්ව දහස් ගණනක දේශීය ජන සහභාගීත්වය අගය කරන බව හා ඔවුනට දේවාසිරි සමඟ කෘතඥතාව පිරිනමන බවයි.
කච්චතිවු දූපතට යන ගමනද ලෙහෙසි පහසු නොවේ. කච්චතිවු දූපතේ ජල පොදක් හෝ නැත. යාපනය අර්ධද්වීපයේ සිට වතුර බෝතලයේ පටන් ආහාරපාන කොට්ට මෙට්ට ඇඳ ඇතිරිලි මෙන්ම මඩු, කූඩාරම්, වැසිකිළි නොඅඩුවමත් නොමිලේත් සපයමින් නාවික හමුදාව ඉටු කරන්නේ අනුපමේය මෙහෙවරකි.
උදෑසන සිටම ශබ්ද විකාශන හරහා ගීතිකා හඬ දූපත පුරා සැරිසරයි. පෙරවරු 7.00ට පමණ දේව මෙහෙය ඇරඹිණි. සියලු වතාවත් සමඟ පැය දෙකක් පුරා මෙහෙය ඉටු කෙරුණේ යාපන පදවි අනුනාහිමි ප්‍රධාන ඩෙල්ෆ්ට් දුපත හා යාපනයේ විවිධ ප්‍රදේශවල මීසම්පතිවරුන්ගේ ප්‍රධානත්වයෙනි.
දේවස්ථානයේ දෙවියන් ඉඳිරියේ වැඳ වැටුණු දහස් ගණන් බැතිමත්තු ප්‍රතිඋත්තර දීමෙන් පූජාවට හවුල් වූහ. ආරක්ෂක මාණ්ඩලික ප්‍රධානී රවීන්ද්‍ර විජේගුණරත්න, නාවික වයිස් අද්මිරාල් පියල් ද සිල්වා, උතුරු පළාත් භාර නාවික ආඥාපති රියර් අද්මිරාල් මෙරිල් වික්‍රමසිංහ ඇතුළු නිලධාරීහු රැසක් මේ අවස්ථාවට සහභාගි වූහ.
යුද්ධය නිසා අඩපණව තිබූ නමුත් 2009 වසරේ සුළුවෙන් ආරම්භ කළ මේ මංගල්‍යය 2010 වසරේ සිට ජාතික උත්සවයකට සමාන ආකාරයෙන් පවත්වනු ලැබේ. මුහුද මැද තිබෙන දූපතක පැවැත්වෙන මංගල්‍යයක් වන හෙයින් එහි ගමන් කිරීම පහසු නොවේ. ඒ සඳහා මුහුදු මාර්ගයම භාවිත කළ යුතුය. නාවික හමුදාව ඒ සඳහා සියලු උපකාර සලසනු ලැබේ. එපමණක් නොව වසර සියයකටත් අධික පැරැණි පල්ලිය වෙනුවට නව පල්ලියක් තැනීමටත් නාවික හමුදාව කටයුතු යෙදීය. ඒ පසුගිය 2017 වසරේදීය. නාවික හමුදා ශ්‍රම දායකත්වයෙන් නාවික හමුදා බෞද්ධ සංගමයේ ප්‍රතිපාදන මත එම පල්ලිය ගොඩ නංවා තිබේ.
කච්චතිව් එක් දිනක් පමණක් පොලිසිය, ආගමන හා විගමන දෙපාර්තමේන්තුව, බැංකු, රෝහල් මෙන්ම අධිකරණයක් වෙළෙද කුටි පවතින ස්ථානයකි. එවන් වෙනත් ආගමික ස්ථානයක් මෙරට කිසිදු ස්ථානයක නොමැත. ඉන්දියාවෙන් පැමිණෙන බැතිමතුන් දූපතේ තුත්තිරි ගස් පවා ගලවාගෙන යන්නේ ඉමහත් වූ භක්තියකින් යුතුවය.
කච්චතිවු මංගල්‍යය පැවැත්වෙන දිනවල දිනක ජල අවශ්‍යතාව සඳහා ජලය ලීටර් ලක්ෂ පහක් නිරතුරුව දූපතේ රඳවා තබා ගන්නට කටයුතු කරන බව නාවික හමුදාපති වයිස් අද්මිරාල් පියල් ද සිල්වා මහතා එහිදී පැවසීය.
“බැතිමතුන් 8000ත් 10000ත් අතර පිරිසක් පැමිණෙතැයි අපි අපේක්ෂා කළා. බැතිමතුන් 8500ක පමණ පිරිසක් පැමිණියා. ඉන් 2500කට අධික පිරිසක් ඉන්දියාවෙන් පැමිණි අය. ඔවුනට අවශ්‍ය සියලු පහසුකම් අපි ලබා දුන්නා. 15 වැනිදා රාත්‍රී නවාතැන් ගෙන සිටි අය වෙනුවෙන් රාත්‍රී ආහාර, සහ 16 වැනිදා උදෑසන ආහාරයත් අපි ලබා දුන්නා. එමෙන්ම සියලු සනීපාරක්ෂක පහසුකම් මෙන්ම ජලපහසුකම් ද සියලු අවශ්‍යතාද සැපයුවා.
බැතිමතුන් 8000කට සරිලන ආහාර පාන සකස් කිරීම පහසු කාර්යයක් නෙමෙයි. ඒත් නාවික හමුදාවේ නිලධාරීන් හා සෙසු නිලයන් 500ක් පමණ සතියකට පමණ පෙර සිට මේ කාර්යයේ නියැළී සිටියා.”
යාපනය දිසාපතිවරයා විසින් මිලියන 5ක මුදලක් මේ කටයුතු වෙනුවෙන් නාවික හමුදාවට ලබා දී තිබුණද නාවික හමුදවේ යාත්‍රා හා කැපවීම නොවන්නට මේ කාර්යයන් සිදු කිරීම කිසිසේත්ම කළ නොහැකි වනු ඇත.
ඉන්දු ලංකා සහෝදරත්වය මෙන්ම ජාති ආගම් කුල භේද සියල්ල නොසලකා පවත්වනු ලබන කච්චතිවු මංගල්‍යය එක රටක පමණක් නොව රටවල් දෙකක් අතර සුහතාව හා ජාතීන් හා ආගම් අතර සුහදතාවත් වර්ධනය කරනු ලබන සංහිඳියාවේ තෝතැන්නකි.
සේයා රූ -ගයාන් පුෂ්පික
