කුණු කදු
ඇති නොවන බලය
මානය කුල මල නිලය
විකල වුණ මොළය
කෙ‍ෙලස් කුණු කඳු
ලෝබ මද මාන
කෝප වෙර බිය ගේන
සිතේ පුරවාන
දකිති දිවි තෙක් නපුරු හීන
දැඩි දුගඳ ගිලිහෙන
විටෙක ගිනි ගෙන දිලිහෙන
උනුන්ගෙන් පළිගෙන
රුදුරු නරපණු කැලත නළියන
බලු කවුඩු පො‍රය
නොවන තුරු අහවරය
දිවි දුකට බරය
එයින් මිහිමත මැවෙයි නිරය
කුණු නිසා යැපෙන
උනුන් එරෙහිව හැපෙන
මීනි මල් පිපෙන
කෙළෙස් කුණු බිහිසුණුය කිපෙන
කෙ‍ෙලස් කුණු කසළ
නිකසළ කරන කුසල
පිරුණු සිත් අසල
සොඳුරු අරමුණු නොවෙයි සසල
සෙවණ ලැබ තුරු මුල
සිදු විය සොඳුරු තෙමඟුල
පරිසරය නිකසළ
සුවය සලසයි සිතට සුනිමල
දහම් එළි ගේන
වෙසක් පුන්සඳ පාන
සිතට කුණු නේන
ලොවට පෙන්වයි නිවෙන සීන
මහාචාර්ය දර්ශන රත්නායක
නිවන
තෙමඟුල සිහි කර දන් දෙති
නෙක නෙක විදුලි එළි මැද
විකුණති විසිතුරුව
සංසාරේ හැමදාම
බැඳෙති පසු දින
වරදෙහිම
මංජුල සෙනෙවිරත්න
වෙසක් පැතුම
නව ලොව අරුම නිමැවුම් මත සැදුණු විසක්
තැන්පත් කෙරුණු සිත් අද මනු ලොවට දොසක්
ඒ තැන ඉවත් වී දැහැමිව දැමුණ හිසක්
අත් වේවා සැමට ඒකය පැතුම වෙසක්
සනත් පියසේන
සරණාරාමර පියේ
අඳුරෙහි දණ ගගා මෙසසර කතර තුළ
මිනිසා වැටෙනු දැක මිසදුටු අරිටු මුල
සනරාමර පියේ තුන් ලොව එළිය කළ
සිපගමි සෙනෙහසින් සිරිපද සුවඳ මල
පාමින් සියලු දනහට එක පරිදි සෙනේ
සසරින් මිදෙන්නට නිරතුරු පිහිට වුණේ
පිංබර වෙසඟෙ තෙමඟුල සිදු කෙරුණ දිනේ
ගිනි දැල් නවී ගොස් නිරයෙන් සිසිල දැනේ
කරුණාරත්න හපුආරච්චි
දුක නිවන මඟ
හිරු සඳු උදා වී සතහට කියති යමක්
තුරුලිය සැනසෙමින් මේ බව කරයි පසක්
කරුණා දයාවෙන් පිරිපුන් දහම් කෙතක්
සරුවී දකිමි මේ තෙමඟුල් දිනේ වෙසක්
හිතට දැනෙන පවුකම් හැම දුරු වෙනවා
කයට වෙහෙස නැත සුවසෙත මතු වෙනවා
දුකට පිහිට වූ බුදු හිමි සිහි වෙනවා
සතුට සසර දුක නිවනට මඟ වෙනවා
ඇල්බට් ඇම්. ලියනගේ
හොඳ සරණ - බුදු සරණ
කිරණින් සුබ කිරණ සීතල සඳ කිරණ
දෙරණින් සර දෙරණ හිමි බිහිවුණ දෙරණ
බරණින් බරණ සමිඳුගේ ගුණ බරණ
සරණින් හොඳ සරණ හැම විට බුදු සරණ
නමාසිත මගෙ බුදු සමිඳුට නිතර
පමානොවී සැනසෙමි යන තෙක් එතෙර
මමායනය නොරැදුන අබැයක් විතර
අමාමහ නදිය සම්බුදු දිවි කතර
කහතුඩුවේ ප්‍රේමසිරි අබේසිංහ
දියත දිනන වෙසක්
දියත සිරි විහිදෙන
තෙමඟුල් උලෙළ සමරන
නිජබිමේ අබිමන
පහන් සිතිවිලි ළමැද සටහන
බුදු නුවණ හැඳිනුව
සදහම් සවිය දෙවනුව
සඟ රුවන තෙවනුව
ගෙනේ පෙර මඟ දෙලොව දියුණුව
චින්තනය නිදහස්
සම්බුදු සිරිත් අදහස්
වැටහුමෙන් සිව්සස්
පෙනේ සවනක් ගලන බුදුරැස්
මඟ අනුව අරිහත්
