කෙන්යාවට කඩා වැදුණූ මහා පළඟැටි සේනාවක් මේ වන විට එරට වගා බිම් විනාශ කර දමමින් සිටින බව වාර්තා වේ. මීට පෙර මෙවන් ව්‍යසනයක් එරටින් වාර්තා වී ඇත්තේ මීට වසර 70කට පෙරදීය. මේ පළඟැටියන් කාන්තාර පළඟැටියන් නම් වන විශේෂයක් ලෙස හඳුනාගෙන තිබේ. ඔවුන් වරින්වර ඉතා විශාල රංචු වශයෙන් ආහාර තිබෙන ප්‍රදේශ කර මෙලෙස සංක්‍රමණය වන අතර ආහාර ලබා ගනිමින් තම වර්ගයා බෝ කිරීමද එම ප්‍රදේශයේදීම ඉටු කර ගනිති. ඒ අනුව ඉදිරියේදී මේ සතුන් කෙන්යාවේ වගා බිම් ආශ්‍රිතව බිත්තර දැමීමටද නියමිතය. ඒ අනුව ලබන ජූනි මස වන විට මේ සතුන් ප්‍රමාණය සියයට 500කින් ඉහළ යනු ඇතැයි අපේක්ෂා කෙරේ. එය කෙන්යාවට පමණක් නොව අසල්වැසි රටවල් රැසකටද බලවත් ව්‍යසනයක් වනු ඇති බවට තොරතුරු ලැබෙමින් පවතී. ඒ අනුව පළඟැටියන්ගේ වර්ධනය අනුව ඉදිරියේදී ඔවුන් ඉතියෝපියාව, කෙන්යාව, සෝමාලියාව පමණක් නොව උගන්ඩාව සහ දකුණු සූඩානයටද ව්‍යප්ත වනු ඇතැයි අපේක්ෂා කෙරේ.
දැනට කෙන්යාවේ ව්‍යප්තව සිටින පළඟැටියන් ප්‍රමාණය දිනකට ගිලදමන ආහාර ප්‍රමාණය මිනිසුන් 35000ක් එක් දිනකදී ගන්නා ආහාර ප්‍රමාණය හා සමාන වන බව එක්සත් ජාතී්න්ගේ සංවිධානය නිකුත් කර ඇති වාර්තා මගින් ප්‍රකාශ වේ.
කෙන්යාව පුරා මෙවැනි පළඟැටි රංචු විශාල සංඛ්‍යාවක් පැතිර සිටින අතර මේ එක් පළඟැටි රංචුවක සිටින පළඟැටියන් සංඛ්‍යාව මධ්‍යම ලන්ඩන් නගර ප්‍රදේශය වසා දැමීමට තරම් ප්‍රමාණවත් බව ප්‍රකාශ වී තිබේ. සංඛ්‍යාත්මකව ගත හොත් මේ එක් පළඟැටි රංචුවක වර්ග කිලෝමීටරයක් තුළ පළඟැටියන් මිලියන 150ක් පමණ අන්තර්ගතව සිටිති. මිලියන බාගයක පළඟැටියන්ගේ බර ටොන් එකක් ලෙස ගණනය කර තිබේ. ටොන් එකක පළඟැටියන් දිනකදී ගන්නා ආහාර ප්‍රමාණය අලින් 10ක්, ඔටුවන් 25ක් සහ මිනිසුන් 2500ක් ලබා ගන්නා ආහාර ප්‍රමාණය හා සමාන වේ.
මේ සතුන්ට දිනකදී විනාශ කර දැමිය හැකි අස්වනු ප්‍රමාණය ටොන් 200කි.
පළඟැටියන්ගේ ආක්‍රමණයක් සමග තම වගා බිම් විනාශ වීමෙන් කෙන්යානු ජාතිකයන් මිලියන 25.5ක් පමණ ආහාර හිඟයකින් පසුවන බව වාර්තා වේ. ඉතියෝපියාවට විශේෂයෙන් මේ තත්ත්වය අභියෝගයක් වනු ඇත්තේ වසර කිහිපයක සිට එරට දිගින් දිගටම මුහුණ දුන් ස්වභාවික ව්‍යසන හේතුවෙනි.
මීට අමතරව තම සතුන් පළඟැටියන්ගෙන් ආරක්ෂා කර ගැනීමද කෙන්යානු වැසියන්ට අභියෝගයක් වී තිබේ. බූරුවන් වැනි සතුන් මේ පළඟැටියන්ගේ දශ්ඨ කිරීමෙන් මරණයට පත්වන අතර ඔවුන් බේරා ගැනීම සඳහා මේ සතුන්ට ඇඳුම් ඇන්දවීම වැනි ක්‍රියාමාර්ග උත්සාහ කර බැලීමට කෙන්යානු වැසියන් කටයුත කරමින් සිටිති.
