එක්තරා ධන කුවේරයෙක් සෙන්ගායි තුමා හමු වී තම පරපුරට වාසනාව පිණිස හේතුවන ශ්‍රේෂ්ඨ ප්‍රකාශයක් ලියා දෙන ලෙස ඉල්ලීය. එය පරම්පරාවේ වස්තුවක් ලෙසින් සැලකෙන්නට සලස්වන බවද පැවසීය. විසල් කඩදාසියක් ගත් සෙන්ගායි එහි මෙය සටහන් කළේය.
‘පියා මැරේ. පුතා මැරේ. මුනුපුරා මැරේ.’
ධන කුවේරයාට කේන්ති ගියේය. “මං කිව්වෙ අපේ පවුලේ සන්තෝෂයට හේතුවන ශ්‍රේෂ්ඨ ප්‍රකාශනයක් ලියන්න කියලයි. තමුන්නාන්සේ මොකක්ද මේ ලියපු විහිළුව?”
ලියූ දේ පැහැදිලි කළ සෙන්ගායි, “මෙතැන කිසිම විහිළුවක් නෑ. ඔබට කලින් ඔබේ පුතා මළොත් එය ඔබට විශාල දුකක්. එසේම ඔබේ මුනුපුරා ඔබේ පුතාට පෙර මළොත් ඔබ දෙදෙනාටම එය ඉවසන්න නොහැකි වේදනාවක්. ඉතින් ඔබේ පවුලේ හැම පරපුරෙහිම මරණ මා ලියූ අනුපිළිවෙළට සිදුවූවොත් එය මරණය පිළිබඳ කිසියම් ස්වභාවික ක්‍රමයක්. අන්න එහෙම සිද්ධ වෙනවට තමයි නියම වාසනාව කියලා මං කියන්නේ.”
(උපුටා ගැනීම:- ජපන් සෙන් කතාවක් ඇසුරෙනි.)
ආර්.එම්. සශ්මික ප්‍රභාස්වර
6 ශ්‍රේණිය ‘එච්’,
ඩී.එස්. සේනානායක විද්‍යාලය,
කොළඹ 07.
