ඉතිහාසයේ ප්‍රථම වතාවට ඉංග්‍රීසි නොවන බසකින් තිරගත වුණු සිනමාපටයකට හොඳම චිත්‍රපටය හිමි සම්මානය පුදදෙමින් ඔස්කාර් සම්මාන උළෙල පසුගියදා අමෙරිකාවේදී නිමාවට පත්විය. එහි සම්මාන ලාභීන් ගැන ලොවම දැනුම්වත් වුවද බොහෝ දෙනා නොදන්නා තිරය පිටුපස කතා රැසක්ද සම්මාන උළෙලෙන් පසු මාධ්‍ය ඔස්සේ ලොව පුරා පැතිර ගියේය.
ඔස්කාර් සම්මාන උළෙල පැවැත්වීමේ අරමුණු අතර අමෙරිකානු සිනමාව ඉහළට ඔසවා තැබීම එක් විශේෂ අරමුණකි. එමෙන්ම උළෙල නරඹන ප්‍රේක්ෂකයන් සංඛ්‍යාව හැකි පමණ වැඩි කර ගැනීමෙන් තම වියදම් ආවරණය කර ගැනීමද උළෙලේ සංවිධායකයන්ගේ තවත් අරමුණක් වේ. එබැවින්ම උළෙල පැවැත්වීමට පෙර ඒ සම්බන්ධව ප්‍රචාරණ දියත් කර වැඩි ප්‍රේක්ෂක සංඛ්‍යාවක් ආකර්ෂණය කර ගැනීමට ද සංවිධායකයෝ කටයුතු කරති. මෙවර පැවති ඔස්කාර් සිනමා සම්මාන උළෙල ප්‍රේක්ෂකයන් මිලියන 23.5ක් සජීවීව නරඹා තිබේ. එහෙත් පසුගිය වසරේ ඔස්කාර් සම්මාන උළෙල ප්‍රේක්ෂකයන් මිලියන 29.5ක් නරඹා ඇති අතර ඒ අනුව මෙවර ප්‍රේක්ෂකයන්ගේ පැහැදිලි අඩුවක් දක්නට ලැබේ.
එහෙත් ඇතැම් විචාරකයන් පෙන්වා දී ඇත්තේ සිනමාවෙන් ප්‍රේක්ෂකයන් බැහැරවීම මිස වෙනත් හේතුවක් ඔස්කාර් නරඹන්නන් සංඛ්‍යාව පහළ යෑමට බලපෑම් කර නොමැති බවයි. කෙසේවුවද පසුගිය වසරින් පසු ඔස්කාර් ප්‍රේක්ෂකයන් වර්ධනය කර ගැනීමට එහි සංවිධායකයන් විසින් නොයෙක් උත්සාහයන්ද ක්‍රියාත්මක කර තිබේ. එහෙත් ඒ කිසිවක් මෙවර ප්‍රේක්ෂකයන් සංඛ්‍යාව ඉහළ දමා ගැනීමට සමත් වී නැත.
සිනමාව වෙනුවට බොහෝ දෙනා යූ ටියුබ් වැනි මාධ්‍ය වෙතද, අන්තර්ජාල සිනමාව වෙතද ආකර්ෂණය වීම මෙලෙස ප්‍රේක්ෂකයන් අඩුවීමට හේතුවක් ලෙස ද හඳුනාගත හැකිය.
අතීතයේදී ඔස්කාර් සම්මාන උළෙල තුළ අමෙරිකානු පාලන තන්ත්‍රය විවේචනය කරන සිනමාපට පවා සම්මානයට පාත්‍ර වූ අතර පසුව ඒ වෙනුවට අමෙරිකානු දේශපාලනය උත්කර්ෂයට ලක්කරන සිනමාපට පමණක් සම්මානයට පාත්‍රවන රැල්ලක් දක්නට විය. ජේම්ස් කැමරන්ගේ ඇවටාර් වැනි සිනමාපට ඔස්කා උළෙලෙන් ප්‍රතික්ෂේප වන විට කැතරින් බිගලෝ ගේ හර්ට් ලොකර් වැනි සිනමාපට ඇගැයීමට ලක්වීම උදාහරණ ලෙස දැක්විය හැකිය.
කෙසේවුවද මෙවර හොඳම චිත්‍රපටයට හිමි සම්මානය විදෙස් චිත්‍රපටයක් විසින් දිනා ගැනීම සුළු කොට තැකීමට නොහැකිය. මේ වන විට දකුණු කොරියානු පැරාසයිට් සිනමාපටය සම්බන්ධව පළවන විචාර බොහොමයකින් ප්‍රකාශ වන්නේ එහි අධ්‍යක්ෂ බොන්ග් ජොන්ග් හෝ යනු ඉතා දක්ෂ කතාකරුවකු බවයි.
ඔහු ගේ නිර්මාණය හොඳම විදෙස් චිත්‍රපටය සහ හොඳම චිත්‍රපටය යන සම්මාන ද්විත්වයම එකවර ලබා ගැනීමට සමත්වීම සුළු කොට තැකිය නොහැකිය. ඔස්කාර් ඉතිහාසයේ ඉංග්‍රීසි භාෂාවෙන් නිර්මාණය නොවුණු සිනමාපටයකට හොඳම චිත්‍රපටය වෙනුවෙන් වන සම්මානය හිමිවූ ප්‍රථම අවස්ථාවද මෙය වේ. බොන්ග් ජොන්ග් හෝ ගේ කතාව තුළ ත්‍රාසය මෙන්ම හාස්‍යයද නොඩුව කැටිව තිබීම ඉතා දක්ෂ තිර රචකයකුට පමණක් පෙන්විය හැකි සමත්කමකි. එපමණක්ද නොව ඔහු ඒ අතරට දකුණු කොරියාවේ සැබෑ ජීවන රටාව, සත්‍යය සහ ව්‍යාජය අතර සටනක යෙදෙන මිනිස් ජීවිතද, ඇති නැති පරතරයද මනාව කැටිකොට ගැනීමටද සමත් වී තිබේ. කතා කීමේ හැකියාව පමණක් නොව එම කතා සාර්ථකව සිනමා පටයකට ගෙන ප්‍රේක්ෂක අවධානය දිනා ගැනීම දුර්ලභ සමත්කමකි. මෙවර ඔස්කාර් උළෙලේ ජය දද නැංවූ දකුණු කොරියානු අධ්‍යක්ෂවරයා ලොවට තහවුරු කර සිටියේ තමන් සතුව එම දක්ෂතාව පවතින බවයි.
මේ අතර රෙනී සෙල්වෙගර් හොඳම නිළිය සම්මානය සහ ජෝකීන් ෆීනික්ස් හොඳම නළුවා සම්මානය ද දිනා ගත්හ. සම්මානය දිනා ගැනීමෙන් පසු ජෝකර් සිනමාපටයේ අති දක්ෂ ලෙස රංගනයේ යෙදුණු ජෝකීන් ෆීනික්ස් සභාව අමතා තරමක දීර්ඝ දේශනයක් කරමින් එකිනෙකාට සෙනෙහස දැක්වීමේ සහ පරිසරය ආරක්ෂා කර ගැනීමේ වැදගත්කම පවසා සිටියේය.
