සේවක අර්ථසාධක අරමුදල, පාරිතෝෂික දීමනා ඇතුළු සේවකයන්ට ලබාදිය යුතු දීමනා ලබා නොදුන් ආයතන 24,357කට එරෙහිව නඩු පවරා ඇතැයි කම්කරු කොමසාරිස් ජනරාල් නීතිඥ ප්‍රභාත් චන්ද්‍රකීර්ති සිළුමිණට කීය. ඒ අතුරින් සේවක අර්ථසාධක නොගෙවූ ආයතන 15,844ක් තිබෙන බවද ඔහු පෙන්වා දුන්නේය.
පසුගිය 2022 වසරේ පමණක් එසේ නඩු පවරන ලද ආයතන සංඛ්‍යාව 3,335ක් බවද කොමසාරිස් ජනරාල්වරයා කීය. 2022 වසර ආරම්භ වන විට එසේ සේවකයන්ට ගෙවීමට අදාළ ආයතන වලින් ලබා ගත යුතු වූ මුදල රුපියල් රුපියල් බිලියන 8ක් දක්වා ඉහළ නැඟ ඇති බවද ඔහු පෙන්වා දුන්නේය. එයින් අර්ථසාධක වෙනුවෙන් ගෙවීමට ඇති මුදල රුපියල් බිලියන 5ක් බවද ඔහු කීය. පසුගිය වසර තුළදී සේවක අර්ථසාධක නොගෙවූ නඩු 1690ක් අවසන් කර ඇතැයිද එයින් රුපියල් මිලියන 575ක් අය කරගත් බවද ඔහු පෙන්වා දුන්නේය. එමෙන්ම පාරිතෝෂික පනත යටතේ පවරන ලද නඩු 999ක් අවසන් කළ බවත් එයින් රුපියල් මිලියන 227ක්ද අය කරගත් බවත් ඔහු අවධාරණය කෙළේය.
යම් ආයතනයක් සේවකයකුගේ අර්ථසාධකය මාස 6කට වඩා කාලයක් නොගෙවා සිටියහොත් ගෙවීමට ඇති අර්ථසාධක අරමුදලට වඩා 50%ක අධිභාරයක් අය කර ගන්නා බවද ප්‍රභාත් චන්ද්‍රකීර්ති මහතා වැඩිදුරටත් අවධාරණය කෙළේය.
