එකතු කළ අගය මත බදු (සංශෝධන) සහ දේශීය ආදායම් (සංශෝධන) පනත් කෙටුම්පත් ද්විත්වය සංශෝධන සහිතව වැඩි ඡන්දයෙන් 09වැනි දා සිකුරාදා පාර්ලිමේන්තුවේදී සම්මත විය.
පනත් කෙටුම්පත් දෙවැනිවර කියැවීමේ විවාදය සිකුරාදා දිනය පුරා පැවති අතර, එකතු කළ අගය මත බදු (සංශෝධන) පනත් කෙටුම්පත දෙවනවර කියැවීම සඳහා විරුද්ධ පක්ෂය ඡන්ද විමසීමක් ඉල්ලා සිටි අතර එහිදී පනත් කෙටුම්පතට පක්ෂව ඡන්ද 82ක් ලැබුණ අතර විරුද්ධව ලැබුණු ඡන්ද සංඛ්‍යාව 52කි.
එකතු කළ අගය මත බදු (සංශෝධන) පනත් කෙටුම්පත තෙවනවර කියවීම සඳහාද විරුද්ධ පක්ෂය විසින් ඡන්ද විමසීමක් ඉල්ලා සිටි අතර එහිදී පනත් කෙටුම්පතට පක්ෂව ඡන්ද 82ක් හිමිවූ අතර විරුද්ධව ඡන්ද 41ක් හිමි විය.
දේශීය ආදායම් (සංශෝධන) පනත් කෙටුම්පත ද දෙවනවර කියවීම සඳහා විරුද්ධ පාර්ශ්වයෙන් ඡන්ද විමසීමක් ඉල්ලා සිටි අතර එහිදී පනත් කෙටුම්පතට පක්ෂව ඡන්ද 83ක් ලැබුණු අතර විරුද්ධව ඡන්ද 41 ලැබිණි. එම පනත් කෙටුම්පත තෙවනවර කියවීම සඳහා ද විරුද්ධ පාර්ශ්වයෙන් ඡන්ද විමසීමක් ඉල්ලා සිටි අතර එහිදී පනත් කෙටුම්පතට පක්ෂව ඡන්ද 79ක් ලැබුණු අතර විරුද්ධව ඡන්ද 36 ලැබිණි.
