ජනපතිවරණයෙන් පසු ‘සජිත් ප්‍රේමදාස ගමින් ගමට ජනතාව මුණගැසීම’ නමින් ජනරැලි මාලාවක් අරඹා තිබෙනවා. ඇයි මෙවැනි ජනරැලි මාලාවක් ඇරඹීමට හිතුවේ?
සජිත් ප්‍රේමදාස මහතා සිදු කරන්නේ ඉතා වැදගත් කටයුත්තක්‍. ඔහු ජනාධිපතිවරණයේදී ජනරැලි එකසිය පනහකට වඩා ඇමැතුවා. ඒ වගේ ම සජිත්ට මේ රටේ ලක්ෂ පනස් පහක පමණ ජනතාව ඡන්දය ලබාදී තිබෙනවා. එය ප්‍රතිශතයක් ලෙස සියයට හතළිස් එකයි දශම නවයයි නවයක් වෙනවා. ඉතිං මේ ඡන්දය ලබාදුන් ජනතාවට ස්තුති කරන්නයි මෙවැනි ජනරැලි මාලාවක් ඇරඹුවේ. මැතිවරණ ඉතිහාසය තුළ කිසිදු පරාජිත අපේක්ෂකයෙක් තමාට ඡන්දය දුන් ජනතාවට ස්තුති කරන්න ජන රැලි පවත්වා නෑ. මේ තමයි පළමු අවස්ථාව. අපිට ඡන්දය දුන් ජනතාව ළඟටම ගිහින් ස්තුති කිරීම කෘතගුණ සැලකීමක් ලෙස සජිත් ප්‍රේමදාස මහතා දකිනවා. ඒ නිසයි මෙවැනි ජනරැලි මාලාවක් ඇරඹුවේ කොළඹ, ගම්පහ, කළුතර ඇතුළු දිවයිනේ සියලුම මැතිවරණ කොට්ඨාසවලට ගොස් ස්තුති කරන්න සජිත් ප්‍රේමදාස මහතා අපේක්ෂා කරනවා.
ජනපතිවරණයෙන් පසු සජිත් ප්‍රේමදාස මහතා සිය දුරකතනත් විසන්ධි කරගෙන යාල කැලයට වී සිටි බවට චෝදනාවක් ආණ්ඩු පක්ෂයෙන් නගනවා. ඒ ගැන මොකද කියන්නේ?
ආණ්ඩු පක්ෂය ඒ ගෙනියන්නේ බොරු මඩ ප්‍රචාරයක්. එහි කිසිදු සත්‍යතාවක් නෑ. සජිත් ප්‍රේමදාස මහතා කීපවරක් ම අපේ පාර්ලිමේන්තු මන්ත්‍රීවරුන් හමුවුණා. රැස්වීම් ගණනාවක් තිබ්බා. මැතිවරණය පිළිබඳ අපේ අදහසුත් අරන් තමයි ස්තුති ජනරැලි පවත්වන්නේ.
පක්ෂ නායකත්වය නොමැතිව අගමැති අපේක්ෂකත්වය බාර නොගන්නා බව සජිත් ප්‍රේමදාස මහතා මාධ්‍යයට පවසා තිබුණා. මේ ප්‍රකාශය ගැන එජාපයේ ම ඇතැමුන් කියන්නේ සජිත් මස් රාත්තලම ඉල්ලන බවයි. ඊට ඔබේ පිළිතුර කුමක්ද?
සජිත් ප්‍රේමදාස මහතා ජනාධිපති අපේක්ෂකයා වී තරග කරන කොටත් ඔහුගේ කොන්දේසියක් තිබුණා පක්ෂ නායකත්වයත් ලැබිය යුතුයි කියලා. මැතිවරණයකට නායකත්වය දෙන විට ඉතා පැහැදිලිවම පක්ෂ නායකත්වය තිබිය යුතුයි. අගමැති අපේක්ෂකයා ලෙස තමයි ඉදිරියට තරගය තියෙන්නේ. ජනපතිවරණයේ සජිත් ප්‍රේමදාස මහතාට පක්ෂ නායකත්වය තිබුණා නම් මීට වඩා හොඳ ප්‍රතිඵලයක් ගන්න තිබුණා. පක්ෂ යාන්ත්‍රණයට නායකත්වය ලබාදීමට හා පක්ෂය මෙහෙයවීමට නායකත්වය අත්‍යාවශ්‍ය කාරණයක්. මැතිවරණයකට මුහුණ දෙනකොට පක්ෂ නායකත්වය නොමැති වුණොත් එය සාර්ථක වෙන්නේ නෑ.
