මුදලිතුමා කිඹුලා ඇදගෙන ආ හැටි!
කුරුණෑගල නගරයට නුදුරු පැරණි වැවක් පිහිටි, ගමක් සම්බන්ධ කතා පුවතක් මා ගුරු සේවයට පිවිසි මුල් වකවානුවක, එම පාසලේ මුල් ගුරුවරයා අප විවේකීව සිටි මොහොතක කීවා අද මෙන් මතක ය. එදා එම පාසලේ සිටි මුල් ගුරුතුමා ප්‍රදේශයේ චිරප්‍රසිද්ධ විහාරස්ථානයක නාහිමියන්ගේ ඥාති පුත්‍රයෙක් විය. එම නාහිමියන්ගේ පියා වූ ගම් මුදලි මහා හපන්කම් කළ අයකු බව උන්වහන්සේගේ විවිධ කතා ඇසූ අයට වරින් වර දැන ගැනීමට ලැබුණු බවත්, මුල් ගුරුතුමාගෙන් කියැවිණි.
අවුරුද්දකට වරක් ගමේ වැවේ නෑමට ගිය කෙනෙකු දැවැන්ත කිඹුලකුට බිලිවීම ඇසූ දුටු කාගේත් සංවේගයට හේතු වූයේය. මේ ගැන නිතර කතා කළ ගම් මුදලි දිනක් අසල කැලයෙන් සවිමත් දික් වූ වැල් ගෝටයක් ඇදගෙන ආවේය.
“අද නම් කිඹුලා අරගෙන මිසක් මං නම් ආපසු එන්නේ නෑ” කියා මහ හඬින් කියූ මුදලි තුමා, හරිබරි ගැසී අමුඩයක් ගසා, තද කරගෙන, වැල් ගෝටය ද පිටේ බැඳගෙන, වැවට පැන්නේය. ටික වේලාවක් දිය යට ගිලෙන මතුවන මුදලි තුමාගේ සිරුර වැව වටා බලා සිටි දෙනෝදහක් සෙනඟ “අනේ! අනේ!!!” කියද්දීම අතුරුදන් විය.
පැයක් ගත විය. දෙකක් ගත විය. මහා වින්නැහියකි. මෙතුවක් ගම් ප්‍රදේශයේ සුරුවිරුකම් කළ ගම් ප්‍රධානයාට විපතක් දෝ හෝ යැයි සිතමින් ගම්මු සුසුම් ලෑවෝය. අන්තිමේ ඔවුහු හිසැ අත් ගසා නිවෙස් බලා යන්නට සැරසුණෝය. වැව්දිය දෙබෑ කරගෙන, මහත් ගෝරනාඩු මැද, “මෙන්න කිඹුලා ගෙනාවා අදින් පස්සේ උඹලා බයක් නැතුව හිටපල්ලා” නිවී හැනහිල්ලෙ නාපල්ලා, කිඹුලා වැල්පටවලින් වෙලාගෙන ආ මුදලිතුමා එහෙම කීවෙ නැතෑ” නාහිමියන් කතාව හමාර කළේ උජාරුවෙනි.
ඩබ්ලිව්. උපාලි දයාරත්න
වැල්ලව.
අලියා සිග්නල්වලට යෑම
මා ඉපදුණු කළුතර කලමුල්ල ප්‍රදේශයේ ජීවත් වූ එක් වයසක පුද්ගලයෙකු පිළිබඳ මා පාසල් අවධියේ සිට අසා තිබුණි. ඒ සියලු දෙසාම දැන් ජීවතුන් අතර නොමැත. එම පුද්ගලයා ‘සිරිසේන’ යයි නම් තබමු. මෙය රසවත් සැබෑ අතීත කතාවකි.
සිරිසේන අයියා සිය පාපැදියෙන් කතරගම වන්දනාවේ යෑම පුරුද්දක් ලෙස කළේය. අදාළ පූජාවලින් පසු පාපැදියෙන් ම යළි කළුතර එන්නේය. කතරගම සිට සැතපුම් 10 ක් පමණ දුර ගිය විට අද මෙන් නොව එකල වනසත්තු මහාමාර්ගයට පැමිණෙති. දිනක් සිරිසේන පාපැදියෙන් පාළු පැත්තක එද්දී පිටුපසින් අලියෙක් පැමිණියේය. මෙය දුටු සිරිසේන ඉතා වේගයෙන් කඩ වීදියකට ඒමට උත්සහ ගත්තත් ‘අලියා පිටුපසින් වේගයෙන්’ හඹා ඒමට පටන්ගෙන තිබේ. මොහු ද වේගය වැඩි කරමින් යද්දී අලියා ද පිටුපසින් වේගයෙන් ළංවෙන බව දැක, සයිකලය දමා කෙටි දුරක් දුවයන අතර තුංමං හන්දියක් ළඟට පැමිණ වටපිට බලද්දී දැන්වීම් පුවරුවක් දැක තිබේ. ඔහු එහි නැවතී පුවරුව බැලීය. එහි වූයේ උතුරට, දකුණට හා වෙනත් මාර්ගයකට යාමේ දැන්වීමකි. අලියා ද දැන් ඔහු පිටුපසය. ඔහු වහාම උතුරට ඇති දිශාව බලා අත දික් කළේය. ඔහු වෙනත් පැත්තකට යද්දී අලියා ඔහු අත දිගු කළ උතුර පැත්ත බලා යන්නට ගියේය.
පී.පී. සිරිනන්ද සිල්වා (විශ්‍රාමික)
පොතුවිල පයාගල
