කොරෝනා වයිරස ශ්‍රී ලංකාවෙන් තුරන් කිරීමේදි ජන ජීවිතය යථා තත්ත්වයෙන් පවත්වාගෙන යෑම සඳහා වු පත් කර ඇති ජනාධිපති විශේෂ කාර්ය සාධක බළකායේ කටයුතු යටතේ රට පුරා අත්‍යාවශ්‍ය ආහාර ද්‍රව්‍ය බෙදා හැරිමේ සහන වැඩපිළිවෙළ සාර්ථක ලෙස දැන් රට පුරා අදියරෙන් අදියර ක්‍රියාත්මක වෙයි.
ජනාධිපති ගෝඨාභය රාජපක්ෂ මහතා විසින් පත්කරන ලද එම බලකායේ ප්‍රධාන අරමුණ ජනතාව ඒකරාශි වීම වළකමින් රටපුරා සෑම නිවෙසකටම අත්‍යාවශ්‍ය ආහාර ද්‍රව්‍ය කඩිනමින් බෙදාහැරීමය. එම සමස්ත ක්‍රියාදාමය කොරෝනා මර්දනයට සෞඛ්‍ය ක්ෂේක්‍රය ගෙනයන වැඩපිළිවෙළට යටත්ව ක්‍රියාත්මක වන බවත් ජන ජීවිතය බිඳ නොවැටෙන ආකාරයෙන් හා පාරිභෝගිකයා, ගොවියා හා දේශිය ආර්ථිකය සුරැකෙන පරිදි ක්‍රියාත්මක වන බවත් එම කාර්ය සාධක බළකායේ සභාපති වන හිටපු ඇමැති බැසිල් රාජපක්ෂ මහතා පවසයි.
සහල්, පොල්, එළවළු, බිත්තර, කුකුල් මස් හිඟයකින් තොරව ජනතාවට සැපයිමට ඒවා නිෂ්පාදකයින් ගෙන් මිලට ගෙන සමුපකාර හා සුපිරි වෙළෙඳසල් මඟින් ඒකාබද්ධව අත්‍යාවශ්‍ය ආහාර මල්ලක් සකස් කර ජනතාවට ලබාදීමේ වැඩපිළිවෙළ දැන් ක්‍රියාත්මක බව බැසිල් රාජපක්ෂ මහතා පවසයි.
මේ පිළිබඳ පසුගියදා පැවැති කාර්ය සාධක බළකායේ සාකච්ඡාවේදි මෙම බෙදා හැරිමේ කාර්ය සඳහා ප්‍රාදේශිය ලේකම්, ග්‍රාමසේවා නිලධාරීන්, කෘෂි පර්යේෂණ නිලධාරී, සමෘද්ධි සංවර්ධන නිලධාරීන් සහභාගි කර ගැනීමට තීරණය කෙරිණි. දුරකතන ඇනවුම් මඟින් නිවෙස් වලටම ගෑස් බෙදා හැරීමේ වැඩපිළිවෙළක් කඩිනමින් ක්‍රියාත්මක කරන ලෙස බැසිල් රාජපක්ෂ මහතා අදාළ ආයතනවලට දැනුම් දෙන ලදී.