ඒත් 2015 මෛත්‍රීපාල සිරිසේන මහතා තරග කොට ජයගත් ඡන්දයේදී ඔහුට එජාප නායකත්වය හෝ ශ්‍රී ලංකා නිදහස් පක්ෂ නායකත්වයක් තිබුණේ නෑ. එනමුත් මැතිවරණය ජය ගත්තා. එතකොට ඔබේ තර්කයට වලංගුභාවයක් තිබේද?
ඒක වෙනස් ම අවස්ථාවක්. එතනදී මෛත්‍රීපාල සිරිසේන මහතා එජාප අපේක්ෂකයෙක් නෙවේ. පොදු අපේක්ෂකයෙක්. ඒ නිසා ඔහුට එජාප නායකත්වය කොහොමටවත් ලබා දෙන්න බෑනේ. ඒත් සජිත් ප්‍රේමදාස මහතා එජාපයේ නියෝජ්‍ය නායකයා. රනිල් වික්‍රමසිංහ මහතාත් කියලා තිබෙනවා එජාප නායකත්වය තරුණ පිරිසකට බාර දෙනවා කියලා. රනිල් වික්‍රමසිංහ මහතාට පසු ජනතාව ඉල්ලන එකම නායකයා සජිත් ප්‍රේමදාසයි. එජාපයේ ඒ තැන ගන්න වෙනත් අයකු නෑ. මැතිවරණයක් ජය ගන්න සජිත් ප්‍රේමදාස මහතාට පක්ෂ නායකත්වයක් ලබා දීම ඉතාමත් සුදුසු බව මා පෞද්ගලිකව හිතනවා.
එක්සත් ජාතික පක්ෂය මෙහෙයවීමට කරු ජයසූරිය මහතාගේ ප්‍රධානත්වයෙන් නායකත්ව මණ්ඩලයක් ගෙන ඒමට එක්සත් භික්ෂු පෙරමුණ නව අදහසක් ගෙන එනවා. ඒ අදහස ගැන මොකද කියන්නේ.
ඒක එක්සත් භික්ෂු පෙරමුණේ මතය වෙන්න ඇති. ඒත් හැබැයි ඒක එක්සත් ජාතික පක්ෂයේ බහුතර මතය නෙවෙයි. බහුතර පාර්ලිමේන්තු මන්ත්‍රීවරුන් පිරිසක් ඉන්නේ සජිත් ප්‍රේමදාස මහතාට පක්ෂ නායකත්වය ලබාදිය යුතුයි කියන මතයේයි.
ජනාධිපතිවරණයේ ප්‍රචාරක කටයුතු සිදු කිරීම සඳහා සජිත් ප්‍රේමදාස මහතා රුපියල් මිලියන 260 ක් පමණ ණය වී තිබෙන බව කියන කතාවේ ඇත්ත නැත්ත මොකක්ද?
මැතිවරණයක් සංවිධානය කරන කොට ඊට විශාල මුදලක් වැය වෙනවා. සජිත් ප්‍රේමදාස මහතාටත් විශාල මුදලක් වැය වෙන්න ඇති. ඔහු එහෙම ප්‍රකාශයක් කරලා තියනවා නම් එය නිවැරැදි ඇති. මා නම් එහි අගක් මුලක් දන්නේ නෑ.
මේ මැතිවරණයේදී මුදල් ලැබුණු ආකාරය හා ඒවා වියදම් කළ ආකාරය පිළිබඳ යම් යම් පාර්ශ්ව අතර මතවාද පවතිනවා. මැතිවරණයට ලැබුණු මුදල් වියදම් නොකර පිල්ලි ගැහුවා කියන චෝදනාවට ඔබේ පිළිතුර කුමක්ද?
