“මගේ රාජා මේ පෙරහැරේ ගමන් කළ පළමුවැනි වතාව නොවේ. පසුගිය අවුරුදු විසිහයක් මුළුල්ලේ නොකඩවා වර්ෂයක් පාසා පෙරහැරට සහභාගි වූ රාජා හැමදාම ගමන් කළේ මාළිගවේ පෙරහැරේ ය. එහෙත් එතුවක් මෙතුවක් පෙරහැරේදී රාජා කිසි ම කලබලයක් කළ දිනක් මට නම් මතක නැත. පසුගියදා රාජා කළේ යයි කියන කලබලය ම පුදුම සහගත ය. ඒ තරමට ම රාජා හික්මුණු අලියකු වී සිටියේය...” යනුවෙන් එස්.බී. උඩුරාවණ මහතා 1959 අගෝස්තු 31 වැනි සඳුදා දිනමිණ පුවත්පතට ප්‍රකාශ කර තිබුණේ ඒ වසරේ අගෝස්තු 19 වැනි බදාදා රාත්‍රියේ පැවැත්වූ මහනුවර දළදා පෙරහැරේ අවසන් රන්දෝලි පෙරහැර දා සිදු වූ අලි කලබලයෙන් මරා දමනු ලැබූ රාජා අලියා පිළිබඳවය.
“අනේ ඌ හොඳ සතා” යන හිසින් මෙය පළ වී තිබණි. රාජා සම්බන්ධයෙන් එස්.බී. උඩුරාවණ මහතා එසේ ප්‍රකාශ කළේ රාජා අලියාගේ අයිතිකරු ඔහු වන නිසා ය.
එස්.බී. උඩුරාවණ මහතාට රාජා උරුම වී තිබුණේ පිය උරුමයෙනි. ඔහුගේ පියා මිල දී ගන්නා විට උගේ වයස අවුරුදු 5 ක් වූ අතර උස අඩි 4 ක් පමණ විය. තමන්කඩුව ප්‍රදේශයේ වනයෙන් අල්ලා ගත් වල් අලි පැටවා එතැන් සිට මිය යන තුරු හැදී වැඩුණේ උඩුරාවණ මහතාගේ සෙවණේය. එහෙත් රාජා අලියාට වයස අවුරුදු 35 දී පොලිස් වෙඩි පහරින් මරු වැලඳ ගැනීමට සිදු වූයේ අගෝස්තු 19 වැනි දින රාත්‍රියේ අවසාන රන්දෝලි පෙරහැරේ කුලප්පු වී මහා විනාශයක් කළ නිසා ය.
අලි කුලප්පුව ගැන සොයා බැලීමට කොමිසමක්
 |
| වෙඩි තැබීමෙන් මහමග මැරීවැටුණු රාජා අලියා |
1959 වර්ෂයේ අගෝස්තු 19 වැනි දින දළදා පෙරහැර පැවැති අවස්ථාවේ රාත්‍රි 10.05 ට පමණ කලබලය ආරම්භ වූයේ අසල සිටි පුද්ගලයකුට පහර දීමට තැත් කිරීමෙනි. මේ අවස්ථාවේ ඒ තැනැත්තා පැන ගිය අතර පෙරහැර නැරඹීමට පැමිණි පිරිස කෑගසමින් හිස් ලූ ලූ අත දිව යන්නට වූයෙන් රාජා අලියා තවතවත් කලබලයට පත් විය. පෙරහැරේ රැගෙන ගිය ගිනි පන්දමකින් විසි වූ ගිනි පුපුරක් රාජාට පෑගීමෙන් ඌ කලබල වූ බව එදා පුවත්පත් වාර්තා කර තිබුණත් මහේස්ත්‍රාත් විභාගයේදී රාජා අලියා