මෙරට පාතාලයේ බොහෝ දෙනෙකුගේ ආරක්ෂක නවාතැන්පොළ බවට මෑතක් වන තුරුම පත්ව තිබුණේ තමිල්නාඩුවය. මිනී මරා පාතාල අපරාධකරුවෝ බොහෝ දෙනෙක්ම මෑතක් වනතුරුම පැන්නේ ඉන්දියාවටය. ඒ මන්නාරමෙන් හෝ කල්පිටියෙන් මාළු බෝට්වුවල නැඟීය. ඉන්දියාවේදී ඔවුන්ට ආරක්ෂාව මෙන්ම නවාතැන් පහසුකම්ද ලැබුණේ තෙල් බාලාගෙනි. ග්‍රෑන්පාස් පැත්තේ ඇති ශ්‍රී ලංකාවේ තමිල්නාඩුවේ රජ කළ තෙල් බාලා ඉන්දියාවට පැන ගත්තේ ඛණිජ තෙල් සංස්ථාවට එල්ල වුණු එල්.ටී.ටී.ඊ ත්‍රස්ත ප්‍රහාරයත් සමඟිනි. ඒ ඔහුට එම ප්‍රහාරයට පැමිණි ත්‍රස්තවාදීන්ට රැකවරණය ලබාදීමේ චෝදනා එල්ල වන්නට වූ බැවිනි. එල්.ටී.ටී.ඊ.ය සමඟ පැවති ඉතා කිට්ටු සම්බන්ධකම් හේතුවෙන් තමිල්නාඩුවේදී තෙල් බාලාට ලැබුණේ රජ සැලකිලිය. ශ්‍රී ලංකිකයෙක් වුවත් තමිල්නාඩුවේ ඔහු ගත කළේ සුල්තාන්වරයෙක් ලෙසිනි. ඒ දෛනික කුලියට ධාවනය කිරීමට ඉන්දියානුවන්ට ටැක්සි කුළියට දෙමිනි. ඔහු සතුව තිබුණේ යැයි කියැවෙන ටැක්සි ගණන 100කට වැඩිය. 
හදවත් රෝගයකට කළ ශල්‍යකර්මයකින් ඇතිවුණු සංකූලතාවයක් හේතුවෙන් ඉන්දියාවේදී තෙල්බාලා මිය යාමත් සමඟ ඔහුගේ තැන ගන්නේ සින්නයියා රවීන්ද්‍රන් ගුණසේකරන් නොහොත් කිඹුලාඇළ ගුණාය. දැන් ගුණා ඉන්නේ ඉන්දියානු ජාතික විමර්ශන ඒජන්සිය භාරයේය. ඒ තනිවම නොව, ගෝලබාලයන් ඇතුළු මෙරට පාතාලයේ ප්‍රබලයින් 09 දෙනෙක් සමඟිනි. ඒ අය අතර බාලචන්ද්‍රන් පුෂ්පරාජ් නොහොත් පූකුඩිකන්නා, මොහොමඩ් මන්සූර් මොහොමඩ් අස්මින් නොහොත් අස්මි, අලහප්පෙරුමගේ සුනිල් ගාමිණී නොහොත් කොට ගාමිණී, ස්ටැන්ලි කෙනඩි ප්‍රනාන්දු නොහොත් බුම්මා, නල්ලපෙරුම නන්දිගේ දනුක රොෂාන් හෙවත් කෙසෙල්වත්තේ දනුක, දිනමුල්ල කන්කානම්ලාගේ නලින් චතුරංග නොහොත් ලඩියා, දික්පිටිය විනානගේ අසිත නොයෙල් කුමාර නොහොත් ආමි අසිත, ගමනේ සුරංග ප්‍රදීප් නොහොත් වැල්ලේ සාරංග සහ සින්නයියා දිලීපන් යන අය සිටින්නේය.
