මෙවර ජනාධිපතිවරණයට ඉදිරිපත් වන නව ප්‍රජාතන්ත්‍රවාදී පෙරමුණේ ජනාධිපති අපේක්ෂක සජිත් ප්‍රේමදාස මහතාට සහයෝගය දැක්වීම පිණිස විවිධ දේශපාලන පක්ෂ සහ සිවිල් සංවිධාන රාශියක් අත්වැල් බැඳගෙන සිටිති. ජාතික ජනතා පෙරමුණ ද එසේ සහය පළ කරන එක් පක්ෂයකි. ඒ සම්බන්ධයෙන් ජාතික ජනතා පෙරමුණේ නායක ආචාර්ය ඒ. එම්. ජයරත්න සමඟ පැවැත්වූ සංවාදයකි මේ.
■ අද අපේ රටේ දේශපාලන පක්ෂ ගණනාවක් තිබෙනවා. එසේ තිබියදී ඔබ ඇතුළු කණ්ඩායමක් අලුත් පක්ෂයක් බිහි කිරීමේ අරමුණ කුමක්ද?
අපි ජාතික ජනතා පෙරමුණ පිහිටෙව්වේ 2009 දී. සිංහල, දෙමළ, මුස්ලිම් යන ජාතීන් සියල්ලටම එක සමානව සැලකීමේ සහ ඔවුන්ගේ හිමිකම් ලබා දීමේ අරමුණින් තමයි අපි ඒකරාශි වී මෙම පක්ෂය බිහි කළේ. ඒ අනුව උතුර නැගෙහිර යුද්ධයෙන් අවතැන් වූ අය වෙනුවෙන් අරුදන් වූ අය වෙනුවෙන් වගේම රැකියා ස්ථානවලදී දේශපාලන පළිගැනීම්වලට ලක් වූ අය වෙනුවෙන් හඬක් නඟමින් අපි ඔවුන් වෙනුවෙන් මෙහෙවරක යෙදී සිටිනවා.
■ ජාතික ජනතා පෙරමුණ මෙම දශකයක කාලය තුළ සිදු කළ කාර්යභාරය ගැන කෙටියෙන් පැහැදිලි කරනවා නම්?
දේශපාලන පළිගැනීම්වලට ලක් වූ අයගෙන් පිරිසක් යළි සේවයේ පිහිටුවීමට කටයුතු කර තිබෙනවා. තවත් සමහරුන්ට වන්දි මුදල් ලබා දුන්නා. අතුරුදන් වූ අය වෙනුවෙන් උතුරු නැගෙනහිර ප්‍රදේශවල කාර්යාල පිහිටුවලා ඔවුන් උදෙසා සහතිකයක් ලබා දීමට මූලික වුණේ අපේ ජාතික ජනතා පෙරමුණ. උතුර නැගෙනහිර ප්‍රදේශවල හානි පූර්ණ කාර්යාල පිහිටුවලා විපතට පත් අය වෙනුවෙන් ගෙවීම් කිරීමට අපි කටයුතු කළා. ඊට අමතරව පළාත් මට්ටමින් ක්‍රියාත්මක කළ හැකි ආකාරයේ ආර්ථික සැලසුම් පිළියෙල කර තිබෙනවා. දිළිඳු ජනතාව වෙනුවෙන් ආධාර ලබා දීමේ විශේෂ වැඩපිළිවෙළක් සකස් කර තිබෙනවා.
■ ජාතික ජනතා පෙරමුණ, නව දේශපාලන පක්ෂයක්. මෙවැනි කාර්යභාරයක් ඉටු කිරීමට ශක්තියක් ලැබුණේ කොහොමද?.
2009 දී එක්සත් ජනතා නිදහස් සන්ධාන රජය යටතේ ඔවුන් සමඟ එකතු වෙලා අපි වැඩ කළා. 2015 සිට ජනපති මෛත්‍රිපාල සිරිසේන මහතා සමඟ එකතු වෙලා වැඩ කළා.
