පාකිස්ථාන හිටපු අග්‍රාමාත්‍ය ඉම්රාන් ඛාන්ට එරට අධිකරණයක් විසින් වසර තුනක සිර දඩුවම් නියම කර ඇත.
ඔහුට එල්ල වී ඇති දූෂණ චෝදනාවකට වරදකරු වීම හේතුවෙනුයි ඉම්රාන් ඛාන්ට මෙම සිර දඬුවමක් නියම වී තිබේ.
ඉස්ලාමාබාද් නුවර පැවති නඩු විභාගයේදී හිටපු අගමැතිවරයාට වසර පහකට ක්‍රියාකාරී දේශපාලනයේ නිරතවීම ද තහනම් කර ඇති අතර ඒ අනුව ඉම්රාන් ඛාන් අත්අඩංගුවට ගැනීමට අධිකරණය වරෙන්තු නිකුත් කර ඇතැයි විදෙස් මාධ්‍ය වාර්තා කරයි.
හිටපු ක්‍රිකට් ක්‍රීඩකයෙකු ද වන 70 හැවිරිදි ඉම්රාන් ඛාන් සිය අග්‍රාමාත්‍ය ධුර කාලය තුළ විදේශීය ප්‍රභූවරුන්ගෙන් ලැබුණු ත්‍යාග නීති විරෝධී ලෙස විකිණීම සම්බන්ධයෙන් වැරදිකරු වී ඇත.
හිටපු අගමැතිවරයාගේ සහායකයින් ඩුබායිහිදී ඒවා අලෙවි කර ඇති බවට චෝදනා පවතින අතර එම තෑගි අතර රජ පවුලක් විසින් ලබා දුන් ඔරලෝසු ද ඇතුළත් බව සඳහන් වේ.
විනිසුරු හුමායුන් දිලාවාර් ප්‍රකාශ කළේ ඉම්රාන් ඛාන් දූෂිත ක්‍රියාවන්ට සම්බන්ධ බව ඔප්පු වී ඇති බවයි.
ඛාන් නඩු විභාගය සඳහා උසාවියේ පෙනී නොසිටි අතර ඔහුගේ නීතීඥයා ප්‍රකාශ කර ඇත්තේ හිටපු අගමැතිවරයා ලාහෝර්හිදී අත්අඩංගුවට ගෙන ඇති බවයි.