ඒ හැරුණු කොට මේ අය අතර කිඹුලාඇළ ගුණාගේ පුතා ද සිටියි. ඔහු දිලීපන්ය. ඔහු හැරුණු කොට සෙසු 09 දෙනාම මෙරට පාතාලයේ නමගිය ප්‍රබලයන්ය. මත්කුඩු ජාවාරම්කරුවන්ය. මිනිස් ඝාතන ඇතුළු අපරාධ ගොන්නකටම ජත්‍යන්තර පොලිසිය මඟින් රතු නිවේදන පවා නිකුත් කර ඇති මෙරටට අවශ්‍යව සිටින අපරාධකරුවන්ය. ඔවුන් ඉන්දියාවට පැන ගියේ පොලිසියෙන් බේරෙන්නට බෝට්ටුවල නැඟීය. ඉන්දියාවේ රැඳී සිටිමින් ද ඔවුන් කරනු ලබන්නේ මෙරට මත්කුඩු ජාවාරම මෙහෙයැවීමය. ඒ අතර මිනිස් ඝාතන හා කප්පම් ගැනීම් ද ඔවුන් සිය ගෝලබාලයන් යොදා ඉන්දියාවේ සිට දිගටම කළේය. එහෙත් දැන් ඔවුන්ට මේ දේවල් කරන්නට බැරිය. ඒ ඔවුන් එතෙක් කලක් නිදහසේ සිට කළ සෙල්ලම් නැවත කරන්නට බැරිවන තැනක සිරගතකර සිටින බැවිනි.
මෙම පාතාලයේ ප්‍රබලයන් ඉන්දියානු ජාතික විමර්ශන ඒජන්සිය විසින් සිය භාරයට ගැනීමත් සමඟ එතෙක් ඉන්දියාවේ රැඳී සිටි මෙරට පාතාලයේ තවත් බොහෝ අපරාධකරුවන් ඉන්දියාවෙන් පැන ගත්තේ ඩුබායි වෙතය. ඇතැම් අපරාධකරුවන් සිංගප්පූරුව හා මලයාසියාවට ද පැන්නේය. දැන් පාතාල අපරාධකරුවන් ඉන්දියාව පැත්ත බලන්නේ නැති තරම්ය. ඒ ඉන්දියාවේ ජාතික ආරක්ෂාවට පවා බරපතළ ලෙස තර්ජනයක් එල්ල කරමින් එල්.ටී.ටී.ඊ.ය නැවත නැගිටුවන්නට පකිස්තානු මත්කුඩු ජාවාරම්කරුවන් සමඟ එක්ව කටයුතු කිරීමේ වරදට චෝදනා පත්‍ර පවා පසුගිය සතියේ ඔවුන්ට ඉදිරිපත් කර ඇති බැවිනි. ඒ අනුව මෙම පාතාල අපරාධකරුවන්ට දැන් කිසිදු ගැලවිල්ලක් නැති තරම්ය. ජාත්‍යන්තර පොලිසිය මඟින් රතු නිවේදන පවා නිකුත් කර ඇති මෙම පාතාල අපරාධකරුවන්ව ඉන්දියානු ජාතික ඒජන්සිය මඟින් සිය භාරයට ගන්නේ පසුගිය වසරේ දෙසැම්බර් මාසයේදීය. ඒ තමිල්නාඩුවේ ට්‍රිචිහි රැඳවුම් මධ්‍යස්ථානයක රඳවා සිටියදීය.
මෙම පාතාල අපරාධකරුවන් එම රැඳවුම් මධ්‍යස්ථානයේ රඳවා තැබෙන්නේ 2021 වසරේ ජනවාරි මාසයේ සිටය. මත්කුඩු ජාවාරම් සම්බන්ධයෙන් මේ අයව විටෙන් විට අත්අඩංගුවට ගනු ලබන්නේ තමිල්නාඩු රාජ්‍ය ත්‍රස්ත විරෝධී බලකාය ඇතුළු විශේෂ පොලිස් කණ්ඩායම් කිහිපයක් විසිනි. ඒ මෙම පාතාල අපරාධකරුවන් පකිස්තානයේ සිට විශාල වශයෙන් මත්කුඩු තමිල්නාඩුවට රැගෙනවිත් ශ්‍රී ලංකාවට බෝට්ටු මගින් ප්‍රවාහනය කරන බවට ලද තොරතුරු රැසක් මුල්කරගෙනය. ඒ අතර ඔවුන් පකිස්තානයේ සිට අවි ආයුධ පවා රැගෙන එන බව ඉන්දීය ආරක්ෂක අංශ විසින් හෙළි කරගෙන තිබුණේය.