බලා ගත් ගුන්නෑපානේ හීන් බණ්ඩා පවසා තිබුණේ පෙරහැර නැරඹීමට පැමිණි අයකු විසින් කළ විහිළුවක් නිසා අලියා කෝප වූ බවයි. කෙසේ නමුදු අලි බලන්නා රාජාව අසල තිබුණු ලාම්පු කණුවක ගැට ගසා තිබේ. එවිට අවට රැස් වී සිටි පිරිස රාජා අලියාට හූ කියමින් උසුළු විසුළු කරන්නට වූ බැවින් රාජා අලියා කුලප්පු වී දඟලන්නට විය. මේ අවස්ථාවේදී සමහරු රාජාට බෝතල්වලින් දමා ගැසූ බව අලි බලන්නාගේ ප්‍රකාශයේ සඳහන් වන අතර බෝතල් කටු මහමඟ තිබූ බව පොලිස් පරීක්ෂණවලින් හෙළි විය. කෝප වී දඟලන රාජාගේ යදම් තවත් කෙටි වන සේ තද කළ යුතු බව අනෙක් අලි බලන්නන් පැවසුවද ගුන්නෑපානේ හීන් බණ්ඩා ඊට සූදානම් වූයේ නැත. සෙසු අලි බලන්නන් ඊට අත ගැසුවේ එබැවිනි. මේ අවස්ථාවේදී දම්වැලෙන් මිදුණු රාජා අලියා නරඹන්නන් මැදට පැන්නේ කිසිවකුට කර කියා ගැනීමට කිසිවක් සිතා ගැනීමට ඉඩක් නොතබා ය. ඒ මොහොතේ ළමයකු වඩාගෙන සිටි ස්ත්‍රියක් අලියාගේ පයට පෑගී පොඩි පට්ටම් විය. මහනුවර වෝඩ් වීදියෙදි ඇරඹි මේ කලබල අවස්ථාවේදී මහනුවර ප්‍රදේශයේ විදුලිඑළිය ඇණ හිටීමෙන් තත්ත්වය වඩාත් නරක අතට හැරිණි. වියරු වැටුණ රාජා බ්‍රවුන්රිග් වීදිය දිගේ දිව යන්නට වූ අතර නරඹන්නන් මරළතෝනි දෙමින් ඒ මේ අතර දිව ගියේ අලි ප්‍රහාරයෙන් සිය පණ ගලවා ගැනීමට ය. එහෙත් හිස් ලූ ලූ අත දිව යෑමේදී එකිනෙකා පෙරළි වැටී පෑගි තුවාල වී ඔවුන් මරණයට පත්වූයේ අවාසනාවන්ත අයුරිනි. මේ අවස්ථාවේදී කොණ්ඩදෙණියේ අලියාව රැගෙන ඒ අලි බලන්නා ඉදිරියට පැමිණියේ රාජාව මෙල්ල කර ගැනීමට ය. එමෙන් ම උප පොලිස් පරීක්ෂක ටී.ජී. කරුණාරත්න ඇතුළු පොලිස් කණ්ඩායම විසින් සිවුවරක් වෙඩි තබනු ලැබිණි. ඒ මොහොතේ රාජා අලියා සොයිසා පටු මාවතට හැරුණු අතර රාජාව ඒ මාවතට කොටු කර ගැනීමට පිරිස සමත් වූහ. මේ මොහොතේ දී රාජා අලියාගේ මාරක වෙඩිල්ල තැබුවේ සාජන්ට් බණ්ඩා ය . මාවතේ නවතා තිබුණු අලුත් මෝටර් රථයක් පොඩිපට්ටම් කරමින් රාජා අලියා මැරී වැටිණි. 