ඉතිහාසයේ ප්‍රථම වතාවට ගාලු මුවදොර මුහුදු වෙරළ තීරයට කැස්බෑවුන් බිත්තර දැමීමට දැන් විශාල වශයෙන් පැමිණෙති. මෙයට හේතුව වන්නේ කොළඹ වරාය ඉදිවීමෙන් අනතුරුව එහි ඇති වූ පාරිසරික වෙනස්කම්ය.
ලොව කැස්බෑ වර්ග 7 ක් අතුරින් විශේෂ 5 පමණක් ශ්‍රී ලංකා වෙරළ තීරයට පැමිණෙන අතර මේ වන විට ගාලු මුවදොර මුහුදු තීරයේ සිට ගල්කිස්ස දක්වා වෙරළ තීරයේ බිත්තර දමා ඇත්තේ බටු කැස්බෑවුන්ය. මෙම බටු කැස්බෑවුන් බිත්තර 20,379 ක් මාර්තු මස 2 වැනිදා වන විට දමා තිබූ අතර, එයින් 2000 කට ආසන්න ප්‍රමාණයක් නිදහස් වී මුහුදට ගොස් තිබුණි.
ප්‍රථම වරට ගාලු මුවදොර ඉදිකර ඇති කැස්බෑ සංරක්ෂණ මධ්‍යස්ථානයේ බිත්තර 1,880 ක් මේ වන විට සංරක්ෂිතව ඇති අතර, එයින් බිහිවූ පැටවුන් මාර්තු 3 වැනි දා ජාත්‍යන්තර වනජීවි දිනය වෙනුවෙන් ගැඹුරු මුහුදට මුදා හැරුණි.
ඒ අවස්ථාවට නාවුක හමුදාපති වයිස් අද්මිරාල් ප්‍රියන්ත පෙරේරා, බ්‍රිතාන්‍ය නියෝජ්‍ය මහ කොමසාරිස්තුමිය වන ලීසා වන් ස්ටෝල්, වන ජීවී හා වන සංරක්ෂණ අමාත්‍යාංශයේ ලේකම් චන්ද්‍රා හේරත්, ආචාර්ය ජගත් ගුණවර්ධන, ඇතුළු පිරිසක් එක්ව සිටියහ.
සේයාරුව - දුෂ්මන්ත මායාදුන්න
