මුහුදු පතුලේ ස්ථාපනය කෙරෙන ආපන ශාලාව (Underwater Restaurant) ශ්‍රී ලංකාවේ කොළඹ ඩොක්යාර්ඩ් ආයතන පරිශ්‍රයේදී පසුගියදා ඉදි කරනු ලැබීය. එහි ඉදිකිරීම් කටයුතු ක්ෂේත්‍රයේ කටයුතු කරන ප්‍රකට ශ්‍රී ලාංකික සමාගමක් වන AKDA ඉංජිනියර්ස් පෞද්ගලික සමාගම විසින් සිදු කරන ලදී. ඒ අනුව සිය නවතම ව්‍යාපෘතිය ලෙස මාලදිවයිනේ සංචාරක ව්‍යාපාරය ප්‍රවර්ධනය සදහා වූ මුහුදු පතුලේ ස්ථාපනය කෙරෙන Uthuru Maafaru Underwater Restaurant සාර්ථක ලෙස ඉදිකර අවසන් කර තිබේ.
මෙහි ඇති විශේෂත්වය නම් AKDA ඉංජිනියර්ස් පෞද්ගලික සමාගම මෙම ඉදිකිරීම් කටයුත්ත සම්පූර්ණයෙන් නිමවා තිබෙන්නේ ශ්‍රී ලාංකික ඉංජිනේරුවන් හා නිර්මාණ ශිල්පීන්ගේ දායකත්වයෙන් යුතුවයි. කොළඹ ඩොක්යාර්ඩ් ආයතන පරිශ්‍රයේදී සියලු ඉදිකිරීම් කටයුතු සිදු කර තිබේ. තවත් ප්‍රකට ශ්‍රී ලාංකික සමාගමක් වන අක්බාර් බ්‍රදර්ස් පෞද්ගලික සමාගම සදහා මෙම ඉදිකිරීම් කටයුත්ත AKDA ඉංජිනියර්ස් පෞද්ගලික සමාගම විසින් සිදු කර ඇති අතර මේ සම්බන්ධව මාධ්‍ය දැනුවත් කිරීම සදහා කොළඹ ඩොක්යාර්ඩ් ආයතන පරිශ්‍රයේදී පැවැති මාධ්‍ය හමුවේදී අනාවරණය වූයේ මෙහි ඉදි කිරීම් කටයුතු සදහා මාස 04ක පමණ කාලයක් පමණක් ගත වී ඇති බවයි. තවද AKDA ඉංජිනියර්ස් පෞද්ගලික සමාගම විසින් තවත් මෙවැනි ඉදිකිරීම් රැසක්ම මාලදිවයිනේ සංචාරක ව්‍යාපාරය සමග කටයුතු කරන ආයතනයන්හී ඉල්ලීම මත ඉතා සාර්ථක ලෙස සිදු කර ඇති බවද මෙහිදී අනාවරණය විය.
අක්බාර් බ්‍රදර්ස් පෞද්ගලික සමාගම සදහා AKDA ඉංජිනියර්ස් පුද්ගලික සමාගම මගින් ඉදි කරන ලද Uthuru Maafaru Underwater Restaurant මාල දිවයින සදහා නිල වශයෙන් බාර දීමෙන් පසු එය පසුගියදා මාලදිවයින සදහා රැගෙන ගියේය. එරට මුහුදු පතුලේ ස්ථාපනය කෙරෙන මෙම Underwater Restaurant සංචාරකයින් සදහා විවෘත කිරීමටද නියමිතව තිබේ. මෙම අවස්ථාවේදී අදහස් දැක් වූ AKDA ඉංජිනියර්ස් පෞද්ගලික සමාගමේ සභාපති හා කළමනාකරන අධ්‍යක්ෂ ඉංජිනේරු ඒ.කේ.දියබලනගේ මහතා සදහන් කර සිටියේ මාලදිවයින සදහා තම ආයතනය මගින් ඉදි කිරීම් රැසක්ම සිදු කර ඇති බවයි.එරට පිහිටි ජාත්‍යන්තර ගුවන්තොටුපළ, අභ්‍යන්තර ගුවන්තොටුපළවල් හා වරාය ආශ්‍රිතව සිදු කළ ව්‍යාපෘති රැසකටම තම ආයතනය දායකත්වය ලබා දුන් බවද සදහන් කළ ඒ මහතා 1983 වසරේදී ආරම්භ වූ තම සමාගම ඉදිරියේදී තවත් ඉදිකිරීම් ව්‍යාපෘති රැසක් සදහා සිය දායකත්වය ලබා දෙන බවද සදහන් කළේය.
ඡායාරූපය-සරත් පීරිස්
