ශ්‍රී ලංකාවේ විස්තීරණ අරමුදල් පහසුකම පිළිබඳ ඉල්ලීම මාර්තු 20වැනිදා ජාත්‍යන්තර මූල්‍ය අරමුදල් මණ්ඩලයට ඉදිරිපත් කිරීමට කටයුතු කරන බව එහි කළමණාකාර අධ්‍යක්ෂිකා ක්‍රිස්ටලීනා ජෝජීවා මහත්මිය ට්විටර් පණිවිඩයක් නිකුත් කරමින් සඳහන් කරයි.
ඒ අනුව, ජාත්‍යන්තර මූල්‍ය අරමුදල් වැඩසටහන සඳහා ඇතුළත් වීමට හැකි වීම සම්බන්ධයෙන්, මුදල් රාජ්‍ය අමාත්‍ය ශෙහාන් සේමසිංහ මහතා සිය නිල ට්විටර් ගිණුමේ සටහනක් තබමින් මෙසේ සඳහන් කරයි.
“විස්තීරණ අරමුදල් පහසුකම් (EFF) සඳහා ශ්‍රී ලංකාවේ ඉල්ලීම සලකා බැලීමට 2023 මාර්තු 20 වන දින ජාත්‍යන්තර මූල්‍ය අරමුදලේ විධායක මණ්ඩල රැස්වීමක් පැවැත්වීම එහි කළමනාකාර අධ්‍යක්ෂිකා ක්‍රිස්ටලීනා ජෝජිවා මහත්මිය විසින් නිවේදනය කිරීම අපි සාදරයෙන් පිළිගනිමු. මෙම කාලසීමාව තුළ අපගේ සියලුම ද්විපාර්ශ්වික ණය හිමියන් මෙම වැදගත් සන්ධිස්ථානය සාක්ෂාත් කර ගැනීම සඳහා අවශ්‍ය මූල්‍ය සහතික ලබා දීම වෙනුවෙන් ස්තූති කිරීමට කැමැත්තෙමු.
රාජ්‍ය ණය තිරසාරභාවය ඇති කරගැනීමට සහ වඩාත්ම අවදානමට ලක්විය හැකි පුද්ගලයන් ආරක්ෂා කිරීමට අත්‍යවශ්‍ය වන ජාත්‍යන්තර මුල්‍ය අරමුදලේ සහ ජාත්‍යන්තර මූල්‍ය ආයතන වෙතින් ශ්‍රී ලංකාවට ඇමරිකානු ඩොලර් බිලියන 7 ක් දක්වා අරමුදල් ලබා ගැනීමට ඉඩ සලසන මෙම වැඩසටහන සඳහා කඩිනම් අනුමැතියක් බලාපොරොත්තු වෙමු. රට තුළ ආර්ථික ස්ථාවරත්වය සහ සමාජ සුබසාධනය ළඟා කර ගැනීම සඳහා රජය සිය ආර්ථික ප්‍රතිසංස්කරණ වැඩපිළිවෙල අඛණ්ඩව ක්‍රියාත්මක කරනු ඇත.”
