කෝවිඩ් - 19 හෙවත් කොරෝනා වයිරසය මේ වන විට තම ලෝක ව්‍යප්තිය අරඹා තිබේ. ලෝක සෞඛ්‍ය සංවිධානය මීට පෙර අනතුරු අඟවා සිටියේ මේ අවස්ථාව සම්බන්ධයෙනි. මේ දක්වා චීනයෙන් බැහැරව රෝගය වාර්තා වූ සෑම අවස්ථාවකදීම චීනය හා සම්බන්ධයක් දක්නට ලැබිණි. එනම් චීනයෙන් අදාළ රටේ සංචාරය කළ අයෙකු හෝ චීනයේ සංචාරයේ යෙදුණු අයෙකු යනාදී වශයෙනි. එහෙත් මේ වන විට චීනයේ සම්බන්ධයකින් තොරව රටවල් රැසක කෝවිඩ් - 19 පැතිර යමින් තිබේ. එය වඩා භයානක තත්ත්වයක් ලෙස හැඳින්විය හැකිය.
මේ වන විට චීනයේ අසල්වැසි දකුණු කොරියාව කෝවිඩ් - 19 හේතුවෙන් වඩා බරපතල අවස්ථාවකට මුහුණ දෙමින් සිටී. දිනෙන් දින දකුණු කොරියාවෙන් වාර්තා වෙන රෝගීන් ප්‍රමාණය අධික වෙමින් තිබේ. පසුගිය බ්‍රහස්පතින්දා උදෑසන වන විට දකුණු කොරියාවෙන් වාර්තා වූ සමස්ත රෝගීන් සංඛ්‍යාව 1596ක් විය. එදින උදෑසන පමණක් රෝගීන 300කට අධික සංඛ්‍යාවක් වාර්තා වී තිබිණි. මේ අනුව දකුණු කොරියාව තුළ රෝගය පාලනයකින් තොරව ව්‍යප්ත වෙමින් පවතින බව පැහැදිලිවේ. දකුණු කොරියානු ජනතාව රජයට චෝදනා කරමින් සිටින්නේ රෝගය පාලනය සඳහා සෑහීමකට පත් විය හැකි වැඩපිළිවෙළක් රජය මගින් දියත් නොකරන බව ප්‍රකාශ කරමිනි. කෙසේ වුවද කෝවිඩ් - 19 පාලනය කිරීමෙන් පසුව වුවද සමස්ත ලෝකයටම දරුණු ආර්ථීක අර්බූදයක පැටලීමට සිදුවන බව නම් පැහැදිලිය.
මේ අතර වයිරසය මුලින්ම වාර්තා වූ චීනය කිසියම් සුභදායී මට්ටමකට පැමිණෙමින් සිටින බවට පෙරමග ලකුණු දිස්වෙමින් තිබේ. මේ වන විට දිනකදී වාර්තා වන රෝගීන් සංඛ්‍යාව පන්සියයක් පමණ අඩු අගයක් ගන්නා අතර මරණ සංඛ්‍යාවද අඩු වෙමින් පවතී. වූහාන් නගරය පිහිටා ඇති හුබෙයි ප්‍රාන්තයේ හැර චීනයට අයත් සෙසු ප්‍රදේශවල අවම රෝගීන් සංඛ්‍යාවක් වාර්තා වෙමින් තිබේ.
එහෙත් රෝගීන් අවම ප්‍රතිකාරවලින් පසු රෝහල්වලින් නිවෙස් කරා එවීම හේතුවෙන් වඩා අයහපත් ප්‍රතිඵල අත්විය හැකි බවට බිය පළ වෙමින් තිබේ. රෝගය නිව්මෝනියාව දක්වා වර්ධනය නොවූ රෝගීන් දින දාහතරක ප්‍රතිජීවක ලබා දීමෙන් පසු නිවෙස් වෙත එවමින් සිටින බවටද වාර්තා ලැබේ. මෙය රෝගීන් වඩා බරපතළ තත්ත්වයකට ඇද දැමීමට සමත් බව වාර්තා වේ.
