වාසනාව සහ අවාසනාව යනු අසුරු සැණින් වෙනස් විය හැකි දෙයකි. ඒ නිසාමදෝ වාසනාව උරගා බැලීමට බොහෝ දෙනකු තුළ ඇත්තේ පුදුමාකාර උනන්දුවකි. ඒ අතරිනුත් හදිසියේ පහළ වන වාසනාව උරගා බැලීමට වැඩි දෙනකු කැමැත්තක් දක්වති. ‘මැණික්’ ගැන පතළ රත්නපුරයේ පැල්මඬුල්ලෙන් ඉකුත් 11 වැනිදා වාර්තා වූයේ වාසනාව සොයා ගිය ගමනක් අවාසනාවන්ත ඉරණමකින් අවසන් වීමේ ශෝචනීය පුවතකි.
ඒ අවාසනාවන්ත ඉරණමට ලක්වූයේ, පැල්මඬුල්ල පොලිස් වසමට අයත් බටලන්ද සිංහපුර ප්‍රදේශයේ පදිංචි රම්පටි මනන්නලාගේ පුන්සිරි පුෂ්පකුමාර නැමති (39) තිදරු පියෙකු සහ ඊරියමුල්ල කට්ටඩිගේ දිනේෂ් මධුශංඛ (31) නැමති එක්දරු පියෙකි. පුන්සිරි පුෂ්පකුමාර, ලංකා විදුලි බල මණ්ඩලයේ බළංගොඩ ඩිපෝවට අනුයුක්තව සේවය කළ අතර, දිනේෂ් මධුශංඛ පැල්මඬුල්ල මාර්ග සංවර්ධන අධිකාරියේ සේවය කරමින් සිටි ‘රැකියා ලක්ෂයේ’ බහුකාර්ය සංවර්ධන නිලධාරියෙකි. පුන්සිරි සහ දිනේෂ් සමීප මිතුරන් වූ අතර ඔවුන් අතර වූයේ සහෝදරතාත්මක බැඳීමකි. ඒ නිසාම ඔවුනොවුන් එකිනෙකාගේ දුක, සැප මනාව හැඳින සිටියහ. අදට වඩා පැහැබර ඉසුරුමත් හෙට දවසක් ගැන අපේක්ෂාවෙන් සිටි දෙමිතුරෝ ඒ සඳහා තෝරාගත්තේ රත්නපුර ප්‍රදේශයේ කාටත් හුරු පුරුදු කටයුත්තකි. ඒ පතලක් කපා වාසනාව උරගා බැලීමටය. ඉකුත් 11 වැනිදා රාත්‍රී 8.30ත් 9.00ත් අතර පුන්සිරි සහ දිනේෂ් තවත් දෙනෙකු සමඟ සිය නිවෙස්වලින් පිටත් වූයේ ඒ තීරණාත්මක ගමන යෑමටයි. එහෙත් වාසනාවට පෙර අවාසනාව ඔවුහු සොයා පැමිණියේය. පතල කරා ගමන් මඟ වැටී තිබූ ඊරියමුල්ල කුඹුරේ අටවා තිබූ වල් ඌරන් මැරීමට භාවිත කරන විදුලි රැහැනකට හසුවීමෙන් ඔවුන් දෙදෙනාට සිය ජීවිත අහිමි විය. මියගිය දිනේෂ්ගේ සහ පුන්සිරිගේ නිවෙස් අතර ඇත්තේ මීටර් සියයක පමණ දුරකි. එකට ජීවිත ගමනට සමුදුන් දෙමිතුරන් අවසන් ගමන් ගියේ ද එකටමය. ඉකුත් 12 වැනිදා සවස බටලන්ද සිංහපුර මුළු ගම්මානයම හඬවමින් ගොඩගම සුසාන භූමියේදී ඔවුන්ගේ අවසන් කටයුතු සිදුකෙරුණු අතර, මියගිය මිතුරන්ගේ දේහයන් මිහිදන් කරනු ලැබුවේ එකම වළක ය. 
සිය දයාබර සැමියාට සිදුවූ විපත දිනේෂ් මධුශංඛගේ බිරිය ඩබ්.එම්.දිනේෂා තරංගනී ජයවීර (30) සිහි කළේ නිමක් නැති කඳුළු අතරිනි.