19 දා රාත්‍රියේ ආරම්භ වූ අලි කලබලය නිමා වන විට 20 වැනිදාට පහන් වී තිබිණි. එදා මහනුවර නගරය යුද පිටියක සිරි ගත් අතර එම ඛේදවාචකය රට තුළ ප්‍රධාන පුවත බවට පත් විය. “මහනුවර පෙරහැරේ ඇතෙක් කුලප්පු වී 10 ක් මැරෙති. සිය ගණනකට තුවාලයි” යන ප්‍රධාන ශීර්ෂය සහ උප ශීර්ෂයෙන් 1959 අගෝස්තු 20 වැනි බ්‍රහස්පතින්දා දිනමිණ පත්‍රය හැඩ වී තිබිණි. අගෝස්තු 21 වැනිදා දිනමිණ පත්‍රයේ ප්‍රධාන පුවත වූයේ ද මෙයමය. මේ ප්‍රධාන පුවතට අනුව අලි කුලප්පුව නිසා මහනුවර රෝහලට ඇතුළත් කළ රෝගීන් සංඛ්‍යාව 125 කි. පිරිමින් 105 දෙනකුත් ගැහැනුන් 86 දෙනකුත් මහනුවර රෝහලේ බාහිර රෝගි අංශයෙන් ප්‍රතිකාර ලබා ගෙන තිබිණි. මිය ගිය අය 14 දක්වා ඉහළ ගිය බව 21 වැනිදා දිනමිණ පත්‍රයේ ප්‍රවෘත්තියෙන් අනාවරණය විය. ඊට කාන්‍තාවෝ 11 දෙනෙක් ද පිරිමි දෙදෙනෙක් ද එක් දරුවෙක් ද අයත් වූහ.
මීට අමතරව 20 වැනි දා දහවල් කාලයේ පැවැත්වූ මහනුවර පෙරහැරේ ද අලි කලබලයක් වූ බව අගෝස්තු 21 වැනිදා දිනමිණ පත්‍රයේ පළ වී තිබේ. ඒ කුඩා අලි පැටවකු පෙරහැරේ ගමන් නොකර, දණ ඔබා මහමඟ වාඩි වීමෙනි. ඌ නැගිටුවීමට උත්සාහ කිරීමේදී පෙරහැරේ ගමන් කළ අනෙක් අලින් කුලප්පු වීම නිසා නරඹන්නන් දිවයන්නට වූයේ පෙරදා රාත්‍රියේ මුහුණ දුන් ශෝචනීය අවස්ථාව මතකයේ නිදන්ගතව තිබුණු නිසා විය හැකිය. කෙසේ හෝ මේ සිද්ධියෙන් 35 දෙනෙකු තුවාල වූ බවත් 15 දෙනකු රෝහලට ඇතුළත් කළ බවත් දෙදෙනකුගේ තත්වය බරපතළ බවත් ප්‍රවෘත්තියේ වාර්තා කර තිබිණි.
‘අනේ ඌ හොඳ සතා’ -රාජාගේ හිමිකරු
මහනුවර පෙරහැරේ අලි කලබලයට සමගාමීව බෙල්ලන්විල ඇසළ පෙරහැරේ ගමන් කළ අලියකු කුලප්පු වීමෙන් අයිරාංගනී නමැති දැරියක් මිය ගිය ප්‍රවෘත්තියක් ද දිනමිණ පත්‍රයේ ම පළ විය. මහනුවර දළදා පෙරහැරෙත් බෙල්ලන්විල පෙරහැරෙත් මෙවැනි සිදුවීම් වී තිබෙන බැවින් නුපුහුණු අලි ඇතුන් පෙරහැරේ කැටුව යනවාදැයි සොයා බැලීමක් කළ යුතු බව එදා විරුද්ධ පක්ෂ නායක ආචාර්ය ඇන්.ඇම්. පෙරේරා ප්‍රකාශ කළ බව සඳහන් වී තිබෙන්නේ අගෝස්තු 22 වැනිදා පළ වූ දිනමිණ පත්‍රයේ ය.
