පසුගියදා පැවති මහා මැතිවරණයෙන් බ්‍රිතාන්‍යයේ පාලක කන්සර්වටිව් පක්ෂයට විශිෂ්ඨ ජයක් හිමි වී තිබේ. බ්‍රිතාන්‍යයේ පාර්ලිමේන්තුවේ ආසන 650ක් පවතින අතර මැතිවරණයක් ජයග්‍රහණය කිරීම සඳහා ඉන් බහුතර ආසන සංඛ්‍යාවක් එනම් ආසන 326ක් ලබා ගත යුතුය.
මෙවර ප්‍රතිඵල නිකුත් වීම ඇරඹී පැය කිහිපයක් ඉක්ම යත්ම කන්සර්වටිව් පක්ෂය ඉදිරියෙන් සිටින බව පැහැදිලිව දක්නට විය. ආසන 480ක ප්‍රතිඵල නිකුත් වී අවසන් වන විට කන්සර්වටිව් පක්ෂය ආසන 244ක් සහ ලේබර් පක්ෂය ආසන 163ක් ද ජයග්‍රහණය කර තිබිණි. සෙසු ආසන සුළු පක්ෂ විසින් ජයග්‍රහණය කර තිබිණි.
මැතිවරණ ප්‍රතිඵල සම්පූර්ණයෙන් නිකුත් වීමට පෙර බීබීසී ආයතනය විසින් පළ කරන ලද අනාවැකියකින් ප්‍රකාශ වූයේ කන්සර්වටිව් පක්ෂය ආසන 362ක් සහ ලේබර් පක්ෂය ආසන 199ක්ද දිනා ගනු ඇති බවය.
මේ අතර ප්‍රතිඵල නිකුත් වීම ඇරඹීමෙන් පසුව ලේබර් පක්ෂ නායක ජිම් කෝබට් පවසා තිබුණේ ‘මේ ලේබර් පක්ෂ සාමාජිකයන්ට ඉතා කණගාටුදායක රාත්‍රියක්‘ බවයි. ලේබර් පක්ෂය 2017 වසරේ දී ජයග්‍රහණය කිරීමට සමත් වූ ආසන පවා මෙවර ඔවුන්ට අහිමි වී තිබිණි.
ජයග්‍රාහී කන්සර්වටිව් පක්ෂය ඉදිරියටත් බ්‍රෙක්සිට් ක්‍රියාත්මක කිරීම ඇතුළු තම වැඩපිළිවෙළ ඉදිරියට ගෙන යනු ඇති බවටද අනාවැකි ප්‍රකාශ වී තිබේ.