“මගේ ගම මොනරාගල, දඹගල්ල. අපි දෙන්නා විවාහ වුණේ ප්‍රේම සම්බන්ධයකින්. අපට දුවෙක් ඉන්නවා. අපි ගොඩක් ආර්ථික අමාරුකම් මැද්දේ ඉන්න වෙලාවෙ සෙනෙවිරත්න ඇමතිතුමා දිනේෂ්ට රස්සාවක් දුන්නා. ඒකත් කරගෙන අපි ජීවිතේ පිළිවෙළක් වේගෙන එද්දි තමයි මේ සිද්ධිය වුණේ. එදා මම එයාට ඔය ගමන යන්න එපාම කිව්වා. එයා ඒ වෙලාවෙ කියන දේ ඇහුව නම් මෙහෙම දෙයක් වෙන්නෙ නෑ. මමයි දරුවයි මේ ලෝකෙ තනිකරලා එයා ගියා. මම කොහොම මේ දුක දරා ගන්නද?”
එලෙස අඳුරු වී ඇත්තේ ඇයගේ ලෝකය පමණක් නොවේ. දිනේෂ් සමඟ අවසන් ගමන් ගිය ඔහුගේ මිතුරා පුන්සිරි පුෂ්පකුමාරගේ කැඳැල්ල ද අද වියෝ දුකෙන් ඇවිළෙයි. මේ, ඔහුගේ බිරිය ජයසේකර මුදියන්සේලාගේ ගංගා නිලන්ති ජයසේකර (36)ගේ බිඳුණු හඬයි.
“අපට දූලා දෙන්නෙකුයි පුතෙකුයි ඉන්නවා. පුන්සිරි විදුලිබල මණ්ඩලයේ රුවන්වැල්ල ඩිපෝවේ වැඩකරලා මීට මාස කීපයකට පෙර බළංගොඩට මාරුවෙලා ආවා. අපි ගොඩක් දුක් වින්දා. දරුවන්ට උගන්වන්න වැඩි බරක් දෙන්න ඕන කියලයි එයා බලංගොඩට මාරුව හදා ගත්තෙ. එදා පතලකට යනව කිව්වම එයාට ඕවා හුරු නැති නිසා මම යන්න එපා කිව්වා. ඒත් ගියා. පැය භාගයක් යද්දි ආරංචි වුණා යාළුවෙක් බේර ගන්න ගිහින් එයාට කරන්ට් එක වැදිලා කියලා. යාළුවා බේරගන්න නොගියා නම් එයාට නොමැරී බේරෙන්න තිබුණා. ඒත් එයා අනුන් වෙනුවෙන් පණ ඇරලා උදව් කරන, හිත හොඳ කෙනෙක්. දැන් අපි හරිම අසරණයි. ගේ හැදුවෙ ණය මුදලක් අරන්. අපිට වෙන කිසිම ආදායමක් නෑ. දරුවන්ට උගන්වන්නයි ණය ගෙවන්නයි ජීවත් වෙනව කියන එකයි දැන් මට හිතා ගන්න බැරි දෙයක්. ආයෙමත් කාටවත් මේ වගේ දෙයක් නොවෙන්න විදුලිය දාපු අයට නිසි දඬුවම් ලබා දෙනවා නම් අපි වගේ කවුරුවත් අසරණ වෙන එකක් නෑ.”
පුන්සිරි, දරුවන් පස් දෙනකුගෙන් යුතු පවුලේ වැඩිමහල් දරුවා ය. තමා ජීවත්ව සිටියදීම තම දරුවාගේ මරණය දෑසින් දකින්නට සිදුවීමේ වේදනාව දරාගත නොහැකිව පුන්සිරිගේ මව ගල්ලෙන වත්තේ පේමලතා (59) හඬා වැලපෙන්නීය.
