පීටර් විජේසිංහ යනු අපගේ සංස්කෘතික උරුමයන් අතර ජනකවි හා ජනශ්‍රැති පිළිබඳව සොයා බලා ඒවා අධ්‍යයනය කොට පොත් පත් මඟින් සමාජයට ඉදිරිපත් කළ ලේඛකයෙකි. අද සමාජයේ ඔහු ගැන වැඩි කථිකාවක් නොවුණත් මාර්ටින් වික්‍රමසිංහ, පියසේන නිශ්ශංක, මීමන ප්‍රේමතිලක හා ජී.බී. දිසානායක යන අය ඔහුගේ සමකාලීනයෝ වුහ.
වෘත්තියෙන් ඉංග්‍රීසි ගුරුවරයෙකු වූ ඔහු 1925 සිට 1948 දක්වා ලේක්හවුස් ආයතනයේ දිනමිණ, සිළුමිණ, උපකර්තෘ ලෙසද, 1948 ප්‍රධාන භාෂා පරිවර්තක ලෙස රජයේ ප්‍රවෘත්ති දෙපාර්තමේන්තුවේද, 1970 දී බුදුසරණ පුවත්පතේ කර්තෘ ලෙසද කටයුතු කර ඇත. 1982 දී ශ්‍රී ලංකා ජනශ්‍රැති, ජනකතා හා ජනකවි ලියු අත් පිටපත් 65 ක් පමණ සම්පාදනය කර ඇත. ඒවා දැනට ජාතික පුස්තකාලයේ තැන්පත් කර ඇති බව සඳහන් වේ.
රජයේ ප්‍රවෘත්ති දෙපාර්තමේන්තුව මඟින් ප්‍රකාශිත ශ්‍රී ලංකා සඟරාවේ සංස්කාරකවරයාද ඔහු විය. එයට ඔහු විසින් සපයන ලද ලිපි මාලාවෙන් තෝරා ගත් ලිපි එකතුවකින් “පැරණි සිංහල ජීවිත පුවත්” නමින් පිටු 555 කින් යුත් කෘතියක් ඔහු මිය ගිය පසු ඔහුගේ දියණිය විසින් සම්පාදනය කර ඇත. අපගේ සංස්කෘතීන් හා සාහිත්‍යය පිළිබඳ සොයා යන අයට එය මනා පිටිවහලක් වනු ඇත.
අප්‍රකට ජන කවි හා ජන සිරිත් විරිත් අකුරු කොට තබා ඔහු දිවියෙන් සමුගෙන ඇත්තේ 1986 මෙවැනි පෙබරවාරි මසක 13 වන දිනදීය. සාමාන්‍ය පොදු වහරේ නොමැති අප්‍රකට අපගේම දේවල් සොයා යමින් කළ මහඟු සේවය අද වැනි දිනක ඇගයිය යුතුමය.
(තොරතුරු පොත්පත් ඇසුරෙනි.)
අමීරා හමීඩ්
8 ශ්‍රේණිය ‘ඩී’,
යසෝදරා විද්‍යාලය, කොළඹ 08.