රෝගීන් වාර්තා වීම අඩු වෙමින් තිබුණද එසේ වන්නේ ඖෂධ හේතුවෙන් නොව කාලානුරූපව සිදු වන ඔරොත්තු දීමේ හැකියාව වර්ධනය වීම හේතුවෙන් යැයි සරලව පැවසිය හැකිය. එයද සතුටුවිය හැකි තත්ත්වයක් නොවේ. සැබවින්ම එය රෝගය පාලනය කිරීමක් ලෙස දැක්විය නොහැකිය.
කෙසේ වුවද කෝවිඩ් හේතුවෙන් චීනයේ ආර්ථික දේශපාලන අනාගතය ඉතා ප්‍රබල ගැටලු රැසකට මුහුණ දෙනු ඇති බව නම් නිසැකය. එසේ වුවද චීනය යනු ඕනෑම අවස්ථාවකට මුහුණ දීමට සහ ජයග්‍රහණය කිරීමට තරම් ශක්තියක් සහිත රටක් බවද අමතක කළ යුතු නැත.
මැද පෙරදිග කලාපයද මේ වන විට කෝවිඩ් - 19 හේතුවෙන් අර්බූදයට ලක් වී සිටින අතර ඒ සඳහා අලුතෙන්ම එක්ව සිටින රට වන්නේ සවුදි අරාබියයි. මුස්ලිම් ජාතිකයන්ගේ ආගමික වන්දවා සිදුවන මක්කම සහ මදීනා කරා වන්දනාවට පැමිණෙන බැතිමතුන්ට වීසා ලබා නොදීමට සවුදිය පසුගියදා තීරණය කර සිටියේය. කෝවිඩ් - 19 තම රට තුළ පැතිරීම වැළැක්වීම එහි අරමුණ වේ. අමතරව මේ වීසා තහනම සංචාරකයන් සඳහාද ක්‍රියාත්මක බව සවුදි රජය දන්වා තිබේ. ලෝකයේ සෑම රටකටම කෝවිඩ් කිසියම් ආකාරයකින් හෝ බලපෑම් කර ඇති අතර සංචාරක කර්මාන්තය ප්‍රධාන වේ. බොහෝ නිෂ්පාදන කර්මාන්ත මේ රෝගය හේතුවෙන් දරුණු අර්බූදයකට ලක්ව තිබේ.
එස්තෝනියාව එරට ප්‍රථම කොව්ඩ් - 19 රෝගියා වාර්තා කර සිටි අතර අවාසනාවට මෙන් මේ රෝගියා ඉරානයේ සංචාරයකින් පසු සියරට බලා පැමිණි පුද්ගලයකු බව වාර්තා විය. ඉරානය මුහුණ දෙමින් සිටින බිහිසුණු තත්ත්වය මෙමගින් පැහැදිලි වේ. පසුගියදා ඉරානයේ නියෝජ්‍ය සෞඛ්‍ය ඇමතිවරයාද කෝවිඩ් රෝගියකු බව වාර්තා වූ අතර ඔහු ඊට පෙර රෝගයේ පැතිරීම සම්බන්ධව දැනුම් දීමට පැවැත්වූ මාධ්‍ය සාකච්ඡාවේදී රෝග ලක්ෂණ පෙන්නුම් කරමින් ඉතා අපහසුවෙන් සිටිනු වීඩියෝ දර්ශනවල පැහැදිලිව සටහන් වී තිබිණී. එය ඉතා කනගාටුදායක අවස්ථාවක් විය. මීට අමතරව රෝගය පැතිරීමට වඩා මරණ වැඩියෙන් වාර්තා වූ රටක් වශයෙන්ද ඉරානය නම් කළ හැකිව තිබේ. මේ වන විට ඉරානයෙන් වාර්තා වී ඇති රෝගීන් සංඛ්‍යාව 141ක් වන නමුදු වාර්තා වී ඇති මරණ සංඛ්‍යාව 22කි.