“දරුවන්ගේ තාත්තා අවුරුදු විසි නවයකට කලින් මියගියා. එදා ඉඳලා මම පුදුම දුකක් විඳලයි මේ දරුවො ලොකු මහත් කරගත්තෙ. තමන්ගේ දරුවගෙ මරණය දකින්න අම්මා කෙනෙක් විදිහට මම කොච්චර පාපයක් කරල තියෙනවද කියලා හිතෙනවා. මේ වගේ ඉරණමක් සතෙකුටවත් වෙන්න එපා කියලයි මම කියන්නෙ”
ඇය මෙන්ම මියගිය දිනේෂ් මධුශංඛ ගේ මව ජේ.එම්.සෝමරත්න මැණිකේ (68)ගේ හද තුළ ඇවිළෙන්නේ ද නිවා දැමිය නොහැකි වියෝ ගින්නකි. මියගිය දිනේෂ් ඇයගේ දරුවන් පස් දෙනාගෙන් බාල පුතුය. “අපිව බලා ගත්තෙ මගේ රත්තරන් පුතා. එයා එදා වැඩ ඇරිලා ඇවිත් හිටි ගමන්ම කිව්වා පතලකට යනවා කියලා. මම කිව්වා එහෙම පතල්වලට යනවද කියලා. ඒත් කියන දේ ඇහුවෙ නැතුව එයාගේ මතයට ගිය ගමනක් ඒක. මගේ පුතා අපිට නැතිවුණා. මේ වේදනාව කොහොම දරාගන්නද?”
පුන්සිරිටත් දිනේෂ්ටත් මරණය කැඳවූ ඒ අවාසනාවන්ත සිදුවීම සිදුවූ දා ඔවුන් සමඟ ඒ ගමනට එක්ව සිටි සෙසු සගයන් දෙදෙනා වන වැලිහිඳ කංකානමලාගේ සුගත් පුෂ්පකුමාර (36) සහ නාඔටුන්න බඩල්ගේ ඉන්ද්‍රජිත් නාඔටුන්න (36) ඒ සිදුවීම අප සමඟ සිහිපත් කළේ තවමත් පහ නොවූ කම්පනයෙනි.
“අපි දෙන්නම කරන්නෙ මේසන් වැඩ. මියගිය පුන්සිරියි දිනේෂුයි කතා කරලා ඇහුවා හොඳ පොට් එකක් තියෙනවා, පතලයක් දාමුද කියලා. අපි ඇහුවා තැන බැලුවද කියලා. එයාලා දවල් ගිහින් බැලුවා කියලා අපි දෙන්නට හවස 7.30 ඉඳලා කෝල් කරලා කිව්වා යමු කියලා. මුලින් අපි කැමති වුණේ නෑ. ඒත් යාළුවො නිසා ගියා. අපි දෙන්න යනකොට මහ තුන්මංහන්දියෙ ඒ දෙන්නා හිටියා. ෆෝන් එකේ එළියෙන් තමයි ගියෙ. ඉස්සරහම හිටියෙ දිනේෂ්.එයා කුඹුරේ නියරට අඩිය තිබ්බා විතරයි "අයියෝ අම්මා" කියල කෑගැහුවා. ඒ එක්කම දඩස් ගාලා කුඹුරට වැටුණා. පුන්සිරි කෑගහගෙන ළඟ ගෙදරකට ගිහින් වේළිච්ච ලීයක් ගෙනත් කම්බිය තළලා තළලා අයින් කරලා දිනේෂ් ළඟට පැනල කටින් හුස්ම දුන්නා. “මෙයාට පණ තියෙනවා. වරෙල්ලා ඉක්මනට” කියලා, පුන්සිරි මඩේ එරිලා ඉන්න ගමන්ම දිනේෂ්ව නියර උඩින් තිබ්බා, අපට අල්ලන්න කියලා. අපි අල්ලන්න හදනකොටම කරන්ට් එක වැදුනා. අපි කිව්වා අල්ලන්න එපා කියලා. ඒත් පුන්සිරි ඇල්ලුවා. එතකොටම එයාත් විසිවෙලා ගිහින් වැටුණා. පුන්සිරි කෑගැහුවා,
“අනේ චූටි අප්පෝ මට අමාරුයි“ කියලා. අපි කෑ ගැහුවා ගමටම ඇහෙන්න. ඒත් කවුරුත් ආවෙ නෑ. පොලීසියට කෝල් කරලා විනාඩි පහළොවක් යනකොට විදුලිබල මණ්ඩලයේ කට්ටියක් එක්ක ඇවිත් දිනේෂ් සහ පුන්සිරිව පොලීසියේ මහත්තුරුයි විදුලි බල මණ්ඩලයේ කට්ටියයි ගොඩක් දුර කර තියාගෙන ආවා. කහවත්ත රෝහලට ගෙනාවම කිව්වා මිය ගිහින් කියලා. අපරාදේ හොඳ යාළුවෝ දෙන්නෙක් වගේම වටිනා ජීවිත දෙකක් අපිට නැතිවුණේ”
පැල්මඬුල්ල පොලිස් ස්ථානාධිපති ප්‍රධාන පොලිස් පරීක්ෂක ධම්මික නවරත්න ප්‍රකාශ කළේ පුන්සිරිටත් දිනේෂ්ටත් මරු කැඳවූ අනවසර විදුලි රැහැන් ඇද, වල් ඌරන් මැරීමට තැත් කිරීම සම්බන්ධයෙන් වයස අවුරුදු 55ක් වන එම ප්‍රදේශයේම පුද්ගලයකු අත්අඩංගුවට ගත් බවයි.