ඔසවන දෙපය පොහොසත්
පුරන කල පිළිවෙත්
හිතට සැනසුම දෙලොව ජය ගත්
නන්දසේන පලිහක්කාර
ජගත් තෙමඟුල
ලෝනා සමිඳු සදහම් බැති ගීය ගයා
මානව දයාවෙන් සිත්වල සුවඳ තියා
නෙත්වල කඳුළු පිසදාලන සුමඟ කියා
දිවියේ අරුත පිබිදුවා පිරුණ දයා
දිනුම ද පරාජය දුක වේදනාවන්
ඉවසූ අයුරු සොඳුරුයි සිත මනාවන්
සුසැදුණු හදකමල් මහඟුයි දයාවන්
පන්සිල් පිරුණු තැන් ලොව වාසනාවන්
තෙමඟුල සිහිකරන ලොව සිරිලකට හැරි
දෙදහස් හත වෙසක් ඉතිහාසයෙන් පිරි
වෙසෙසින් දිනා ගත යුතු හොඳ හිතට දිරි
කතරට වැසි ලෙසින් වේවා සෙනෙහෙ පිරි
අබ්දුල් කේ. සාදිකීන්
අසිරිය
දිලෙන රන්තරු රැසින් සුදු බුදු කිරණ විහිදෙති
පිපෙන වන මල් මතින් බුදු සුවඳ පැතිරෙති
ගයන බැතී ගී හඬින් බුදු ගුණම පැවැසෙති
දෙරණ බුදු මඟුලටය තුන් හෙළය සැරසෙති
ගමක් නෑරම කරන පිළිවෙත්ය අඩු නැති
ගෙයක් ගානෙම ඇහෙන දහම කන් පිනවතී
තෙරක් නැහැ හැම තැනම බුදු සමිඳු සමරති
වෙසක් මහ අසිරියෙන් හෙළ දෙරණ බබළති
සරත් ධර්මසේන
සංසාරේ පින් පුරමි
වෙසක් සඳේ එළියෙන් ලොව නැහැවෙනවා
ගහකොළ අතු රිකිලි මල් පලබර වෙනවා
හිමි දෙසු දහම් මඟ යළි යළි සිහි වෙනවා
මිනිස් සිත් සතන් දැහැමින් පැහැ දෙනව
ඡන්ද ද්වේෂ භය මෝහය පෙරටු කොට
සියලුම දුෂ්චරිත සිදුවන්නේ එවිට
බුදු බණ මතක් කර සැනසුම ගෙන සිතට
පිළිවෙත් පුරමු මේ වෙසඟේ පෝ දිනට
සල් සපු නා මලින් බුදු සිරි පා පුදමි
තෙරුවන් සරණ ලැබ සිත සනසා ගනිමි
ලෝකය වෙතට මෙත් කරුණා ගුණ වඩමි
නිවට යන්න සංසාරේ පින් පුරමි
අමිතා කුමාරි දිවාරත්න
කතරින් එතෙරට
ලොව ඇති සැටිය පෙන්වන සිව්සස් දහම
කවරෙකුටත් නොමැත හිමිසඳුගේ දැක්ම
බව කතරින් එ‍ෙතරව සැනසුම ලැබුම
ලොව ඇති එකම මඟ වේ සමිඳුගෙ දහම
ඔබටත් මටත් සිරි සුබ වෙසඟක් වේවා
ලොවටම මිහිරි බුදු ගුණ නිති සිහි වේවා
මෙත් කරුණා සිතිවිලි නිති ඇති වේවා
බව කතරින් නැඟෙනට මඟ පෑදේවා
ඒ. නන්දිසේන ඉන්ද්‍රසේකර
ලොවින් උතුම්
ලොව අන් හැමට වැඩියෙන් ගරු සරුය සෙට
රහසින් වුවත් පව් නොකළෙය කිසිම විට
මැනවින් දකිත හැක එය නුවණැති ඇසට
'අරහං' යෙදුම සුදුසුය බුදු සමිඳුන්ට
පේමසිරි මුණසිංහ
වෙසක් සඳ වගෙයි නිලඹර බුදු තෙමඟුල සිහිගන්වා
ගසක් වැලක් කොළ ගානට සුවඳැති මල් හිනැහෙන්නා
ඇසක් වගෙයි හිමි දෙසු දම් නිවනට යහ මඟ පෙන්නා
පසක් කරන් බුදු බණ පද පින් රැස් කර සැනසෙන්නා
දාන ශීල භාවනාව පෙරමුණු කරගෙන එන්නේ
පේන පේන හැම අතකම නොමසුරු දන් සල් දෙන්නේ
හින කරන්නේ කෙ‍ෙලසුන් මෙත් කරුණාවෙන් වන්නේ
පීන පීන ගුණ සයුරේ බුදු තෙමඟු සමරන්නේ
කිරි සුදු පැහැයෙන් සැරසුණ සිල් ඇත්තන් පන්සලේය
