අනාගත පෘථිවිය කාන්තාරයක් විය හැකි බවට අනාවැකි කොතරම් පැවසුවද මිනිසා තම ක්‍රියාකාරකම් පාලනය කර ගන්නා බවක් පෙනෙන්නට නැත. කාබන් වායු විමෝචනය සිදුවන ක්‍රියාකාරකම් නවතා දැමීමට හෝ පාලනය කිරීමට මිනිසා තවමත් කටයුතු කර නොමැති අතර වන විනාශයද දිනෙන් දින ශීඝ්‍රයෙන් වර්ධනය වන්නේය.
මිනිස් ක්‍රියාකාරකම් හේතුවෙන් පෘථිවි ගෝලයේ උෂ්ණත්වය ඉහළ යන බව අදින් දශක කිහිපයකට පෙර දීම පෙන්වා දුන්නද කිසිවකු ඒ සම්බන්ධව අවධානය යොමු කර සිටියේ නැත. එහෙත් මේ වන විට සිදුවෙමින් පවතින විනාශය මිනිස් ඇසට දැකිය හැකි තරම්ය. පෘථිවියේ වායු සමීකරණ පද්ධතිය ලෙස කටයුතු කරන ධ්‍රැවීය අයිස් ස්ථර සහ ග්ලැසියර මේ වනවිට වේගයෙන් ක්ෂය වෙමින් යන්නේය. අයිස්ලන්තයේ මිනිස් වාසයට ආසන්නයෙන්ම පිහිටා ඇති ග්ලැසියරය වන ඔක්ජෝකුල් පසුගිය වසරේදී සම්පූර්ණයෙන් දියව ගිය බව නිල වශයෙන් ප්‍රකාශයට පත් කෙරිණි. දැන් එම කනගාටුදායක වාතාවරණයට මුහුණ දෙමින් සිටින්නේ ලෝකයේ විශාලතම දූපත වන ග්‍රීන්ලන්තයයි.
ග්‍රීන්ලන්තයේ ප්‍රධාන ග්ලැසියරයක් වන N97 ග්ලැසියරයෙන් වර්ග කිලෝමීටර් 110ක තට්ටුවක් ගැලවී ඉවත්වගොස් ඇති බව පසුගියදා එරට නිල වහයෙන් නිවේදනය කර තිබේ. මේ වසරේ දැනට වාර්තා වී ඇති විනාශය එපමණක් වුවද පසුගිය 2019 වසරේදී පමණක් ග්‍රීන්ලන්තයේ ග්ලැසියරවලින් ගැලවී ඉවතට ගොස් ඇති අයිස් ප්‍රමාණය ටොන් බිලියන 532ක් බව ප්‍රකාශ වී තිබේ. එය 2003 වසරේ සිට 2019 දක්වා ගැලවී ගිය අයිස් ප්‍රමාණය මෙන් දෙගුණයකි. ඒ අනුව ගෝලීය උෂ්ණත්වය ඉහළ යෑම කෙතරම් ශීඝ්‍රයෙන් වර්ධනය වෙමින් පවතින්නේද යන්න අනුමාන කිරීම අපහසු නොවේ.
ග්‍රීන්ලන්තය එතරම් විනාශයකට මුහුණ දෙමින් සිටින විට ඇන්ටාක්ටික් ධ්‍රැවීය කලාපයේ වාතාවරණයද ඊට නොදෙවෙනිය. ලොව විශාලතම ග්ලැසියර පිහිටා ඇති ඇන්ටාක්ටිකාවේ අයිස් ස්ථර යටින් උණුසුම් ජලය ගලා යෑම හේතුවෙන් එම අයිස් ස්ථර වේගයෙන් දියවෙමින් පවතින බව පාරිසරික විශේෂඥයන් සොයා ගත්තේ මෑතකදීය. මේ වසරේදී ඔවුන් පෙන්වා දී ඇත්තේ විනාශය ඉතා වේගවත් බවයි.
පෘථිවියේ සෙසු සාගර කලාපවල ජලය දිගින් දිගටම උණුසුම් වෙමින් පවතින අතර එම උණුසුම් ජලය ප්‍රවාහ ලෙසින් ඇන්ටාක්ටිකා කලාපයටද පැමිණේ. එම ජලය අයිස් ස්ථර යටින් ගලා යෑමේදී මතුපිටට නොපෙනෙන ලෙස අයිස් තට්ටු යටින් ඛාදනය වෙමින් පවතින බව විද්‍යාඥයන් විසින් සොයා ගනු ලැබුවේ ඉතාම මෑතකදීය. ඊට හේතුව මතුපිට අයිස් තට්ටුවලට උණුසුම් ජලයෙන් එතරම් බලපෑමක් නොවීමයි.
එහෙත් මේ වන විට වාර්ෂිකව අයිස් ටොන් බිලියන 80ක් පමණ දියව යන බව විද්‍යාඥයන්ගේ මතයයි. මේ දියව යන සියලු අයිස් ජලය බවට පත්ව සාගර ජල ස්කන්ධය වර්ධනය කරන අතර වසරකට සියයට හතරකින් සාගර ජල මට්ටම ඉහළ යන බවද ඔවුහු පෙන්වා දෙති.
ග්ලැසියර් යටින් ගලා යන උණුසුම් ජල ධාරා සම්බන්ධව වැඩිදුර තොරතුරු සෙවීමට නෞකා මෙන්ම ගුවන් යානාද යොදා ගනිමින් පර්යේෂණ මාලාවක් සිදුකිරීමට විද්‍යාඥයන් කටයුතු කළ අතර එහිදී සොයා ගනු ලැබුවේ පෙර අනුමාන කළ ප්‍රමාණයට වඩා විශාල ජල ප්‍රවාහයක් වඩාත් ගැඹුරෙන් අයිස් ස්ථර දිය කරමින් ගලා යන බවයි.
අයිස් ස්ථර දියවීම සම්බන්ධව තොරතුරු සොයමින් ගුවන් යානයකින් ගමන් කළ පාරිසරික විද්‍යාඥ ආචාර්ය ජෝඩ්න් පවසා ඇත්තේ තමන්ට දක්නට ලැබුණු දසුන් සැබවින්ම පෘථිවියේ අනාගතය සම්බන්ධව සිත බියපත් කරවන බවයි.
