සීගිරි අප්සරාවියේ
සිරිබර සිරි සීගිරි පුර දෙරණේ
සොඳුරු කලා සිත ඔප කළ නීල පීත ලඳුනේ
ලොවක් මනබැඳ ලීලෝපේත රූ
හැඟුම් මත පඬු පෙවූ නුඹ
අඳුරු බිඳ හෙළි සේ ගිරි රළු පව් මත දිලෙනා
රූ බර අප්සරාවියේ...
දිගු නීල නයන කැලුම් සිත් වස‍ඟේ රඳනා
සුරගි උපුල් හිස දෑත සරසා
ලඹ සවන්පත් කසුන් තෝඩු ගවසා රුවිනා
ලකල් උරසිජ බඳ රන් ළය මත
කලා රසය විකසිත කළ හෙළ ලඳුනේ
රූ බර අප්සරාවියේ...
එදා කසුප් නිරිඳු නුරාවෙන් මන බැඳ
සීගිරි පවුමත නුඹේ රුව සරසන්න ඇති
සත සහස්‍ර සිත් නුඹට මනාපෙන්
කැටපත් පවුරේ ගී ලියන්න ඇති
මගේ සිතත් නුඹේ රුවට පෙම්බදිනවා ලඳණේ
රූ බර අප්සරාවියේ...
චමින්ද බණ්ඩාර පියසේකර
ඔබ නැති මෙලොව...
සුදු පැහැ මලින් පිරි
තුරු වියන යටින්
හෝරා කිහිපයක්
විවේක සුව විඳිමින්
අපි නිසොල්මනේ වැතිරුණෙමු
මට පෙර ඔබ
ගිලිහුණු මල් පෙතිවලින්
මුළුමනින්ම වැසී අතුරුදන් විය
සුපෙම්වත
ඔබ නැති මෙලොවක
තනිව කොහේ දිවි ගෙවම්දෝයි
ප්‍රථම වරට මට සියුම් බියක් ඉපදිණි
ගංගා වරුෂවිතාන
මල හිමි නොවිය ගසටත්
අහසක් තරම් සුවිසල්
පැතුමක් අරන් ආවත්
කඳුළැල් තියා සිහිලැල්
නපුරයි වෙන්ව යාමත්..
අඳුරුම අහස සරසා
සොඳුරුම තරුව වේ මැයි
කෙඳුරුව කනට ළං වී
ඔබමද ගියේ වෙන් වී...
හඳුනා මලක් අලුයම
රඳවා මතක සුවඳක්
හඬවා මනස සුසුමින්
නොකියා ගියේ ඇයි දැන්...
මලකින් උරුම සතුටත්
නොලැබම සුවඳ පොදකුත්
සිඹිනට වුණේ නටුවක්
මල හිමි නොවිය ගසටත්...
තිලක් ඒකනායක
හිඟන්නාගේ ප්‍රේමය
යැදීමි සිඟමන්
ඉල්ලා ප්‍රේමයක්
ගුවන් පාලමේ පඩිපෙළ පාමුල...
යන එන්ෙනා් බොහෝය
මේ පුරුදු මාවතේ
මා දෙස බලා
රුපියලක් දෙකක් විසි කර...
අහෝ සුන්දර ප්‍රේමය
නුඹ සිටිනුයේ ප්‍රේමය
නුඹ සිටිනුයේ කොහිද
මා තනිකර මාවතේ
අව්වට පිච්චෙන්නට
වැස්සට තෙමෙන්නට...
යදිනුයේ කාසි නොව මම
විසල් වූ ප්‍රේමයකි
මා ළය පුරවාලන...
එහෙත් ලැබෙනුයේ මා හට
රුපියල් ශත ප්‍රේමයකි
එනමුත් දුටිමි මම
මගෙම වූ ප්‍රේමය
වෙනෙකකුට හිමිව
මා අසලින් පිය මනින
මට ද රුපියලක් විසිකොට...
චතූ හේරත්
දමිළ සොයුර
මිහිරි වූ පිය තෙපුලෙන්
උපමා උපමේය යොදමින්
මුඛරිව බුහුටි විලසින්ඔබ මගේ මවුබස
වහරන මහිම දුටු විට
හෙළ බස ගැන අබිමනින්
උදම් විණි මාගේ සිත...
එහෙත් එසැණින් එම සිත
විළියෙන් මුකුලිතව
ඔබේ ගරු මවුබස
වහරනු නොහැක මා හට...
එම්. චන්ද්‍රපාල
මොහොතක්
සඳයි සඳ මඩල
ඔබයි අප දෙදෙන
කඳුළයි සුසුමයි අතර
හිඩැසකි සැමදාම...
පිපෙන කෞමදියක සුවඳ
දැනෙන්නේ සන රෑට
නුඹට පමණයි මේ රහස
දෑස් අඩවන් කරගන්න...
මිහිරි සිහිනෙක පටලන්න
එපා මා ළං කරගන්න
ඔබේ උණුසුමේ ඉන්න
මොහොතකට මට ඉඩ දෙන්න...