■ 2015 දී ඔබ එකට එකතු වී කටයුතු කළ එක්සත් ජනතා නිදහස් සන්ධාන රජයෙන් ඉවත් වුණේ ඇයි?.
ඒ කාලේ උතුරු නැගෙනහිර යුද්ධයෙන් පීඩාවට පත් වූ අය වෙනුවෙන්, අතුරුදන් වූ අය වෙනුවෙන් සාධාරණයක් ඉෂ්ට කරලා දෙන්න පුළුවන් වුණේ නැහැ. ඒ නිසා 2015 දී අපි මාදු‍ළුවාවේ සෝභිත හාමුදුරුවන් සමඟ එකතු වුණා.
■ 2015 දී බිහි වූ නව රජය යටතේ ඔබේ අපේක්ෂිත අරමුණු ඉටු වුණාද ?.
ඔව්. අපි ජනාධිපති මෛත්‍රීපාල සිරිසේන මහතා සමඟ එකට එකතු වෙලා වැඩ කළා. ඔහු අපේ හඬට ඇහුම්කන් දුන්නා. අතුරුදන් වූ අය වෙනුවෙන් සහතික දීමටත් හානි පූර්ණ ගෙවීම් සිදු කිරීමටත් හැකි වුණේ ජනාධිපති මෛත්‍රීපාල සිරිසේන මහතා නිසයි.
■ තව නොබෝ දිනකින් ජනාධිපති මෛත්‍රිපාල සිරිසේන මහතා විශ්‍රාම ලබනවා. නව ජනාධිපතිවරයෙක් තෝරා ගැනීමේ ඡන්දය පැවැත්වෙනවා. රටේ නායකත්වයට 35 දෙනෙක් තරග වදිනවා. ඉදිරියේදී ජාතික ජනතා පෙරමුණ ක්‍රියා කරන්නේ මොන ආකාරයටද?.
අපි නව ප්‍රජාතන්ත්‍රවාදී පෙරමුණේ ජනාධිපති අපේක්ෂක සජිත් ප්‍රේමදාස මහතාට සහයෝගය පළ කරනවා. ඒ ගැන මුලින්ම අපි අපේ විධායක සභාව කැඳවලා තීන්දුවක් ගත්තා. එය මධ්‍යම කාරක සභාව අනුමත කළා. ඊට පස්සේ ඔක්තෝබර් 19 වැනි දා ශ්‍රී ලංකා පදනම් ආයතනයේදී නියෝජිත සම්මේලනයක් පැවැත්වුණා. එහිදී හැමෝම එකඟත්වය පළ කළා සජිත් ප්‍රේමදාස මහතාට සහයෝගය දක්වන්න.
■ පොදු ජන එක්සත් පෙරමුණ ජනාධිපති අපේක්ෂක ගෝඨාභය රාජපක්ෂ මහතාට සහයෝගය නොදැක්වීමට විශේෂ හේතුවක් තිබෙනවාද?.
අවි දරා ගත් කෙනෙක් රටක නායකත්වයට නුසුදුසුයි කියලා අපි විශ්වාස කරනවා. අනික සජිත් ප්‍රේමදාස මහත්තයා දුප්පත් අයට නිවාස හදල දෙනවා. පොඩි මිනිහා ගැන බලනවා. කාර්යශුරයි. ඔහුගේ පියා වන ආර්. ප්‍රේමදාස මහතා වගේම සේවයට ඇපකැප වී සිටිනවා. පොඩි මිනිහාටත් ඔහු හමුවෙන්න පුළුවන්. රටේ සංවර්ධනයටත් සැලසුම් සකස් කර තිබෙනවා. වාහන බලපත්‍ර වැනි අනවශ්‍ය වියදම් කපා හැරලා අධ්‍යාපනය, සෞඛ්‍ය වැනි අංශ වැඩි දියුණු කිරීමේ උත්සාහයක් තිබෙනවා. අපේ අරමුණ වී තිබෙන්නේත් දිළිඳු ජනතාව නඟා සිටුවීම. අපේ අරමුණු සමඟ ඔහුගේ වැඩපිළිවෙළ ගැළපෙන නිසා අපි හැමෝම සජිත් ප්‍රේමදාස මහතාට සහය පළ කරන්න කැමතියි.