එවකට ස්වදේශ කටයුතු පිළිබඳ ඇමති ටී.බී. ඉලංගරත්න මහතා මේ ගැන සම්පූර්ණ පරීක්ෂණයක් කරන බවට පවසා ඇත්තේ මහනුවර නියෝජිත මන්ත්‍රී මණ්ඩලයේදී ය. අලි කලබලයෙන් මිය ගිය සහ තුවාල ලැබූ අයට රජය වන්දි ගෙවිය යුතු බව මේ නියෝජිත මන්ත්‍රි මණ්ඩලයේදී පී. තෙන්නකෝන් මහතා සඳහන් කර තිබේ. මෙකී පරීක්ෂණ හෝ වන්දි මුදල් ප්‍රදානය කිරීම එදා සිදු වූවාදැයි අපි නොදනිමු. එහෙත් අද දවසේ මෙන් ම එදා දවසේත් රටේ සිදුවන මෙවැනි අවසනාවන්ත සිදුවීම් දේශපාලනඥයන්ට හොඳ මාතෘකා වී ඇති බව නම් පෙනේ. “දේශපාලන කුලප්පුවලින් අලින් කුලප්පු වෙලා” යන ශීර්ෂයෙන් එවකට මුදල් ඇමති ලෙස කටයුතු කළ ස්ටැන්ලි ද සොයිසා කළ කතාවක් 1959 අගෝස්තු 25 වැනි අඟහරුවාදා දිනමිණ පත්‍රයේ පළ කර තිබේ. මේ බව එයින් තවත් තහවුරු වනු ඇත. “දේශපාලන බලලෝභින් රජය පෙරළන්න කුලප්පු ගතියකින් දඟලන මේ අවධියේ අලින් පවා කුලප්පු වීම පුදුමයට කරුණක් නොවන බව ඔහු පවසා තිබුණේ ගල්උඩුපිට වීර ප්‍රජා මණ්ඩලය මෙහෙයවීමෙන් පැවැති රැස්වීමේ මුලසුන හොබවමිනි. එමෙන්ම “අලි කුලප්පුව කුමන්ත්‍රණයකි” යනුවෙන් පවසා තිබුණේ එවකට අධ්‍යාපන ඇමතිව සිටි විජයානන්ද දහනායක මහතා ය. මෙය කුමන්ත්‍රණයක් බැවින් කොමිසමක් පත් කර විභාගයක් කළ යුතු බව සඳහන් ඔහුගේ කතාව 1959 සැප්තැම්බර් 02 වැනි සඳුදා දිනමිණ පත්‍රයේ වාර්තා වී තිබේ.
මහනුවර දළදා පෙරහැරේ අලි කුලප්පුව රටේ කොයිතරම් ප්‍රබල ආන්දෝලනාත්මක සිදුවීමක් ද කිවහොත් අගෝස්තු 21 වැනි සිකුරාදා දිනමිණ පත්‍රයේ කර්තෘ වාක්‍ය ලියැවුණේ “දළදා පෙරහැරේ එවැනි දෙයක් සිදු වූයේ කෙසේද?” යන හිසිනි. ඊට අමතරව “නුවර පෙරහැර” නමින් ඒ. රත්නායක මහතා විශේෂ ලිපියක් ලියා තිබුණේ අගෝස්තු 21 වැනි දා දිනමිණ පත්‍රයට ය. ඒ හැර අගෝස්තු 31 වැනි සඳුදා දිනමිණ පත්‍රයේ “අලි කුලප්පුව මොකද වුණේ” යන මාතෘකාව යටතේ විශේෂ අතිරේකයක් පළ විය. මේ මාතෘකාව පාඨකයන්ට කොයි තරම් ආකර්ෂණය සපයන්නක් ද කිවහොත් අගෝස්තු 29 වැනි සෙනසුරාදා දිනමිණ පත්‍රයේ මුල් පිටුවේ විශේෂ කොටුවක ඒ බව පළ කර තිබිණි. මේ අතිරේකයට පිටු 4 ක් වෙන් විය. දළදා පෙරහැරේ අලි කුලප්පුව සම්බන්ධයෙන් අස්ගිරි - මල්වතු පාර්ශ්ව මහ නා හිමිවරුන් විසින් පළ කළ අදහස් 1959 අගෝස්තු 24 වැනි සඳුදා දිනමිණ පත්‍රයේ පළ කර තිබෙන්නේ මේ ආකාරයට ය. “අලි