මේදනී මැණික්කුඹුර
වියෝව
පතා ආ ලෙස දසක තුනකට අධික විය බැඳී සොඳුරු ප්‍රේමය
ගොතා කෙළිලොල් වදන් මිහිරිය බෙදාගත් හැටි සතුට සාමය
හිතාගන්නට නොහැකි හිතවත ඔබව ගෙන ගිය මරුගෙ යාමය
පතා මොක්සුව සිහිකරමි නිති 'ඇතා' යන අන්වර්ථ නාමය
කේ.කේ.ඒ. ජයකොඩි
සුගන්ධවත් මතකය
අශෝකා ඔබෙ සුවඳ දැනෙනවා මට මෙතැන
මීදුමයි සීතලයි පාළු මේ ගිරි මුදුන
මා අතැර ඔබ ගියෙන් අතරමඟ මංසලක
මීදුමයි සීතලයි පාළු මේ ගිරි මුදුන
මිලින වූ මලෙක පෙති කඳු අතර පා වෙලා
පහළ කඳු නිම්නයේ තණ බිමක වැතිරිලා
බොහෝ උස් තැනෙක හිඳ එදෙස බලනා මෙසඳ
සුගන්ධය දැනෙයි මට ඇතුළු ගැබ රැඳි එසඳ
පා වෙනා සුදු වලා මා සිරස අද්දරින්
පරම සැප කියා දෙයි සැහැල්ලුව පාවෙමින්
සුගන්ධය පිස දමා නැවත නොඑනා ලෙසින්
ඒ වලා සමඟ මට යා හැකිද ඒ ලෙසින්
සුදත් ගාමිණී බණ්ඩාර
පැංචියේ
පියුමකි මවුනි ඔබ පත්තිනි වූ බැවිනා
සත් පත්තිනි වෙමින් එහි පෙති සේ දිලෙනා
රැක දෙන ළඳුන් ලොව හැම තැන වෙසෙනා
බාරයි නුඹට මගෙ දූ-දුරු රට හිඳිනා
ගලා හැලෙන තුහිනය වාසනාවන්
හිරි ගඩු පිපෙන සීතල නොම දැනීයන්
සැඟවෙන හිරුගෙ රැස් නුඹ වෙත ඇඳීයන්
පත්තිනි මවුනි මගෙ දූ රැක බලාපන්
අහසකි පතිට පැතුමක් නුඹ වෙත රැඳුණු
සහසකි හැඟුම් මවගේ සිත තුළ එතුණු
තව සති ඇතිද හැමදාමත් හද බැඳුණු
වෙහෙසකි දුවණි හෙට මවු පදවිය ලබනු
බුද්ධ ජේසු අල්ලා ශිව බිහි වූ ලෙසින
පුතකු කුසේ දරමින් නුඹ ඇත තුටින
අඳුර නිවා ලෝ දල්වන නැණ පහන
තිළිණ කරන් පිය පදවිය ලෝ දිනන
චම්මින්ද වෙලගෙදර
මගේ පෙම් ලිහිණියේ
වැහි බීරම පිපෙයි දසත
වලා පෙති විදා ගුවනත
දෙගොඩ තළා ගොඩ ගලන මීදුම
මං සොයයි ලිහිණි පෙරහරක
කඳු පෙදෙසක ඈත හිමක
වන අරණෙක දිය ඌලක
ස්වර ගිගුම් නද ඇසෙයි සියුම්
මධු ලෝල බිඟු කැල
ගී ගයති පෙරහුරුවට
ඇරියුම් ලැබ තුටින්
සාද වැසි වස්සානයට
මගේ පෙම් ලිහිණියේ ඉදින්
තුරුල් වෙලා පිය නඟමු අපි
වැහි තුරල් වන තුරු නොඉඳ
ඉදින් තෙමුණාවෙ
මේ වැහි පෙම් සිතට ඔසුවක් නම්
අර පේන පොල් අතු ගෙපැල
ඒ මගේ කුටියයි නුඹ රැගෙන යන
නොසිතන්න මේ මොහොතෙ
තැන තැන තබන දිය බඳුන් ගැන
පා ඇඟිලි තුඩුවලින් යනෙන හැටි ගැන
ඉදින් තෙමුණාවෙ
මේ මොහොත පමණක් සිතන්න
මෘදු හාදු මතක සැමරුම්
දිය වෙද්දෙන් මේ වැස්සෙ ම
ඉදින් තෙමුණාවෙ ඇති තරම් මේ මොහොතෙ...
මේ මොහොත පමණක් සිතන්න
නිමල් ජයරත්න
මෝඩ දිනයෙක
සොඳුරු මතකය
අදින් හරියටම
පෙරාතුව සත් විසි වසරකට,
දුටිමි ඔබ මුල්වරට,
මෝඩයාගේ දිනයෙක අද වැනිම...
සිත් බැඳණේත්,
වහ වැටුණේත්,
පෙම් බැන්දේත්...