■ ජාතික ජනතා පෙරමුණ සජිත් ප්‍රේමදාස මහතා හමු වී සාකච්ඡා කළා ද?.
ඔව්. අපි සාකච්ඡා කළා. දේශපාලන පළිගැනීම්වලට ලක් වූ අය වෙනුවෙන් නැවතත් රැකියා ලබාදීම, ඔවුන්ට වන්දි ලබා දීම උතුර නැගෙනහිර හානියට පත් අයට වන්දි ගෙවීම වැනි අපේ අරමුණු ගැන අපි ඔහු සමඟ සාකච්ඡා කළා. ඔහු ඊට එකඟත්වය පළ කළා.
■ ඔබේ පක්ෂයට කොපමණ ඡන්ද සංඛ්‍යාවක් තිබෙනවාද?.
ඡන්ද ලක්ෂ 3ක් පමණ තිබෙනවා.
■ ඔබ කොහොමද එය නිශ්චිතවම කියන්නේ?.
අපි පසුගිය පළාත් පාලන මැතිවරණයට ස්වාධීනව තරග කළා. එයින් පැහැදිලි වුණා අපිට ලංකාව පුරා ඡන්දදායකයන් ලක්ෂ 3ක් පමණ සිටින බව. අපේ නියෝජිතයින් 16 දෙනෙක් පළාත් පාලන මැතිවරණයෙන් ජයග්‍රහණය කළා. එය අපි ලැබූ විශාල ජයග්‍රහණයක් යැයි මම විශ්වාස කරනවා.
■ ජාතික ජනතා පෙරමුණ ස්වාධීන අපේක්ෂකයන් ඉදිරිපත් කළේ ඇයි?.
අපේ දේශපාලන පක්ෂය තවමත් ලියාපදිංචි කරලා නැහැ. අපි ඉස්සෙල්ලාම ලියාපදිංචි කරන්න ගියාම පක්ෂය පරණ වෙන්න ඕනෑ කියලා කිව්වා. ඊට පස්සේ අපි ටික කාලයක් ගිහින් ලියාපදිංචි වීමට අදාළ ලියකියවිලි භාර දුන්නා. ඒත් ඒ පාර අලුත් පක්ෂ 5ක් විතරයි ලියාපදිංචි කළේ. අපේ පක්ෂය 7 වැනි තැන තිබුණේ. ඒ නිසා ඒ පාරත් ලියාපදිංචි කර ගන්න බැරි වුණා.
■ ඔබේ පක්ෂය 2015 සිට සම්බන්ධ වී කටයුතු කළේ ශ්‍රී ලංකා නිදහස් පක්ෂයේ නායක වත්මන් ජනාධිපති මෛත්‍රීපාල සිරිසේන මහතා සමඟ මිස එක්සත් ජාතික පක්ෂ රජය සමඟ නොවෙයි. ඒසේ තිබියදී ඔබේ පක්ෂය එක්සත් ජාතික පක්ෂය ප්‍රමුඛ නව ප්‍රජාතන්ත්‍රවාදී පෙරමුණේ ජනාධිපති අපේක්ෂක සජිත් ප්‍රේමදාස මහතාට සහය පළ කිරීම ගැටලු සහගතයි නේද?.
