තවත් මාස 18කින් අනූපස් වැනි විය සම්පූර්ණ කරන බ්‍රිතාන්‍යයේ එලිසබෙත් මහ රැජන බොහෝ දුරට වෘත්තීයමය රාජකාරිවලින් විශ්‍රාම ගනු ඇතැයි බකිංහැම් මාලිගයෙන් ලැබෙන තොරතුරු ඇසුරෙන් එරට මාධ්‍ය වාර්තා කර තිබේ. බ්‍රිතාන්‍යයේ බොහෝ පුවත්පත් එම පුවත වාර්තා කර තිබූ අතර අන්තර්ජාලයේ වෙබ් අඩවි රැසකද වාර්තා වී තිබිණ. එලිසබෙත් රැජන දැන් ඉතා වියපත් වුවද තවමත් ස්වකීය රාජ්‍යත්වයට අයත් නිල රාජකාරිවල නිරත වන්නීය. එහෙත් ඇයගේ ස්වාමි පුරුෂයා වන පිලිප් කුමරු පසුගියදා වයස අවුරුදු 95 සම්පූර්ණ වීමෙන් පසු ස්වකීය නිල රාජකාරීවලින් විශ්‍රාම ගත්තේය. එසේ කිරීමට හේතුව ලෙස ඔහු දක්වා තිබුණේ වයස්ගත වීම හේතුවෙන් නිල රාජකාරීවල නිතර වීම අපහසු වීමයි.
මේ අනුව වයස අවුරුදු 95 සම්පූර්ණ වීමෙන් පසු එලිසබෙත් රැජනද ස්වකීය රාජකාරීවලින් විශ්‍රාමගැනීමට විශාල ඉඩකඩක් පවතින බවට ඉඟි බකිංහැම් මාලිගය වෙතින් ලැබී තිබේ. එසේ වුවහොත් රැජනගේ රාජකාරීවල නිරත වීමේ අවස්ථාව චාල්ස් කුමරුට පැවරෙනු ඇති බවද එම වාර්තාවල සඳහන් වී තිබේ.
බ්‍රිතාන්‍ය රාජකීය සම්ප්‍රදායට අනුව රජකම කිසිවකුට පැවරිය නොහැකිය. එලිසබෙත් රැජනගේ රජකම චාල්ස් කුමරුට හිමි වීමට නම් ඇයගේ අභාවය සිදු විය යුතුමය. ඒ අනුව රැජන රාජකාරිවලින් සමුගත් පසු සිදු වනු ඇත්තේ ඇයගේ රාජකාරී පමණක් චාල්ස් කුමරුට හිමි වීමය. කෙසේ වුවද රැජනගේ රාජකීය වගකීම් චාල්ස් කුමරුට පැවරීම යනු කිරීටයේ එක් යුගයක අවසානය බවට ඇතැම් බ්‍රිතාන්‍ය පුවත් පත් වාර්තා කර තිබිණී.
වයස්ගත වීම හේතුවෙන් ඇති වන සංකූලතා මත රැජනට මේ වන විටත් රාජකාරීවල නිතර වීමට අපහසුතා ඇති බව ඇතැම් බ්‍රිතාන්‍ය මාධ්‍ය වාර්තාවල සඳහන් වී තිබූ නමුත් මේ ප්‍රවෘත්තිය සම්බන්ධයෙන් රජ පවුලේ කිසිවකු හෝ අදහස් දැක්වීමක් සිදු කර තිබුණේ නැත.