මෙවැනි නීති විරෝධී ක්‍රියාවලට සම්බන්ධ පුද්ගලයන්ට ලබාදිය හැකි දඬුවම් මොනවාදැයි අප ලංකා විදුලි බල මණ්ඩලයේ පැල්මඬුල්ල විදුලි ඉංජිනේරු කාර්යාලයෙන් විමසීමක් කළෙමු. එහි ප්‍රකාශයකු සඳහන් කළේ මෙය පැල්මඩුල්ල විදුලි ඉංජිනේරු බලප්‍රදේශයේ සිදු වූ එකම සිදුවීම නොවන බවයි. 
“මේක ඉතාම බරපතළ වරදක්. මණ්ඩලයෙන් ලබාදෙන විදුලි රැහැනක් මඟින් පමණයි නිවෙසකට හෝ ආයතනයකට විදුලි සම්බන්ධතාවක් ලබාදෙන්නේ. මෙවැනි අනාරක්ෂිත ක්‍රියා නිසා විදුලිය දාන කෙනාව වුණත් විනාශ වෙන්න පුළුවන්. ගම්වල හුඟ දෙනෙක් මේ වැඩේ කරනවා. අඩුම තරමේ ගම්වල ඉන්න මිනිස්සු මේවා කරන්නෙ කවුද කියල දැන දැනත් අපිව දැනුම්වත් කරන්නෙ නැහැ. මේ තත්ත්වය යම් ප්‍රමාණයකින් හෝ මැඬ පවත්වා ගැනීමට විදුලි මාර්ග ආවරණ කේබල් යෙදීම මේ වන විට ආරම්භ කර තිබෙනවා. කෙනෙක් මැරුණත් ජනතාව එහි වරදකරු හඳුනා ගන්න උදව් කරන්නෙ නෑ. නමුත් ඒ ගම්වල මිනිස්සු දන්නවා මෙවැනි ක්‍රියාවල යෙදෙන අය ගැන. මේක හරිම අවදානමක්.”
ගම ම හඬමින් අවසන් ගමන් ගිය මිතුරන් දෙදෙනා වෙනුවෙන් ආගමික වතාවත් ඉටුකළ ගොඩගම ශ්‍රී රත්නසිංහාරාම විහාරාධිපති, කහවත්ත සෘෂිනිකේතන පිරිවෙනේ පරිවේණාධිපති ශ්‍රාස්ත්‍රපති කොස්ගම ධම්මසිරි හිමිපාණන් වහන්සේ ඒ අනුවේදනීය සිදුවීම පිළිබඳ මෙසේ පැවසූහ.
