මීරිගම පොළ භූමියේදී ඊයේ (10) රාත්‍රී ඇති වූ ගැටුමකදී බරපතල කැපුම් තුවාල ලැබූ හැට හැවිරිදි එක්දරු පියකු ඒ ස්ථානයේදීම මරණයට පත්වී ඇතැයි මිරිගම පොලිසිය ප්‍රකාශ කරයි
මෙසේ මියගොස් ඇත්තේ මුගුරුගම්පොල නාල්ල පාරේ පදිංචිව සිටි එච් .පී. වල්ලික ප්‍රේමසිංහ නමැති පුද්ගලයෙකි.
මරණයට පත් වූ පුද්ගලයා සහ සැකකරු අතර කිසියම් සිද්ධියක් සම්බන්ධයෙන් ඇති වූ වචන හුවමාරුවක් දුරදිග යාමෙන් බහින්බස් වීමක් සිදු වී ඇත.
ඒ අවස්ථාවේ මියගිය අය සැකකරුට පහර දීමෙන් සැකකරු ගේ පාදයක සුළු තුවාලයක් ඇති වී ඇති බවත් ඒ අවස්ථාවේ කෝපයට පත් සැකකරු තියුණු ආයුධයකින් කළ පහර දීමෙන් මරණකරු බරපතළ තුවාල ලබා එම ස්ථානයේම මරණයට පත්වී ඇතැයි මූලික පොලිස් පරීක්ෂණවලදී හෙළිවී ඇත.
සිද්ධිය සම්බන්ධයෙන් සැකපිට අක්කර 20 ප්‍රදේශයේ පදිංචි කරුවකු අත් අඩංගුවට ගෙන ඇති අතර ඔහු 2021 වසරේ මාර්තු දහවෙනිදා සති පොළ භූමියේ දීම පොල්ලකින් පහර දී ඔහුගේ සහෝදරයා ඝාතනය කිරීමේ සිද්ධියේ සැකකරු බව ද හෙළිවී ඇතැයි පොලිසිය කියයි.
සහෝදරයා ගේ ඝාතනය සම්බන්ධයෙන් රිමාන්ඩ් භාරයේ සිටි සැකකරු ඉතා මෑතක දී ඇප මත නිදහස්ව පැමිණ සිටියදී මෙම සිදුවීමට මුහුණ දී ඇතැයිද අනාවරණය වී ඇත.
