බෞද්ධ සංවිධාන හා නා හිමිවරුන් ඇතුළු පිරිස් විසින් කාලාන්තරයක් තිස්සේ කරන ලද දැනුම් දීම්හි ප්‍රතිඵලයක් ලෙස දිවයින පුරා අලෙවි කරන අටපිරිකර සහ පූජා භාණ්ඩ අලෙවි ප්‍රමිතිය සොයා බැලීමේ වැටලීම් පසුගිය සතියේ ආරම්භ කළ බව පාරිභෝගික අධිකාරියේ නිලධාරියෙක් සිළුමිණට කීය.
මෙහි ආරම්භක පියවර කොළඹ නගරය කේන්ද්‍ර කරගෙන කොළඹ දිස්ත්‍රික්කයෙන් ආරම්භ කළ බවත් ඉදිරියේදී සෙසු පළාත්වලද වැටලීම් කරනු ලබන බවත් එම ප්‍රකාශකයා කීය. ත්‍රෛනිකායික නාහිමිවරුන් හා බෞද්ධ කටයුතු කොමසාරිස් ජනරාල්වරයා විසින් කරන ලද දැනුම් දීම් මත මෙම වැටලීම් සිදු කර ඇත.
කාලයක් තිස්සේ අටපිරිකර හා පූජා භාණ්ඩ ප්‍රමිතිය පරීක්ෂා කිරීම පිළිබඳ කථිකාවක් නිර්මාණය වුවත් වැටලීම් සිදු කිරීම පමා වූයේ අටපිරිකර ප්‍රමිතිය පිළිබඳ නිසි නිර්ණායක ලැබීම පමා වීම නිසා බවද එම නිලධාරියා හෙළි කෙළේය.