එහෙත් මෙම පාතාල අපරාධකරුවන් අතර සිටින කොට ගාමිණිව අල්ලා මෙම රැඳවුම් මධ්‍යස්ථානයේ රඳවා තිබුණේ මෙම මෙහෙයුම්වලට බොහෝ කලකට පෙර සිටය. ඒ ශ්‍රී ලංකාවට එවීමට සූදානම් කළ මත්කුඩු කිලෝ 10ක් සමඟ තමිල්නාඩු පොලිසියට කොටුවීමේ ප්‍රතිඵලයක් ලෙසිනි. කිඹුලාඇළ ගුණා ඇතුළු ගෝලබාලයන් ගැන තමිල්නාඩු පොලිසියට බොහෝ තොරතුරු දැනගන්නේ ගාමිණීගෙනි.
බස්නාහිර පළාත් සභාවේ හිටපු ඇමැතිවරයකු වූ සුනිල් මෙන්ඩිස්ව 2005 වසරේදී වෙඩි තබා ඝාතනය කරන්නේ ද කොට ගාමිණීය. එම ඝාතන කොන්ත්‍රාත්තුව ලැබෙන්නේ බස්නාහිර පළාතේ පිහිටි පළාත් පාලන ආයතනයක සභාපතිවරයෙකුගෙන් කිඹුලා ඇළ ගුණාට ය. කොට ගාමිණී එකල කිඹුලාඇළ ගුණාගේ සමීපතයෙකි. කොට ගාමිණිව එම ඝාතනයට යොදවන්නේ ද ලොකු ගාණක් ඔහුගේ අත තබාය. එදා කොට ගාමිණි තැබූ වෙඩිල්ලෙන් පළාත් සභාවේ අමාත්‍යවරයෙක් වූ සුනිල් මෙන්ඩිස් මියැදෙන්නේ පැරණි පාලමක් පරණ යකඩවලට විකිණුමින් කළ ජාවාරමක් ගැන හඬ නඟන්නට ගොසිනි.
එදා මෙම ඝාතන විමර්ශනය පවත්වනු ලැබුවේ පෑලියගොඩ නවලෝක ගොඩනැගිල්ලෙහි පිහිටි බස්නාහිර පළාත් උතුරු දිසා අපරාධ කොට්ඨාශය මඟිනි. එකල එම කොට්ඨාශයේ අධ්‍යක්ෂකවරයා වූයේ විශ්‍රාමික ජ්‍යෙෂ්ඨ නියෝජ්‍ය පොලිස්පතිවරයෙක් වන ප්‍රියන්ත ජයකොඩිය. කොට ගාමිණි පස්සෙන් එම කොට්ඨාශයේ නිලධාරීන් පන්නට විට එකල සහකාර පොලිස් අධිකාරීවරයෙක් වූ ප්‍රියන්ත ජයකොඩිව පවා මරා දැමීමට කිඹුලාඇළ ගුණා සහ කොට ගාමිණි මාන බැලුවේය. අවසානයේදී පොලිස් බලය හමුවේ කොට ගාමිණීට සිදුවන්නේ සිය ජීවිතාරක්ෂාව පතා බෝට්ටුවක නැඟී ඉන්දියාවට පැන ගන්නටය.
ගුණාට ද වැඩි කල් කිඹුලාඇළ සිය රාජධානියේ මේ නිසා රැඳෙන්නට ඉඩක් නොවීය. නාඳුනන කණ්ඩායම් වලින් ගුණාගේ රාජධානියට ප්‍රහාර එල්ල වන්නට ගත්තේය. අවි ගත් සන්නද්ධ කණ්ඩායම් ගුණාගේ ගෝල බාලයන්ට පහර පිට පහර දුන්නේ ගුණා විසින් සිය රාජධානිය තුළ පවත්වා ගෙන ගිය නඩු අසා දඬුවම් දෙන උසාවිය සහ පොලිසිය පවා කුඩුපට්ටම් කර දමමිනි. කිඹුලා ඇළ ගුණා පාතාලයේ පොලිසියක් සහ උසාවියක් පවා පවත්වා ගෙන ගිය බව රටටම නිරාවරණය වෙන්නේ ඒත් එක්කමය.
