කොළඹ නුවර පාර අද්දරට වී පසුගිය සතියේ දින කිහිපයක්ම මිනිස්සු රැස් කකා බලා හිඳින දසුනක් විය. දවල් රෑ නැතිව ඔවුන් රැස්කමින් සිටි හේතුව බොහෝ දෙනකුට කුතුහලයක්ද විය. ඇතැම් විටක මේ රැස් කෑම වාහනවලින් පිරුණු පාරේ කිලෝ මීටර ගණන් දිගු පෝලිම් හැදීමටද හේතු විය. ඔවුන් මේ රැස් කකා සිටියේ දළඳා පෙරහරේ කරඬුව වඩම්මවන නැඳුන්ගමුවේ හස්ති රාජයා එන තෙක්ය. මේ සතා ඒ තරමට ජනතා ආදර ගෞරව ලබන්නට තරම් පින්වන්ත වී සිටින්නේය. එයින් මා අවදි කළේ එකම එක දෙයක් පමණි.
අපේ දන සිත් තුළ මේ හස්ති රාජයන් කෙරෙහි පවතින දැඩි බැඳීම අපට අපේ වනගොමුවල නිදහසේ සැරිසරන එවැනි හස්ති රාජයන් ඇතුළු සද්දන්ත පරපුර රැකුමට යොදා ගත නොහැකිද යන්නය. නැඳුන්ගමුවේ හස්ති රාජයා තම ස්වාමියා හෝ රජයෙන් මතු නොව ජනතාව වෙතින් රැකවරණය ලබන්නට තරම් පින් කළද මේ හස්ති පරපුර ඉතා ශෝචනීය ගමනාන්තයකට මේ යුගය වන විට පිවිස ඇත. මේ ප්‍රස්තුතයෙන් පිවිසෙන පළමු කරුණ වන්නේ අපේ වන අලි සම්පතේ අනාගත ඉරණම පිළිබඳ ව අප තුළ තිබිය යුතු අවබෝධයයි. මේ අවබෝධය තම්බපණ්නි දීපයේ ඉපදුණු අපගේ අනූල්ලංඝනිය වගකීමක් ව ඇත්තේය.
අලි මිනිස් ගැටුම අද මාධ්‍යයට එක් පුවත් තේමාවකි. රාජ්‍ය නොවන සංවිධානවලට අරමුදල් සම්පාදනය කිරීමේ එක් ව්‍යාපෘතියකි. සැබෑ පරිසරවේදීන්ට සංවේදී පාරිසරික ප්‍රශ්නයකි. මේ වන අලි සමඟ ජීවත් වන ඒ ඒ පෙදෙස්වල ජනතාවට දැවැන්ත හිසදරයකි. රජයට දෙකොණ පැටළුණු විලක්කුවකි. මේ අනුව බලන කල මේ ප්‍රශ්නය අපේ සමාජය තුළ ජීවත් වන විවිධ කොටස්වලට විවිධ අයුරින් බලපායි. තම තමන්ට ගෝචර වන කොන්වලින් අල්ලා මේ ප්‍රශ්නය දෙස බැලුවොත් අපට දෙන්නට තිබෙන විසඳුම් පරාසය සීමාසහිතය. මේ නොගැළපීම් මැද අද සිදුව ඇත්තේ අලි මිනිස් ගැටුම තව තවත් තීව්ර වීමය. මේ පසුබිම තුළ අප කල්පනාවෙන් යුතුව බැලුවහොත් මුලින්ම කළ යුත්තේ අලි ගැන අල ගිය මුල ගිය තැන සියල්ල නිසි ලෙස හදාරා ඒ ගැටලුවට අපේ බිමට ගැළපෙන අපේ සමාජයට ගැළපෙන විද්‍යානුකුල විසඳුමක් ලබාදීමය. මේ හැදැරීමට ප්‍රබල
පසුබිමක් ලබා දෙන තොරතුරු ගොන්නක් අප දුටුවේ පසුගියදා යළි මෙරට එළි දුටු තම්බපණ්ණි සඟරාවෙනි. ඩයිජස්ට් ප්‍රමාණයේ මුද්‍රිත ප්‍රකාශනයක් ලෙසින් පසුගියදා එළි දුටු තම්බපණ්ණී සඟරාව තේමා තොටගෙන තිබුණේ අලින් පිළිබඳ මුල සිට අගට වැනි වූ කතාවකි. අලින්ගේ පරිණාමය, ජීවන රටාව ආදී ජෛව විද්‍යාත්මක තොරතුරු සේම ඔවුන් ගේ ශ්‍රී ලාංකේය ගහනය සමඟ බැඳි ඇති සමාජ පාරිසරික සාධක මෙන්ම අලි සංරක්ෂණය පිළිබඳව ද පුළුල් විවරණයකින් ඔවුන් මෙම සඟරාව එළි දක්වා තිබිණි.
ප්‍රවීණ මාධ්‍යවේදියකු සේම පරිසරවේදියකු වන නයනක රන්වැල්ල විසින් සංස්කරණය කරනු ලබන මෙම සඟරාවෙන් ඔහු උත්සාහ කරන්නේ සිරිලක පොළොවට උරුම වූ අමිල භෞතික සම්පත් පිළිබඳ ලෝකය හමුවේ දැනුම දීමත් ලෝකයේ අන් ජාතීන්ට නොදෙවෙනි වූ අපේ දැනුම පිළිබඳ පුළුල් විමසුමක යෙදීමත්ය. ඒ අනුව පාඨකයන්ට හැසිරවිය හැකි පහසු ඩයිජස්ට් ප්‍රමාණයේ සඟරාවක් ලෙසින් එළි දුටු මෙම සඟරාව පරිසරය, දේශීය දැනුම, අපේ ජෛව සම්පත්, ආයුර්වේදය, පුරා විද්‍යාව සහ ඉතිහාසය ඇතුළු තේමා ඔස්සේ මාසික ව දැනුම් සම්බාරයක් ගෙන ඒමට සුදානමින් සිටී.