හරි හරියට තොරණ බඳින ගැටයන් තුන් මංසලේය
සරි කර දෙන රසමසවුළු යෞව්වනයන් දන්සලේය
පිරිසුදු ධර්ම‍ෙය බලයෙන් හදවත් සන්සුන් කළේය
රත්නා ලංකා අබේවික්‍රම
පා පියුම් නමදිමි
පහත් කුලයෙහි ජනිත වීලා
නේක අවමන් ලබා මෙලොවින්
දුකින් ළතැවුණ දන හටද
පිළිසරණ වී මෙත් කුලුණු ගුණයෙන්
ලොවුතුරා සෙත සුවේ ගෙන දුන්
සනසවා දම් අමා මිහිරෙන්
අසම සමවූ බුදු පියාණන්
මලින් පුදදී වඳිමි බැතියෙන්
ඇම් .ඒ.ජයසිරි
වඳිමු -පුදමු
දොළොස්මහේ එක මසකදි මහ දන මන සැනසෙන
වෙසක් මසේ පුන් පෝදා ගුණ දහමේ යෙදෙමින
පස් පව් ගැන මොහොතක්වක් නොසිතා අට සිල් අති උත්තම වෙසක් පෝය සමරමු බුදු ගුණ දැන
තුන් ලෝ ගුරු සම්බුදු හිමි තෙමඟුල සිහිකර සොඳ
පුන් පෝදා වෙසක් සිරිය දස අත පැතිරෙන සඳ
සන්තානය බුදු බැතියෙන් පිපි මල් පොකුරක් ලෙද
සාදු සාදු බුදු සිරිපා වදිමු පුඳමු අපි අද
අගනුවර කේ. නන්දදාස
සිල් සුවඳයි දම් සුවඳයි
තුන් බුදු මඟුල යළි සිහියට නැගෙන විට
රන් කොත තුළින් බුදු හිමි පෙනෙනවා මට
දන්සල තොරණ සැදෙමින් සිත සතුටු කොට
පින් බිම සරු කරයි නව එළි දෙමින් හෙට
සිල් ගුණ සුවඳ විහිදී අද සැම පැත්තේ
නිල් මානෙල් පිපෙයි නිල් ජල නල මත්තේ
පැල් පත තුළද රන් වන් පහනකි ඇත්තේ
දැල්වෙන අයුරු දැක සිත සනසා ගත්තේ
මොහඳුර පරදමින් ආලෝකය දකිමු
සහයෝගය තුළින් අසමගිය ද නිවමු
ගහ කොළ මල් ලෙසින් අපි එක් වී සිටිමු
දහමට අනුව දිවිමඟ සරසා ගනිමු
කරුණාදාස සපුතන්ත්‍රී
පින්බර වෙසඟ
රජ සිටු මැඳුර දුගී පැල්පත අත් නොහැර
සැම හට සමව මනුහිමි කම් දුන් වීර
සැකි කුල තිලක වන් හිමියන් සමර කර
ලොව දස දෙසම පැතිරෙයි වෙසඟ සිරි සර
බුදු මැඳුරෙන් ඇසෙන සිරි බුදු ගුණ නාදේ
බෝපත් සලා මඳනල සමඟින් විහිදේ
දිය නෙත් හිමිගෙ තෙමඟුල් දින සිත් සුවඳේ
වෙසඟේ සිසිල පතුරයි පුර වෙසක් සඳේ
එම්. එම්. සුගතදාස
තෙමඟුල් දිනේ
ඉපදී බුදුව පිරිනිවට වැඩිය දින
තුන් බුදු මඟුලෙ නෙක අසිරිය විදින දන
හිමි පුදනුවට වැද තෙල් මල් අතට ගෙන
වෙහෙරට ඇදෙති සුදුවත හැඳ මතුව පින
සැම නි‍ෙවසකම එසැවී ඇත බොදුනු දද
ගස් වැල් පරිසරය ඵල බර සුවෙනි අද
පෙරටුව කරුණාව මුදිතා මෙතිනි හද
සමරමු වෙසක් මෙවරත් පිළිවෙතට වැද
දෙන්නට පැහැදිලා සැම දෙනෙකුම සැමට
එන්නට ඇරියුම්ය තම දන්සල වෙතට
සැනසිලි සුව ගෙනේ කරුණාබර සිතට
සුබ මංගල්ලයකි අද මුළු බොදු ලොවට
සුගතිඳු ගුණ ගැයේ හැම අතකම වාගේ
මැසිවිලි දුක් අඳෝනා කිසිවක් නෑහේ
දන් සිල් බවුන් වඩමින් රුදු බව ඕගේ
තරණය කරති වැද අද මහ වට දාගේ
තෙප්පනාවේ ගුණවර්ධන