එකල කොළඹ පාතාලය හොල්ලා ගෙන සිටි දැවැන්තයෙක් වූ කිඹුලාඇළ ගුණාට සැලියුට් ගසන පොලිස් ලොක්කෝ ද එකල සිටියෝය. දේශපාලන බලයෙන්ද ශක්තිමත් වූවෙක් වූ කිඹුලාඇළ ගුණාගේ පාතාල අධිරාජ්‍ය ගොඩනැඟී තිබුණු කිඹුලා ඇල පැත්ත පලාතේ එකල වැරදීමකින්වත් පොලිසිය පස් පාගන්නටවත් ගියේ නැත. කිඹුලා ඇළේ ජනතාවගේ ප්‍රශ්න විසඳුවේ ගුණාය. ඒ ගුණාගේ පොලිසියෙන් සහ උසාවියෙනි.
කිඹුලාඇල ගුණා යුද්ධය පැවති සමයේදී එල්.ටී.ටී.ඊ.ය සමඟ ඉතා කිට්ටු සම්බන්ධකමක් පැවැත්වූ අයෙකි. එල්.ටී.ටී.ඊ. යේ සාමාජිකයන්ට කොළඹදී රැකවරණය සැපයූ අයකු ලෙස හඳුනා ගෙන සිටියේ ද ගුණාවය. මෙරට මත්කුඩු ජාවාරමේ ආරම්භක පුරුකක් ලෙස සැලකෙන කිඹුලාඇළ ගුණා 1999 වසරේදී පුරහල් භූමියේදී එවකට සිටි ජනාධිපති චන්ද්‍රිකා බණ්ඩාරනායකයන් ඉලක්ක කරගෙන පුපුරා ගිය මිනිස් බෝම්බකාරියට ද රැකවරණය දුන් තැනැත්තකි. එම බෝම්බ ප්‍රහාරය සම්බන්ධයෙන් ඔහුව අත්අඩංගුවට ගැනීමට අපරාධ පරීක්ෂණ දෙපාර්තමේන්තුව මඟින් සූදානම් වන විට ඔහු බෝට්ටුවක නැඟී පලා යන්නේ ඉන්දියාවටය. පසුව ඔහු නැවතත් මෙරටට පැමිණ වැජඹෙන්නේ දේශපාලන රැකවරණයක් ද ලබමිනි. එහෙත් කිඹුලා ඇල ගුණාට පවා මරණ බිය දැනෙන්නට ගත්තේ අවි ගත් නාඳුනන කණ්ඩායම් පැමිණ සිය රජධානිය කුඩු පට්ටම් කරන්නට ගැනීමත් සමඟිනි. එවර නැවතත් ඔහු ආරක්ෂාව පතා ඉන්දියාවට පැන ගන්නේ කැලණි ගඟෙන් බෝට්ටුවක නැඟීය. ඉඳහිට බෝට්ටුවක නැඟී ඉන්දියාවේ තූත්තුකුඩියේ සිට ආගිය ගුණා කිඹුලාඇළ රාජධානියට නම් පය තැබුවේ නැත. ඒ මරණ බිය හොඳින්ම ඔහුට දැනෙන්නට වූ බැවිනි. ගුණා සිය පුතා වූ දිලීපන්ව ද ඉන්දියාවට ගෙන්වා ගෙන එහි තබා ගත්තේ ද වැඩි ආරක්ෂාවටය. ඒ ගුණාගේ සහෝදරයන් ඇතුළු සමීපතමයන් කිහිප දෙනෙකුම අබිරහස් වෙඩික්කරුවන්ගේ ප්‍රහාරයන්වලට ලක්ව නොඑන ගමන් යන්නට වූ බැවිනි.
