කොළඹ ජාතික රෝහලේ සී ටී සහ පෙට් ස්කෑන් පරීක්ෂණ ඇන හිට ඇත්තේ එම යන්ත්‍රවල ගැටලුවක් නිසා නොව එම යන්ත්‍රය භාවිතයට අවශ්‍ය උපකරණ හා මූලද්‍රව්‍ය ගෙන්වීම සඳහා ජාතික ඖෂධ නියාමන අධිකාරියේ අධ්‍යක්ෂවරයාගේ අත්සන ප්‍රමාද කිරීම නිසා බව කොළඹ ජාතික රෝහලේ විකිරණ වෛද්‍ය විශේෂඥයෝ පවසති.
එම උපකරණ හා මූලද්‍රව්‍ය ගෙන්වීමට අදාළ ලිපි ලේඛන නිසි ක්‍රමවේදයන්ට අනුව අදාළ අංශ වෙත යොමු කර ඇතත් ඊට අනුමැතිය ලබා ගැනීමට මාස ගණනක් තිස්සේ බලා සිටීමට සිදු වී ඇති බවත් ඔවුහු පෙන්වා දෙති.
පෙට් ස්කෑන් යන්ත්‍රය සඳහා ඉන්දියාවෙන් ගෙන්වන විකිරණශීලි මූලද්‍රව්‍ය සඳහා වාරික වශයෙන් මුදල් නොගෙවීම හේතුවෙන් මේ වන විට ඒ වෙනුවෙන් රුපියල් මිලියන 40ක් ගෙවීමට ඇති බව පෙන්වා දෙන එම විකිරණ වෛද්‍ය විශේෂඥයන් පවසන්නේ ඒ හේතුවෙන් මාස දෙකක පමණ කාලයක සිට පෙට් ස්කෑන් පරීක්ෂණ ඇණහිට ඇති බවයි. සෞඛ්‍ය අමාත්‍යාංශ නිලධාරීන් වෙත කොතෙක් දැනුම් දුන්නත් මේ වන තුරු එම ගෙවීම් සිදු කර නොමැති බව ඔවුන් පවසයි. සාමාන්‍යයෙන් සතියකට පිළිකා රෝගීන් 20- 30ත් අතර සංඛ්‍යාවක් සඳහා පෙට් ස්කෑන් පරීක්ෂණ සිදු කරන බවත් මාස දෙකකට අධික කාලයක් තිස්සේ එය ඇණ හිටීම හේතුවෙන් ඔවුන්ගේ රෝගී තත්ත්වය තව දුරටත් උග්‍රවන බවත් ඔවුහු පෙන්වා දෙති.