“බුදුරජාණන් වහන්සේ සිඟාලෝවාද සූත්‍රයේ දේශනා කළේ අවේලාවේ වීථි සංචාරය නිසා තමන් නොකළ වරදකට හසුවීම වළක්වා ගන්න බැරි බවයි. අනතුරුදායක බවක් වැටහෙන්නෙ නෑ. මේවා නිසා තමන් සහමුලින්ම විනාශ වෙන්න පුළුවන්. ඒ වගේ ම ප්‍රාණඝාතය විශාල අකුසලයක්. හිතක් පපුවක් නැති විදිහට විදුලිය යෙදීම නිසා වටිනා මිනිස් ජීවිත දෙකක් අහිමි වුණා. මේක ම්ලේච්ඡ මිනිස් ඝාතනයක්. මෙවැනි නීතිවිරෝධී ක්‍රියාවල යෙදෙන මිනිස්සු කොයි වෙලාවෙ මේ විදිහටම ජීවිතයෙන් වන්දි ගෙවයිද කියන්න බෑ. ඔවුන්ට නීතියෙන් දඬුවම් ලැබෙන්නත් පුළුවන්, නැතිවෙන්නත් පුළුවන්. නමුත් ධර්මානුකූලව නම් මෙවැනි පහත් අමනුෂ්‍ය ක්‍රියාවල යෙදෙන අයට සංසාරයේ කිසිදු ගැලවීමක් ලැබෙන්නෙ නැහැ. ඒ නිසා මිනිස් ජීවිතයක වටිනාකම අවබෝධ කර ගෙන යහපත් ලෙස ජීවත් වෙන්න පුරුදු වෙන්න ඕන. දුෂ්චරිතයෙන් ඈත් වෙන්න හිතාගන්න මේක හොඳම අවස්ථාවක් කර ගත යුතුයි.”
පාපී සිතුවිලි සහිත පුද්ගලයකු සතකුගේ මස් බුදීමේ තෘෂ්ණාවෙන් ඇටවූ විදුලි උගුල හේතුවෙන් බිරියන් දෙනෙකුට සැමියකුගේ රැකවරණයත් අහිංසක දරුවන් සිවු දෙනකුට පිය සෙනෙහසත් සදහටම අහිමි විය. ඔවුන්ගේ හදිසි නික්ම යෑමෙන් අසරණ මවුපියන්ට සදාතනික වේදනාවක් උරුම වූවා පමණක් නොව ගමට, රටට වැඩදායී පුද්ගලයන් දෙදෙනකු අකාලයේ අහිමි විය. පුන්සිරිටත් දිනේෂ්ටත් වූ විපත හෙට තවත් අයකුට උරුම නොවන්නට නම් නීතිවිරෝධී මෙවැනි ක්‍රියාවලට තිත තබන්නට නීතියේ පිළිසරණ මෙන්ම ජනතාවගේ විමසිල්ල සහ දැනුවත් භාවය ද නැතිවම බැරිය.
පැල්මඬුල්ල වැඩ බලන මහේස්ත්‍රාත් හවුපෙ එම්. ජයසිරි විසින් ස්ථානීය පරීක්ෂණය සිදු කරන ලද අතර, රත්නපුර පළාත් මහ රෝහලේදී මෘතදේහ පිළිබඳ පශ්චාත් මරණ පරීක්ෂණය පැවැත්විණි.
සබරගමුව පළාත් ජ්‍යෙෂ්ඨ නියෝජ්‍ය පොලිස්පති මහින්ද ගුණරත්න පළාත් භාර නියෝජ්‍ය පොලිස්පති වීරසේකර, සහකාර පොලිස් අධිකාරී පී.ඩබ්.එස්. සුමනපාල සහ පොලිස් අධිකාරී සේනක වීරසිංහ ගේ උපදෙස් පරිදි පැල්මඬුල්ල පොලිස් ස්ථානාධිපති ප්‍රධාන පොලිස් පරීක්ෂක ධම්මික නවරත්නගේ මෙහෙයවීමෙන් අපරාධ අංශයේ ස්ථානාධිපති පොලිස් පරීක්ෂක ඩබ්.ජී.ජයසිංහ, පොලිස් සැරයන් (36126) මාධව, (30170)සෙනෙවිරත්න සහ පොලිස් කොස්තාපල් (77146) මුණසිංහ යන නිලධාරීහූ සිද්ධිය සම්බන්ධයෙන් වැඩිදුර පරීක්ෂණ පවත්වන ලදී.
සටහන සහ ඡායාරූප
තුෂාර හෙට්ටිආරච්චි, පැල්මඬුල්ල සංචාරයකින් පසුව