ඒත් එක්කම ඔහු සිය ප්‍රතිවාදීන්ව මරා දමන්නට පටන් ගත්තේ ඉන්දියාවේ සිට ගෝලබාලයන් යොදවාය. දෙමටගොඩ පොලිසියේ දූෂණ මර්දන අංශයේ ස්ථානාධිපතිවරයාව සිටි පොලිස් පරීක්ෂක ඩග්ලස් නිමල් සහ ඔහුගේ බිරියව අතුරුගිරිය පාරේ දී වෙඩි තබා මරවන්නේ ද ගුණාය. එම ඝාතනය ගුණා විසින් කළේ කාගේ උවමනාවටදැයි අදටත් ඇත්තේ අබිරහසක් ලෙසිණි.
ඉන්දියාවට පනින මෙරට පාතාල අපරාධකරුවන් සිය ගණනකට රැකවරණය දුන් ගුණා ඇතුළු ගෝලබාලයන්ට වැඩ වරදින්නේ ඔවුන් ඉන්දියාව කේන්ද්‍ර කරගෙන පකිස්තානු මත්කුඩු ජාවාරම්කරුවන් සමඟ ඉන්දියාව තුළ එල්.ටී.ටී.ඊ.ය නැවත ගොඩනැඟීමට ගොසිනි. ඒ සඳහා ගුණා ඇතුළු කල්ලිය අවි ආයුධ ද රැස්කරමින් සිටින බව ඉන්දියානු ආරක්ෂක අංශ වෙත තොරතුරු ගලාවිත් තිබුණේය. එම තොරතුරු කෙරෙහි අවධානය යොමු කරමින් කාලයක් තිස්සේම ඉන්දියානු ආරක්ෂක අංශය සිටියේ ගුණා ඇතුළු කල්ලිය ගැන ඇස ගසාගෙන ය. ඒ අනුව ඉන්දියානු ආරක්ෂක අංශ විසින් ගුණාව අත්අඩංගුවට ගනු ලබන්නේ 2021 වසරේ ජනවාරි මාසයේ අග සතියේ දිනකදීය. ඒ කිඹුලාඇළ ගුණා, බුම්මා, දිලීපන් ඇතුළු පස් දෙනකු චෙන්නායි සිට දිල්ලිය බලා යෑමට සූදානමින් චෙන්නායි ගුවන්තොටුපොළට පැමිණ සිටියදීය. ඒ කිව් අංශය ලෙස හැඳින්වෙන ඉන්දියානු අපරාධ මර්දන කාර්යාංශය මඟිනි.
අනතුරුව 2021 වසරේ ජූලි මාසයේදී චෙන්නායි හි චෙරුප්පූර්, චෙන්ගල්පත්තු, තිරුචිරපල්ලෙයි යන ප්‍රදේශවල ස්ථාන 22ක් පරීක්ෂාවට ලක්කරමින් ගුණා සමඟ සම්බන්ධකම් පවත්වමින් එරට රැඳී සිටි මෙරට පාතාලයේ තවත් ප්‍රබලයන් රැසක්ම එරට ආරක්ෂක අංශ වැටලීම් කරමින් අත්අඩංගුවට ගත්තේය. ඒ හැම අයෙක්ම ශ්‍රී ලංකාවේ සිට ඉන්දියාවට හොර රහසේ පලාවිත් මත්කුඩු ජාවාරම් ඇතුළු නීති විරෝධී ජාවාරම්වල නිරතව සිටියවුන්ය. 
එසේ අත්අඩංගුවට ගත් අය අතර කෙසෙල්වත්තේ දනුකද සිටියේය. කෙසෙල්වත්තම හොල්ලා ගෙන සිටි කෙසෙල්වත්තේ දිනුක හෘදය රෝගයකින් බුබායිහි දී මරුමුවට පත්වීමෙන් පසු ඔහුගේ තැන ගත්තේ දනුකය. එහි සිට ඔහු කෙසෙල්වත්ත පැත්තේ ඝාතන රැසක්ම මෙහෙයවනු ලැබීය. පෑලියගොඩ මැනිං වෙළෙඳපොළේ පලතුරු සංගමයේ සභාපති අඹ ශානාව ඝාතනය කෙරෙව්වේද ඔහුගේ කොන්ත්‍රාත්තුවකට අනුවය.