පෙරළිය රට පිරිහීමේ නිමිත්තක්.” එය මල්වතු පාර්ශ්වයේ මහා නායක පුරිජ්ජල ශ්‍රී සරණංකර හිමියන්ගේ ප්‍රකාශයයි. බොහෝ දෙනෙකු පෙරහැරේ මත්පැන් පානය කිරීම නිසා මෙවැනි අවාසනාවන්ත සිදුවීම් සිදු වන බව සඳහන් කර තිබුණේ අස්ගිරි පාර්ශ්වයේ මහානායක යටවත්තේ ධර්මකීර්ති ශ්‍රී ධම්මරතන මා හිමියන් විසිනි. මේ හැර එවකට කොළඹ අගරදගුරු ප්‍රසාදි ලෙස වැඩසිටි තෝමස් කුරේරා පියතුමා මෙම සිදුවීම ගැන සිය කනගාටුව පළ කරමින් එදා දියවඩන නිලමේ ලෙස කටයුතු කළ සී.බී. නුගවෙල මහතාට විදුලි පුවතක් යවා ඇත. ඒ බව 1959 අගෝස්තු 24 වැනි සඳුදා දිනමිණ පත්‍රයේ පළ කර තිබුණේ “අග්‍රරාජගුරුතුමා අලි හබයට දුක් වේ” යන ශීර්ෂයෙනි.
කලබලය නිමාවන තුරු දියවඩන නිලමේ කරඬුව රැගත් ඇතාගේ දළ අල්ලාගෙන සිටියා
උප පොලිස් පරීක්ෂක ටී.ජී. කරුණාරත්න රාජා අලියාට වෙඩි තැබීම පිළිබඳව මහනුවර මහේස්ත්‍රාත් විභාගයේදී සාක්කි දීම 1958 අගෝස්තු 25 වැනි අඟහරුවාදා දිනමිණ පුවත්පතේ “නුවර පෙරහැරේ අලි කුලප්පුව අලියාට වෙඩි තැබූ අන්දම විස්තර කරයි” යන හිසින් පළ කර ඇත්තේ මෙය රටේ වැදගත්, ආන්දෝලනාත්මක සිදුවීමක් වූ නිසා ය.
මේ අතරවාරයේ දී අලි කුලප්පුව නිසා රෝහල්ගත කර සිටි දොළොස් හැවිරිදි එල්. සේරසිංහ දැරිය සිහි නොලබා ම මරණයට පත් වූයේ අලි පෙරළියෙන් මිය ගිය ගණන 15 දක්වා ඉහළ දමමිනි. ඒ බව “අලි කුලප්පුව - තව මරණයක්” යන හිසින් 1958 අගෝස්තු 26 වැනි බදාදා දිනමිණ පත්‍රයේ පළ කර තිබේ.
මහනුවර දිස්ත්‍රික්කයේ රාජ්‍ය සේවා හා පළාත් පාලන සේවා බෞද්ධ සමිතිය විසින් එදා අගමැතිව හුන් එස්.ඩබ්ලිව්.ආර්.ඩී. බණ්ඩාරනායක මහතාගෙන් අලි කුලප්පුව ගැන කොමිසමක් ඉල්ලා තිබෙන්නේ ඒ ගැන නොයෙක් දෙනා විවිධ අදහස් පළ කර නිසා ය. එනම් අලියා කුලප්පු වීමට හේතු ලෙස පන්දමක අඟුරු වැටීම, ඡායාරූප ගැනීමේදී විදුලි එළිය රාජා අලියාගේ ඇසට වැටීම, අලි බලන්නන්ගේ බීමත්කම යනාදි කරුණු ගණනාවක් විවිධ අය ප්‍රකාශ කිරීම ය. “අලි කුලප්පුව ගැන කොමිසමක් ඉල්ලති” යනුවෙන් 1959 අගෝස්තු 26 වැනි බදාදා දිනමිණ පත්‍රයේ මේ පුවත පළ කර ඇත. මේ අනුව රටේ ආන්දෝලනාත්මක සිදුවීම් සම්බන්ධයෙන් කොමිසම පත් කිරීම අද පමණක් නොව එදා පවා සිදු වූ බවට මෙය කදිම සාක්ෂියකි. එහෙත් ඒ කොමිසම පත් කළා ද, කොමිසම් වාර්තාවට සිදු වූයේ කුමක්දැයි අපි නොදනිමු.