අපිට ගැටලුව මතු වුණේ ශ්‍රී ලංකා නිදහස් පක්ෂය සමඟ එකතු වීම නිසයි. අපි 2015 දී මෛත්‍රිපාල සිරිසේන මහතාට සහය පළ කරන අතරවාරයේදී ඔහුගේ නායකත්වයෙන් යුතු ශ්‍රී ලංකා නිදහස් පක්ෂය සමඟ කටයුතු කළා. අපි ශ්‍රීලනිප ලේකම් දයාසිරි ජයසේකර මහතා සමඟ සාකච්ඡා කරලා සම්බන්ධීකරණ නිලධාරීන් සෑම දිස්ත්‍රික්කයකටම පත් කළා. ඒත් මෙවර ජනාධිපතිවරණයේදී ශ්‍රී ලංකා නිදහස් පක්ෂය ජනාධිපති අපේක්ෂකයකු පත් නොකළ නිසා අපි ගැටලුවකට මැදි වුණා. ඒ එක්කම අපි එක්ක සිටින අපේ පාක්ෂිකයෝ අසරණ වුණා. ඒ නිසයි අපි විධායක සභාව කැඳවලා සකච්ඡා කරලා තීන්දුවක් ගත්තේ සජිත් ප්‍රේමදාස මහත්තයාට සහයෝගය දැක්වීමට.
■ යුද්ධය නිමා වී වසර 10 ක් සම්පූර්ණ වීමට පෙර ලංකාවට තවත් ත්‍රස්ත ප්‍රහාරයකට මුහුණ දීමට සිදු වුණා. ඒ නිසාම රටේ ආරක්ෂාවට ගෝඨාභය අත්‍යවශ්‍ය යැයි ඇතැමුන් තුළ ආකල්පයක් ඇති වී තිබෙනවා. ඒ ගැන ඔබේ අදහස කුමක්ද?.
අප්‍රේල් 21 වැනි දා අයි. එස්. ත්‍රස්ත ප්‍රහාරයක් ඇති වුණා තමයි. එය වළක්වා ගැනීමට රජය පියවර ගෙන තිබුණේ නැති බවත් ඇත්ත. ඒත් ඉතාමත් කෙටි කාලයක් ඇතුළත අපේ ආරක්ෂක හමුදාව ත්‍රස්තවාදීන් අත්අඩංගුවට ගත්තා. රටේ ආරක්ෂාව තර කළා. අනික මෙම ආණ්ඩුව අද ජාත්‍යන්තරය සමඟ සම්බන්ධතා පවත්වනවා. අපි ජාත්‍යන්තර වශයෙන් කොන් වෙලා නැහැ. 2015 පෙර අපි ලෝකයේ අනිත් රටවල් සමඟ තිබුණු සම්බන්ධතා බිඳ වැටිලා තිබුණේ. අපිට GSP සහන තිබුණේ නැහැ. සම්බාධක පනවා තිබුණා. ඒත් දැන් එහෙම තත්ත්වයක් නැහැ. ජාත්‍යන්තර සුහඳත්වය වර්ධනය වී තිබෙනවා. ඒ නිසා අපිට ජාත්‍යන්තර ත්‍රස්තවාදයකට මුහුණ දීමට ශක්තියක් තිබෙනවා. අනික මීට පෙර අපේ රටේ තිබුණේ අභ්‍යන්තර ත්‍රස්තවාදයක් මිසක් ජාත්‍යන්තර ත්‍රස්තවාදයක් නොවෙයි. ජාත්‍යන්තර ත්‍රස්තවාදයට මුහුණ දීමට ලෝකයේ සෙසු රටවල් සමඟ සුහදත්වයෙන් කටයුතු කරන මේ ආණ්ඩුව ශක්තිමත් බව අපි විශ්වාස කරනවා. ඒ නිසා සජිත් ප්‍රේමදාස මහතාගේ නායකත්වයෙන් පත්වන රජයක් යටතේ රටේ ආරක්ෂාව ගැන බිය විය යුතු නැහැ.