අතුරුගිරියේ ලඩියා ද එදා අත්අඩංගුවට ගත් අය අතර සිටියේය. අංගොඩ ලොක්කා ඉන්දියාවේදී මරුමුවට පත්වීමෙන් පසු ලොක්කාගේ තැන ගත්තේ ඔහුය. එහෙත් වැඩි කාලයක් ඔහුට ලොක්කාගේ තැනේ රජ වෙන්නට ඉඩක් නොවීය. ඒ ඉන්දියානු පොලිස් අත්අඩංගුවට ඔහුව ද පත්වන බැවිනි.
ලඩියාගේ නම පාතාලයේ අපරාධකරුවෙක් ලෙස එළියට එන්නේ 2017 වසරේදී කළුතර එතනමඬලේදී බන්ධනාගාර බස් රථයකට එල්ල වුණු ප්‍රහාරයත් සමඟිනි. පාතාලයේ සමයං නමැති අපරාධකරු ඇතුළු 07 දෙනකු බන්ධනාගාර බස් රථය තුළදී වෙඩි තබා මරා දැමීමේ ප්‍රධාන සැකකරුවන් අතර ලඩියා ද සිටියේය. එම බස් රථ ප්‍රහාරයෙන් පසු අංගොඩ ලොක්කා සමඟ ලඩියා ඉන්දියාවට පනින්නේ කල්පිටියෙන් බෝට්ටුවක නැඟීය. ඒ ගොස් ඔවුන් ඉන්දියාවේ සිට ඩුබායි පැන ගන්නට උත්සාහ ගත්ත ද චෙන්නායි ගුවන් තොටුපොළේදී එරට ආරක්ෂක අංශ වෙත හසුවීම නිසා ඉන්දියාව තුළ කාලයක්ම රැඳී සිටීමට සිදුවන්නේ එරටින් විවාහයක් ද කරගෙනය.
ඉන්දියානු පොලිස් අත්අඩංගුවට පත්වූවන් අතර මෙරට පාතාලයේ සැඟවුණු වෙඩික්කරුවෙක් ලෙස කටයුතු කළ බුම්මා ද සිටියේය. බුම්මාගෙන් හොඳටෝම වැඩගත්තේ කොස්ගොඩ සුජීය. දකුණේ සිදුවූ ඝාතන රැසකම අබිරහස් වෙඩික්කරුවෙක් වූ බුම්මා කොටි නායක වේලුපිල්ලේ ප්‍රභාකරන්ගේ සමීප ආරක්ෂක කණ්ඩායමේ සිටි සාමාජිකයෙකි. යුද්ධය අවසන් වීමෙන් පසු පුනරුත්ථාපනය වූ මේ එල්.ටී.ටී.ඊ. සාමාජිකයා කොස්ගොඩ සුජීව දැන හදුනාගන්නේ බූස්ස බන්ධනාගාරයේදීය. කොළඹ සිදු වූ ඝාතන රැසකට ද වගකිව යුතු චරිතයක් වූ බුම්මා අවසානයේදී පූකුඩිකන්නාට සම්බන්ධ වන්නේ මත්කුඩු ජාවාරම හරහාය. 2019 වසරේදී බුම්මා බෝට්ටුවක නැඟී ඉන්දියාවට පනින්නේ පූකුඩිකන්නා ද සමඟිනි. ඒ ඔවුන් දෙදෙනා පස්සේ විශේෂ කාර්ය බළකායේ සෙබළුන් පන්නන්නට ගැනීම නිසාය.
පූකුඩිකන්නාව ඉන්දියාවේදී අත්අඩංගුවට ගනු ලබන්නේ තමිල්නාඩු රාජ්‍ය ත්‍රස්ත විරෝධි බළකාය විසිනි.
බාලචන්ද්‍රන් පුෂ්පරාජ් නොහොත් පූකුඩිකන්නා සමඟ තවත් පාතාලයේ තිදෙනෙක් අත්අඩංගුවට ගත්තේය. ඒ කේරලයේ අංගමාලි හිදීය. අත්අඩංගුවට ගන්නා අවස්ථාවේදී පූකුඩිකන්නා ඇතුළු පාතාල අපරාධකරුවන් තිදෙනාම පෙනී සිට ඇත්තේ ඉන්දියානුවන් ලෙසිනි. ඒ ව්‍යාජ ලෙස සකස් කළ හඳුනාගැනීමේ පත්‍ර ද ළඟ තබාගෙනය.