මා පෞද්ගලිකව ඒ ගැන නම් ඇත්තටම දන්නේ නෑ. මා මුදල් එකතු කළෙත් නෑ. වියදම් කළෙත් නෑ. මුදල් කමිටුවේ මා හිටියේ නෑ.
එජාප නායක රනිල් වික්‍රමසිංහ මහතා පවසා තිබුණා සියලුම ජනමත සමීක්ෂණවලින් සජිත් හිටියේ පසුපසින් කියලා. ඉන් ගම්‍ය වන්නේ සජිත්ගේ පරාජය එජාප නායකයා කලින් දැන සිටි බව නේද?
සජිත් ප්‍රේමදාස මහතා පාස්කු ත්‍රස්ත ප්‍රහාරයට ප්‍රථමයෙන් ගෝඨාභය රාජපක්ෂ මහතාට වඩා ඉදිරියෙන් හිටි බව කවුරුත් දන්නවා. පාස්කු බෝම්බ ප්‍රහාරයෙන් පසුව තමයි සජිත් ප්‍රේමදාස මහතා අබිබවා ගෝඨාභය රාජපක්ෂ මහතා ඉදිරියට පැමිණියේ. ඊට පසුව කළ සමීක්ෂණ කීපයෙන් ම ගෝඨාභය රාජපක්ෂ මහතා ඉදිරියෙන් හිටියා.
එහෙම නම් සජිත්ගේ ජයග්‍රහණය සඳහා එජාප නායක රනිල් වික්‍රමසිංහ මහතා ගන්නා ලද උත්සාහය පිළිබඳ සෑහීමකට පත් විය හැකිද?
ඒකට පක්ෂ නායකයා විතරක් වගකිව යුතු නෑ. අපි බලාපොරොත්තු වූ අන්දමින් ඒ කටයුත්ත ඉටු කරන්න ඒ ඉලක්කයට යන්න අපි කාටත් බැරි වුණා. පක්ෂ නායකයාට විතරක් දොස් නොකියා ඒ වගකීම අපි කවුරුත් බාරගන්න ඕනෑ.
ඔබ නියෝජනය කරන දොම්පේ ආසනයත් විශාල පරාජයක් ලැබුවා. ඇයි එහෙම වෙන්න හේතුව?
දොම්පෙට පමණක් නොවේ ගම්පහ දිස්ත්‍රික්කයේ අත්තනගල්ල, මහර, ගම්පහ ආදී සිංහල බෞද්ධ ඡන්දදායකයන් වැඩි පිරිසක් සිටින ආසනවල එවැනි පරාජයන් ලැබුවා. ඊට මූලිකම හේතුව අපෙන් සිංහල බෞද්ධ පදනම ගිලිහී යෑමයි.
ජනපතිවරණයේදී ඔබ පක්ෂයෙන් ගිලිහී ගිය ඡන්ද මහ මැතිවරණයේදී යළි ලබා ගැනීමට ඔබ පක්ෂය අනුගමනය කරන උපාය උපක්‍රම මොනවාද?
අපි නැවත බිම් මට්ටමින් සියලු සංවිධාන කටයුතු කරන්න බලාපොරොත්තු වෙනවා. ඒ වගේ ම පක්ෂ නායකත්වයේ සිට පක්ෂයේ ප්‍රතිරූපය ඉහළ දමන්නටත් ප්‍රතිසංවිධාන කටයුතු කරන්නත් සූදානම්ව සිටිනවා.
වත්මන් ආණ්ඩුව අනවශ්‍ය වියදම් කපා හරිමින් සිටිනවා. ඒ අතර කෘෂිකර්ම අමාත්‍යාංශය පවත්වාගෙන ගිය මසකට කෝටි දෙකක් කුලිය ගෙවන බිල්ඩිම නැවත බාරදී කෘෂිකර්ම අමාත්‍යාංශය කලින් තිබුණු තැනටම ගෙනියන්න තීරණය කර තිබෙනවා. මේ සාධනීය පියවරයන් ගැන එජාපයේ මන්ත්‍රීවරයකු ලෙස ඔබේ අදහස කුමක්ද?