ඒ මෝඩ දිනයේම...
මෝඩ වූයේ ඔබ දැයි...
නොඑසේ නම් මා දැයි...
තවම නොදනිමි
මෝඩකම කරපින්නා
ආදරය කෙරුණේද...
ආදරය කරපින්නා
මෝඩකම් පෑවේද...
දන්නේ ඔබම පමණි...
ඒ මෝඩ දිනයේදී....
ඔබව දුටු සේම...
ආදරය පෑ සේම...
ඔබ වෙතට ළං වී..
ජීවිතය ගෙවු සේම...
තවදුරට.. පණ මෙන්ම...
ආදරය කරමි මම...
එදා ළඟ සිටි මෝඩයා විලසින්ම...
නලීන් දිසානායක
පාසලින් නෙරපූ ශිෂ්‍යයකු කී කවිය
ළෙහි කරුණා නොමැත්
ඇදුරු බස් නිති පිළිගත්
විදුහල්පතිතුමනි පැණවත්
අපව නෙරපා දැමූ සිරිමත්
අදැමි අප වනසා
හොඳ ළමුන් සනසා
දැයට සෙත සලසා
සැරද විදු මවු වසර සහසා!
තිස්ස නිහාල් වික්‍රමසිංහ
එතෙර කවිය
සියල්ලම දිනීම හෝ
කිසිවක්ම නොලැබීම
All or Nothing
සියල්ලම දිනීම හෝ කිසිවක්ම නොලැබීම
අවසන් තරගය, අවසන් තීරණය
සියල්ලෙන්ම අවමානය හෝ සියල්ලෙන්ම වාසනාව
වැටෙමි, නැතහොත් ඉහළින්ම නැ‍ඟෙමි
සියල්ලම දිනීම හෝ කිසිවක්ම නොලැබීම
නැත අතරමැද සම්මුති මෙවර
නැත, නැතහොත් පරදිමි
තේරීම් නොමැත මට
සියල්ලම දිනීම හෝ කිසිවක්ම නොලැබීම
අවසන් සටන
පරදී සියල් නිරයන්, මේ උමතු සෙවිල්ලේ
නැත අමතර කාලයන්
නැත නැවතීම්, නැත විවේකයන්
සියල්ලට දිනීම හෝ කිසිවක්ම නොලැබීම
දිනුම්කරු ලෙස එමි
නැතොත් සටනින් මියෙමි
මේ මොහොත හා
එහි බලවත්බව, තියුණුබව, උද්වේගය
ගහනත්වය, භක්තිය ගරු කරනු ඇත මට
නොහඬන්න, මරණය පැමිණ ගෙන ගියොත් මා
ඉඩ හරින්න ඉටිපහන් සිලට, බුහුමන් දක්වන්නට මට
නොහඬන්න, අද රැයේ
ආපසු නොආවොත් නිවහනට මා
සිද්ධාර්ත් ආනන්ද් - ඉන්දියාව
මේ නිර්මාණය, කවියකුගේ සංකල්පනීය හෝ පරිකල්පනීය හෝ රචනයක් ලෙස හඳුනාගත හැකිය. මෙහි කියැවෙන්නේ නිශ්චිත කරුණක් පිළිබඳ යම් පුද්ගල මනසක නැ‍ඟෙන භාවයන් පෙළකි. ඒ පුද්ගලයා යම් තීරණාත්මක මොහොතකට, කාරණයකට සම්මුඛ වී ඇතුවා විය හැකිය. ඔහු / ඇය එයට මුහුණ දෙන්නට සිතන ආකාරය කවියට නැඟී ඇත. ඒ ආකාරයෙන් යම් නීරසබවත්, නිබයබවත් හා දිරිමත්බවත් දිස් වේ. ප්‍රතිඵලය මරණය වුවද, ඔහුට / ඇයට කම්පාවක් නැති සේ පෙනේ. මුහුණ දීම හා සටන් කිරීමම වැදගත් බව ඔහු / ඇය සිතන සේය.
දිල්ලි විශ්වවිද්‍යාලයෙන් උපාධියක් ලබා ඇති සිද්ධාර්ත් ආනන්ද් කවියා, විවිධ වන උනන්දුන් හා වි‍නෝදාංශයන් සහිත කෙනෙකි. පද්‍ය නිර්මාණ 150ක කෘතියක් පළ කර ඇති ඔහු චිත්‍ර ශිල්පියෙක්ද වෙයි. ඔහුගේ අමූර්ත කලා නිර්මාණ (abstract arts) ඔහුගේ වෙබ් අඩවියෙන් දැකගනු හැකිය. නිරූපණ ශිල්පියකු මෙන්ම කටහඬ හා උච්චාරණය පිළිබඳ උපදේශකයකු ලෙසද කටයුතු කරන සිද්ධාර්ත් සංගීත වීඩියෝවක්ද නිකුත් කර ඇත.
පරිවර්තනය - දේ. වි. ගාල්ලගේ