ඉන්දියාවේ රැඳී සිටියදී අත්අඩංගුවට ගත් අපරාධකරුවන් අතර වැල්ලේ සුරංග ද සිටියේය. මෝදර වැල්ලේ පාතාල අණසක පතුරුවා ගෙන සිටියේ සුරංගය. ඔහු ගැටුනේ වැල්ලේ සාරංග සමගිනි. වැල්ලේ සාරංග ද සිටින්නේ ඉන්දියාවේය. ඔහුත් සිටින්නේ ඉන්දියාවේ හිරගෙදරකය. මෑතකදීත් ඔවුන් දෙදෙනාගේ කල්ලි අතර හටගත් ගැටුම්වලින් ඔවුන්ගේ ගෝලබාලයන් කිහිප දෙනෙක්ම මරුමුවට පත්වූයේය. එම ගැටුම් වලට මුල මත්කුඩු ජාවාරම්ය. අදටත් ඔවුන්ගේ ගෝලයන් සිටින්නේ එකිනෙකා මරා ගනිමිනි.
ඉන්දියානු ආරක්ෂක අංශ විසින් එරට රැඳී සිටින ශ්‍රී ලාංකේය පාතාල අපරාධකරුවන් කොටුකර ගැනීමේ මෙහෙයුමේදී අත්අඩංගුවට ගත් අය අතර පොලිස් මත්ද්‍රව්‍ය කාර්යාංශයේ වැටලීම් අංශයේ ප්‍රධානියාව සිටි නියෝමාල් රංගජීවට පිළියන්දලදී වෙඩි තබා මරා දැමීමට හැදූ ආමි අසිත ද සිටින්නේය. මාකඳුරේ මධුෂ්ගේ සැලසුමකට අනුව ආමි අසිත විසින් රංගජීවට වෙඩි තබන්නේ ඔහුව මරා දැමීමටය. එදා ආමි අසිත සාර්ථක ලෙස සිය ඉලක්කය ලබාගත්ත ද නියෝමාල් රංගජීව තවදුරටත් ජීවත් වන්නට වාසනාවන්ත වූයේය. එහෙත් එදා රංගජීව සමඟ සිටි පොලිස් මත්ද්‍රව්‍ය කාර්යාංශයේ සේවය කළ දක්ෂ නිලධාරියෙක් අසිතගේ වෙඩිල්ලෙන් දැයට අහිමිවී ගියේය. අසිත බෝට්ටුවක නැඟී ඉන්දියාට පනින්නේ එම වෙඩි ප්‍රහාරයත් සමඟ රටේම ඇති විශේෂ පොලිස් අංශ අසිතව කෝටු මස් කිරීමට හතර අතේ සොයන්නට ගැනීමත් සමඟිනි. මත්කුඩු වැටලීමකට ඔත්තුව දෙමින් එදා රංගජීව පිළියන්දලට රැගෙන ගොස් ඔහු ඇතුළු නිලධාරීන් බිල්ලට දුන් නවාස් ද බෝට්ටුවකින් පැන්නේ ඉන්දියාවටය. ඒ සිය අඹු දරුවන් සමගිනි. ඔහුගේ නවාතැන් පොල බවට පත්වන්නේ ඉන්දියාවේ ගෝවේ පැත්තය. එහෙත් ඉන්දියාව තුළ සිදුවූ මෙම මෙහෙයුමට නවාස් ද කොටුවී තිබුණේ ඔහු එරට සිට මත්කුඩු ජාවාරමට සම්බන්ධව සිටි බැවිනි. .
