ශ්‍රී ලංකාව සහ එක්සත් රාජධානිය ලන්ඩන් නුවර දී හෙට(18) උපායමාර්ගික සංවාදයක් පැවැත්වීමට සූදානම් වේ.
විදේශ කටයුතු ලේකම් අරුණි විජේවර්ධන මහත්මිය, ලන්ඩනයේ විදේශ පොදුරාජ්‍ය මණ්ඩලයීය හා සංවර්ධන කාර්යාලයේ (FCDO) පැවැත්වීමට නියමිත විදේශ ලේකම් මට්ටමේ ප්‍රථම එක්සත් රාජධානි-ශ්‍රී ලංකා උපායමාර්ගික සංවාදයට සහභාගි වනු ඇතැයි ශ්‍රී ලංකාවේ විදේශ කටයුතු අමාත්‍යංශය සදහන් කරයි.
FCDO හි එක්සත් රාජධානි රාජ්‍ය අමාත්‍ය ඈන් මාරි ට්‍රෙව්ලියන් මහත්මිය, මෙම සංවාදය ආරම්භ කිරීමට නියමිත අතර, එය FCDO හි නිත්‍ය උපලේකම් ශ්‍රීමත් පිලිප් බාර්ටන් මහතාගේ සහභාගිත්වයෙන් මෙහෙයවනු ලැබේ.
ශ්‍රී ලංකාව සහ එක්සත් රාජධානිය අතර රාජ්‍යතාන්ත්‍රික සබඳතා ස්ථාපිත කර වසර 75 ක් සපිරීමේ සංවත්සරය මෙම වසරේ දී සුවිශේෂී අයුරින් සනිටුහන් කෙරෙන බැවින්, FCDO හි ඇරයුමකට අනුව මෙම ප්‍රථම උපායමාර්ගික සංවාදය පවත්වනු ලැබේ.
දෙරට අතර පවත්නා බහුවිධ සබඳතා පිළිබඳව සාකච්ඡා කිරීම සඳහා වේදිකාවක් මෙම උපායමාර්ගික සංවාදය හරහා දෙපාර්ශ්වයට හිමි වේ.
විදේශ කටයුතු ලේකම් විජේවර්ධන මැතිනිය මෙම සංවාදයට සමගාමීව, පොදුරාජ්‍ය මණ්ඩලයේ සහකාර මහලේකම් මහාචාර්ය ලුයිස් ජී. ෆ්‍රැන්චෙස්කි මහත්මා සමඟ ද්විපාර්ශ්වික සාකච්ඡාවක් පවත්වනු ඇත. එමෙන්ම, සර්ව පාක්ෂික පාර්ලිමේන්තු කණ්ඩායමේ (APPG) සාමාජිකයින් සමඟ ද අන්තර් ක්‍රියා පවත්වනු ඇත.