අගෝස්තු 27 වැනි බ්‍රහස්පතින්දා දිනමිණ පත්‍රයේ “අලි කුලප්පුව විභාග කරනු” යන ශීර්ෂයෙන් පුවතක් පළ වී තිබෙන්නේ කොමිසම පත් කිරීමට සහයක් වශයන් විය හැකිය.
කෝට්ටේ විහාරයෙන් පවත්වනු ලබන වාර්ෂික ඇසළ පූජා පෙරහැරට හීලෑ අලි ඇතුන් පමණක් සහභාගි කරවා ගන්නා බව සඳහන් පුවතක් 1959 අගෝස්තු 27 වැනි බ්‍රහස්පතින්දා දිනමිණ පත්‍රයේ පළ වී තිබෙන්නේ අලි කුලප්පුවෙන් සිදු වූ කලබගෑනියෙන් පාඩමක් ඉගෙනගෙන නිසා විය යුතුය.
රටේ යම් ඛේදවාචකයක් වූ අවස්ථාවක බොර දියේ මාළු බාන අය අද මෙන් එදා සමාජයේ ද විසූ බව අපට සිතන්නට සිදු වන්නේ මහනුවර පාර්ලිමේන්තු මන්ත්‍රී පියසේන තෙන්නකෝන් එය “හිතා මතා කළැයි හිතන්න බැරි නෑ” යනුවෙන් 1959 අගෝස්තු 31 වැනි සඳුදා දිනමිණ අතිරේකයට ප්‍රකාශ කර තිබීමෙනි. මේ හැර අලි කුලප්පුව දේව කෝපයක් නිසා සිදු වූ බව පවසන්නෝ අද මෙන් ම එදා ද සිටි බව පෙනෙන්නේ කරන්දෙනියේ විමලජෝති හිමියන් විසින් පහළ බෝමිරියේ ශෛලබිම්බාරාමස්ථ ධර්මසිරි ඉරු දින දහම් පාසලේ තෑගි බෙදා දීමේ උත්සවයක කළ දේශනයකිනි. “අද අපේ රටේ හරිහැටි පාලනයක් නොකෙරෙන නිසා දෙවියන් පවා කෝපවෙලා” යනුවෙන් එහිදී උන්වහන්සේ පැවසූහ. එය අගෝස්තු 27 වැනි බ්‍රහස්පතින්දා දිනමිණ පත්‍රයේ පළ විය.
මේ අතරවාරයේ දී එදා දියවඩන නිලමේ ලෙස කටයුතු කළ සී.බී. නුගවෙල මහතා, රෙදි පොටවල් විශාල ගණනකින් හා රන්මාල ආයිත්තම් ආදියෙන් ඒ අවස්ථාවේ සැරසී සිටි බැවින් කිසිවක් කර කියා ගත නොහැකි වූ බවත් එසේ නොවී සාමාන්‍ය තත්වයෙන් සිටියා නම් තත්ත්වය මෙපමණ දරුණු වීමට පෙර අලියා මෙල්ල කිරීමට ඉඩ තිබූ බවත් පවසා තිබෙන්නේ 1959 අගෝස්තු 31 වැනි සඳුදා දිනමිණ පත්‍රයේ පළ වූ විශේෂ අතිරේකයට ය. එහෙත් එදින ධාතු කරඬුව වැඩම වූ කන්දා ඇතාගේ දළය අගින් අල්ලාගෙන කලබලය අවසන් වන තුරුම හොඳින් හික්මවා ගත් බවත් දළදා කරඬුව ආරක්ෂා කර ගත් බවත් දියවඩන නිලමේ විසින් තවදුරටත් පවසා තිබිණි.