ඉන්දියානු ආරක්ෂක අංශ විසින් විටෙන් විට කළ මෙහෙයුම්වලින් එරටදී අල්ලා ගත් මෙරට පාතාලයේ අපරාධකරුවන්ගේ ගණන විස්සකට වැඩිය. ඔවුන් හැමෝම රඳවා තැබුවේ තමිල්නාඩුවේ ට්‍රිචිහි පිහිටි විශේෂ රැඳුවුම් කඳවුරේය. මෙම කඳවුර ඔවුන්ට සිය නිවෙස්වලටත් වඩා සැපවත් විය. කොටගාමිණිගේ උපන්දින සාදය පවා ඔවුන් මෙම කඳවුරේදී ජයටම ගත්තේය. එහි සිට නිදහසේ මත්කුඩු ජාවාරම ද මෙහෙයවනු ලැබුවේ හිතූ හැටියට ජංගම දුරකතන භාවිත කරමිනි. මේ හැම දෙයක් ගැනම ඉන්දීය ජාතික විමර්ශන ඒජන්සිය ඇස ගසාගෙන සිටින බව ඒ අය දැන සිටියේ නැත. ඉන්දීය ජාතික විමර්ශන ඒජන්සිය කළේ ගුණා ඇතුළු පිරිසකට නිදැල්ලේ ඉන්නට දී ඔවුන්ව නිරීක්ෂණය කිරීමය.
එහිදී වඩාත් හොඳින් තහවුරු වන්නේ මෙම පිරිස එල්.ටී.ටී.ඊ.යට නැවත පණ පෙවීමේ අරමුණෙන් ආයුධ ජාවාරමක පවා ඒ වන විට නිරතව සිටින බවය. ඒ පකිස්තානු මත්කුඩු ජාවාරම්කරුවන් සමඟ එක්වය. මේ අය ඩුබායි, පාකිස්තාන්, ඉරාන්, මාලදිවයින සහ සීසෙල්ස් යන රටවල්වල රැඳී සිටින මත්කුඩු ජාවාරම්කරුවන් සමඟ ද ඉතා කිට්ටු සම්බන්ධකම් ගොඩනඟාගෙන සිටින බව ඉන්දීය ජාතික විමර්ශන ඒජන්සියේ නිලධාරීන්ට පෙනී ගියේය. මෙහිදී ඉන්දීය ජාතික ආරක්ෂක ඒජන්සියට පෙනී ගියේ මේ හැම මත්කුඩු ජාවාරම්කරුවකුම මෙහෙයවන්නේ හාජි සලීම් නැමැති පකිස්තානු ජාතික මත්කුඩු ජාවාරම්කරු බවය. ගුණා ඇතුළු මෙරට කුඩු පාතාලයේ අපරාධකරුවන්ගෙන් ඉන්දියාවේ ජාතික ආරක්ෂාවට දැඩි තර්ජනයක් ඒ වන විටත් එල්ලවී ඇති බව ඉන්දියානු ආරක්ෂක අංශ වෙත පෙනී යන්නේ ඒත් එක්කමය. ඒ අනුව ගුණා ඇතුළු හඳුනාගත් පාතාල අපරාධකරුවන් 10 දෙනෙක් සමඟ ඔවුන් සමඟ රැඳී සිටියදී අත්අඩංගුවට ගත් ඉන්දීය පාතාලයේ අපරාධකරුවන් තිදෙනෙක් තමිල්නාඩුවේ ට්‍රිචිහි පිහිටි රැඳවුම් කඳවුරේ සිට ඉන්දීය ජාතික විමර්ශන ඒජන්සිය සිය භාරයට ගත්තේය. ඒ පසුගිය වසරේ දෙසැම්බර් මාසයේදීය. මාස හයක් තිස්සේ රඳවාගෙන කළ විමර්ශනයේදී පැහැදිලිවම හෙළිවී ඇත්තේ මෙම 10 දෙනා ඉන්දියාවේ ජාතික ආරක්ෂාවට ද දැඩි තර්ජනයක් වන බවය. මෙම පාතාල අපරාධකරුවන් අල්ලාගත් බව දැනගත් දා සිටම ඔවුන්ව මෙරටට භාරදෙන ලෙස ඉල්ලා සිටියත් ඉන්දියාව ඔවුන්ව මෙරටට භාරදීමට එතරම් උනන්දුවක් නොදැක්වූයේ ඇයිදැයි පැහැදිලි වන්නේ දැන්ය. ඒ ඉන්දියාවේදීම නඩු අසා ඔවුන්ට දඬුවම් දීමට ඉන්දියාව සූදානම් වන බැවිනි. පසුගිය සතියේ ඔවුන්ට චෝදනා පත්‍ර ඉදිරිපත් කර ඇත්තේ ද ඒ වෙනුවෙනි.