කෘෂිකර්ම අමාත්‍යාංශයේ කටයුතුවලදී පමණක් නොවෙයි සමස්තයක් හැටියට එය හොඳ ක්‍රියාවක් ලෙස මා දකිනවා. නමුත් කෘෂිකර්ම අමාත්‍යාංශය කලින් තිබූ ගොඩනැගිල්ල සකස් කළේ ආංශික කාරක සභා පිහිටුවලා පාර්ලිමේන්තු ක්‍රමය ශක්තිමත් කිරීමටයි. ඒත් අන්තිමට පාර්ලිමේන්තු ක්‍රමය ශක්තිමත් කිරීමේ කාර්ය මේ නිසා අහිමි වෙනවා. පාර්ලිමේන්තු ක්‍රමය ශක්තිමත් කරනවා කියන්නේ ජනතාව පාලනයට සම්බන්ධ කර ගැනීමයි. ඒ අධිකරණ කාරක සභා අක්‍රීය කිරීම කනගාටුදායකයි.
මේ වසරේ දෙසැම්බර් 31 වැනිදාට ප්‍රථම කෘත්‍යාධිකාරි මණ්ඩලය කැඳවන ලෙසට එජාප මන්ත්‍රීන් 27 දෙනෙකුගේ අත්සන් සහිතව රනිල් වික්‍රමසිංහ මහතාට ලිපියක් බාරදී තිබෙනවා. ඒ අනුව ඉදිරියේදී කෘත්‍යාධිකාරි මණ්ඩලය කැඳවයිද?
දැනට නම් කෘත්‍යාධිකාරි මණ්ඩලය කැඳවනවා කියන පණිවුඩයක් අපිට දීලා නෑ. මං හිතන්නේ නෑ එදිනට පෙර කැඳවයි කියලා.
එහෙම වුණොත් ඉදිරියේදී කුමක් සිදුවෙයිද?
අපි සාකච්ඡා මාර්ගයෙන් මේ ප්‍රශ්නය විසැදේවි යැයි හිතනවා.
එජාප කෘත්‍යාධිකාරි මණ්ඩලයේ බහුතර පිරිසක් දැනට දිනාගෙන ඉන්නේ රනිල් වික්‍රමසිංහ පාර්ශ්වයද සජිත් ප්‍රේමදාස පාර්ශ්වයද?
මා කෘත්‍යාධිකාරි මණ්ඩල සභිකයෙක් නොවේ. ඒ ගැන ලොකු අවබෝධයක් මට නෑ. ඒත් සාමාන්‍ය ජනතාවගෙන් බහුතරයක් සිටින්නේ සජිත් සමඟයි.
ඔබ එජාප පාර්ලිමේන්තු මන්ත්‍රීවරයෙක් වෙලත් ඇයි කෘත්‍යාධිකාරි මණ්ඩලය තුළ නියෝජනයක් නැත්තේ.
මටත් ඒක ලොකු ගැටලුවක්.
19 වැනි ආණ්ඩුක්‍රම ව්‍යවස්ථාව අනිවාර්යයෙන් ම අහෝසි කළ යුතු බව ජනාධිපති ගෝඨාභය රාජපක්ෂ මහතා කියනවා. ඉදිරියේදී ඒ පිළිබඳ සහාය දීමට එජාපය සූදානම්ද?
එජාපය 19 වැනි සංශෝධනය ගෙන ඒමට මූලිකත්වය ගෙන කටයුතු කළා. මෙමඟින් ජනපතිවරයාගේ බලතල සීමා කිරීමක් සිදුකර තිබෙනවා.
ඒත් 19 වැනි ආණ්ඩුක්‍රම ව්‍යවස්ථාවේ අඩුපාඩු තියනවා නම් ඒ ගැන සාකච්ඡා කරන්න අපි එකඟයි. ඒත් 19 මුළුමනින් ම අහෝසි කරන්න අපි එකඟ නෑ.