ශෝකය පළ කරමින් කොළඹ අගරදගුරු හිමිපාණන්ගෙන් විදුලි පුවතක්
මීට අමතරව සතර මහා දේවාලවල බස්නායක නිලමේවරුන් ද මේ පිළිබඳව විශේෂ අතිරේකයට අදහස් ප්‍රකාශ කර ඇත. මහනුවර නාථ දේවාලයේ බස්නායක නිල‍ෙම් එච්.බී. උඩුරාවණ මහතා ඉස්සර සාධු හඬ දෙන පෙරහැරට දැන් හූ හඬ ලැබෙන නිසා මෙවැනි ව්‍යසන ගැන පුදුම විය යුතු නැතැයි පැවසීය. මහනුවර කතරගම දේවාලයේ බස්නායක නිලමේ බී. දොඩන්වෙල මහතා පවසා තිබුණේ එය දේව කෝපයක්දැයි නොදන්නා බව ය. මහනුවර පත්තිනි දේවාලයේ බස්නායක නිලමේ ඒ.බී. පනන්වෙල මහතා “බොරු බියෙන් නොසන්සුන් වුණා” යැයි පවසා තිබේ. “අවුල ඇති වුණේ අවිනීතකම නිසා” යැයි පැවසුවේ මහනුවර මහ විෂ්ණු දේවාලයේ බස්නායක නිලමේ හැරිස් රත්වත්ත මහතා ය.
මහනුවර දළදා පෙරහැරේ සිදු වූ අලි කුලප්පුව විභාගයට ගත් අවස්ථාවේදී ඒ ගැන විවේචනය නොකරන ලෙස මහනුවර මහේස්ත්‍රාත්වරයා ඉල්ලීමක් කළේය. ඒ බව 1959 සැප්තැම්බර් 02 වැනි සඳුදා දිනමිණ පත්‍රයේ සඳහන් වේ. මේ අනුව පුද්ගලයන් 15 දෙනෙකුට මරු කැඳවමින් එදා මහනුවර පෙරහැරේ සිදු වූ අලි කලබලය මුළු රටම කම්පා කළ ප්‍රධාන පුවතක් වූ බව පෙනේ. එය පූජක පක්ෂයේත් දේශපාලකයන්ගේත් මාතෘකාවක් බවට පත් විය. මුළු රට ම කැළඹූ රාජා අලියා ඉතිහාසගත විය. නමුදු මේ රාජා අලියා තවත් අවස්ථාවකදී ඉතිහාසගත වී ඇති බව බොහෝ දෙනෙකු නොදන්නා අප්‍රකට තොරතුරකි. ඒ රාජා අලියා බලා ගත් ගුන්නෑපානේ හීන් බණ්ඩාට පෙර කාලයේ බලාගත් ඩිංගිරි බණ්ඩා ගේ කාලයේදීය. ඩිංගිරි බණ්ඩාගේ නෑයකු වන කීරාල නමැත්තකු අලියා පොලඹවා මිනිසකු මැරවීමෙන් මිනිසකු මැරීම සඳහා අලියකු උපයෝගි කර ගත් ප්‍රථම නඩුව ලෙස ලංකාවේ ඉතිහාසගත විය. එකී නඩුවෙන් වරදකරු වූ කීරාලට වසර 6 ක සිරදඬුවමක් ලැබිණි. එදා ඉතිහාසගත සිදුවීමක් ඇති කළ රාජා අලියා තවත් එබඳු ම ඉතිහාසගත සිදුවීමකින් අවසන් සුසුම් හෙළීම දෛවෝපගත සිදුවීමකි.