මේ වන විට ළැව් ගිනි නිවී, ගං වතුරද බැස ගොස් තම රට තුළ සාමකාමී වාතාවරණයකට මුහුණ දෙමින් සිටින ඕස්ට්‍රේලියානු අගමැති ස්කොට් මොරිසන් ‘සමස්ත ලෝකයම කෝවිඩ් හේතුවෙන් බරපතළ තත්ත්වයකට මුහුණ දෙමින් සිටින බව‘ ප්‍රකාශ කළේය. කෙසේ වුවද රෝගීන් 23 වාර්තා වීමෙන් පසු රෝගය පැතිරීම සාර්ථකව පාලනය කර ගැනීමට ඕස්ට්‍රේලියාවට හැකිවිය. එමෙන්ම මේ වන විට ඕස්ට්‍රේලියානු විද්‍යාඥයන් කෝවිඩ් සඳහා එන්නතක් සොයා ගත් බව ප්‍රකාශ වී ඇති අතර ඔවුන් එය සතුන් සම්බන්ධයෙන් පරීක්ෂාවන්ට ලක් කරමින් ඇති බවද වාර්තා වී තිබේ.
කෙසේ වුවද ලෝක ආර්ථික දත්ත පෙන්නුම් කර සිටින්නේ 2020 වසරේ සමස්ත ලෝක ආර්ථීකයේ සියයට 6 -7 අතර වර්ධනයක් බලාපොරොත්තු ව සිටි නමුදු කෝවිඩ් හේතුවෙන් එම ඉලක්ක ඉටු කර ගැනීම අපහසු වනු ඇති බවයි.
එමෙන්ම මේ වන විට කෝවිඩ් හේතුවෙන් බොහෝ වැඩටසහන් සහ උත්සව කල් දැමීමට සිදුව තිබේ. දකුණු කොරියාව සහ අමෙරිකා එක්සත් ජනපදයේ නාවික හමුදා එක්ව පැවැත්වීමට නියමිතව තිබූ හමුදා පුහුණුවක් කෝවිඩ් හේතුවෙන් කල් දමා තිබේ. රටරටවල පැවැත්වීමට නියමිතව තිබූ උත්සව, සැමරුම් සහ වැඩමුළු රාශියක් මේ හේතුවෙන් අවලංගු කර ඇතැයි වාර්තා වේ. ඒ අතරට අලුතෙන්ම එක් වීමට නියමිතව ඇත්තේ 2020 ජපානයේ ටෝකියෝ නුවර පැවැත්වීමට සියලු කටයුතු සූදානම් කර තිබූ ඔලිම්පික් උලෙළයි. තවම මේ මහා ක්‍රීඩා උලෙළ කල් දැමීමට තීරණය කිරීම කල් වැඩි බවට ඔලිම්පික් කමිටුව පවසා සිටියද බොහෝ දුරට එය කල් දැමීමට සිදුවනු ඇති බවට වාර්තා ලැබේ. පසුගියදා ජපානයේ කෝවිඩ් වරක් වැලඳී නිරෝධායනයට ලක් කර පසුව සුවපත් වූ ජපාන කාන්තාවක් යළිත් රෝගයෙන් පීඩා විඳින බව වාර්තා වීමත් සමග මේ තීරණය ගනු ඇති බවට සැක පළ වේ. ජපාන අගමැතිවරයා පවසා ඇත්තේ මාර්තු 2වැනිදා සිට පාසල් වසා දැමීමට කටයුතු කළ යුතු වනු ඇති බවයි.
අමෙරිකාවද රෝගයට සූදානම් වෙමින් සිටින්නේ විදේශ රටවල අධ්‍යාපනය ලැබීමට යන සිසුන්ට තාවකාලිකව එයින් වැළකී සිටින ලෙසට අවවාද දෙමිනි. පසුගියාද ජනාධිපති ට්‍රම්ප් කෝවිඩ් සඳහා අමෙරිකාව සූදානම් විය යුතු බවත්, පාසල් වසා දැමීමට සූදානමින් සිටිය යුතු බවත් පවසා සිටියේය.
කෙසේ වුවද තවමත් ලෝකය නව කොරෝනා වයිරසයෙන් හෙවත් කෝවිඩ් - 19න් නිදහස්ව නැත. ඒ වෙනුවට රෝගය ලොව පුරා ඉතා භයානක ලෙස ව්‍යප්ත වෙමින් තිබේ. ගත වී යන කුමන හෝ මොහොතක කොව්ඩ් - 19 පාලනය කළ හැකි ඖෂධයක් සොයා ගත් බවට සුබ ආරංචියක් අසන්න ලැබේ නම් හෝ රෝගය පාලනය වී ඇති බව අසන්නට ලැබේ නම් එය මුළු මහත් පෘථිවි වාසීන්ගේම සතුටට හේතු වනු ඇත.
