පසුගිය බදාදා දහවල් කාලයේදී මුළු ලන්ඩනයම භීතියෙන් ඇළලී ගියේ මහමග නවතා තිබුණු අධිශීතකරණ ට්‍රක් රථයක තිබී මළසිරුරු 39ක් හමුවීමත් සමගිනි. ලන්ඩනයේ වෝටර්ග්ලේඩ් කර්මාන්තපුරය ආසන්නයේ මේ ට්‍රක් රථය නවතා තිබියදී මේ සිරුරු සොයාගෙන තිබේ. ට්‍රක් රථයේ ශීතකරණයේ ඇත්තේ මළ සිරුරු බව සොයාගැනීමෙන් පසුව ට්‍රක් රථය ආරක්ෂිත ස්ථානයකට රැගෙන ගොස් එම සිරුරු බැහැර කිරීමට ලන්ඩන් පොලීසිය කටයුතු කර තිබේ. ඒ සමගම ට්‍රක් රථයේ රියැදුරු අත්අඩංගුවට ගෙන තිබේ. ඔහු 25 හැවිරිදි අයිරිස් ජාතිකයකු වන මෝ රොබින්සන් ලෙස හඳුනාගෙන තිබේ.
මේ ට්‍රක් රථය බල්ගේරියාවේ සිට නෞකා මගින් බ්‍රිතාන්‍ය භූමියට පිවිස ඇති අතර එතැන් සිට තෙම්ස් නදිය පසුකරමින් ලන්ඩන් නගරයට ඇතුලු වී තිබේ. ට්‍රක් රථයේ වූ අධිශීතකරණයේ උෂ්ණත්වය ඍණ විසිපහක අගයක පැවතී තිබේ. ලන්ඩන් පොලීසිය දැනට සැක කරන්නේ එම ශීතල හේතුවෙන්ම එහි සිටි මිනිසුන් මිය යන්නට ඇති බවයි.
 |
| ට්‍රක් රථ රියැදුරු මෝ රොබින්සන් |
එම සිරුරු 39 අතරින් සිරුරු 38ක් වැඩිහිටි පුද්ගලයන්ගේ වූ අතර එක් සිරුරක් යෞවනයකුගේ වශයෙන් හඳුනාගෙන තිබේ. ට්‍රක් රථය බල්ගේරියාවේ ලියාපදිංචි කර ඇති ට්‍රක් රථයකි. එහි ගමනාන්තය අයර්ලන්තය විය හැකි බවටද අනුමාන පහළ වී තිබේ.
මේ පුද්ගලයන් මිය යෑමට හේතුව අපරාධ කල්ලියක ක්‍රියාවක් බවට අනුමාන වුවද වැඩි ඉඩක් පවතින්නේ මේ පුද්ගලයන් සංක්‍රමණිකයන් වීමටය. ලන්ඩන් පොලීසිය දැනට ප්‍රකාශ කර ඇත්තේ මේ මළ සිරුරු බාහිර පෙනුමින් බල්ගේරියානු ජාතිකයන් මෙන් නොවන බවයි. ඒ අනුව වැඩි ඉඩක් පවතින්නේ ඔවුන් සංකමණිකයන් වීමටය. පසුව සොයා ගනු ලැබුවේ මේ සිරුරු සියල්ල චීන ජාතිකයන්ගේ බවය.
මේ මළ සිරුරු හඳුනා ගැනීමට ලන්ඩන් පොලීසිය මහජනතාවගේ සහය අපේක්ෂා කර තිබේ.
මෙවැනි මළසිරුරු විශාල සංඛ්‍යාවක් ලන්ඩන් නගරයේ වීථියක පවතින බව දැනගත් ලන්ඩන් නගරවාසීහු මොහොතකට භීතියට පත්ව තිබේ. එයට හේතුව ඉතිහාසයේ මේ අන්දමින් සොයාගත් වැඩිම මළ සිරුරු සංඛ්‍යාව මෙය වන බැවිනි. මේ සිදුවීම සම්බන්ධව අදහස් දක්වමින් බ්‍රිතාන්‍ය අගමැති බොරිස් ජොන්සන් පවසා සිටියේ මෙය ‘අදහාගත නොහැකි, සිත් සසල කරවන සිදුවීමක්, බවයි.
කෙසේවුවද සංක්‍රමණිකයන්ගේ ගැටලුවලීන් දීර්ඝ කාලීනව පීඩා විඳින යුරෝපයට මෙවැනි මළ සිරුරු හමුවීම එතරම් දුර්ලභ අත්දැකීමක්ද නොවේ.
2014 සිට තොරතුරු එක්රැස් කිරීමෙන් පසු එක්සත් ජාතීන්ගේ සංවිධානය නිකුත් කර ඇති සංඛ්‍යා ලේඛනයකට අනුව මෙවැනි මළ සිරුරු හමුවීමේ අවස්ථා කිහිපයක් මෙසේය.
2014 - ඇෆ්ගන් ජාතික සංක්‍රමණිකයන් පිරිසක් සහිත කන්ටේනරයක් හමුවී ඇති අතර එතුළ සිටි පුද්ගලයන් හතර දෙනෙකු ගේ මළ සිරුරු හමුවී තිබේ. ජීවතුන් අතර සිටි පිරිස 34කි.
2015 - ස්ටෙෆර්ඩ්ශයර් ප්‍රාන්තයේ දී ලී පෙට්ටියක් තුළ තිබූ සංක්‍රමණිකයන් දෙදෙනකුගේ මළ සිරුරු හමුවූ අතර මේ ලී පෙට්ටිය ඉතාලියේ සිට ලන්ඩනය කරා එවා ඇතැයි හඳුනාගෙන තිබේ.
2016 - ඔක්ස්ෆඩ්ෂයර් අවසරයෙන් දේශසීමාව පසුකිරීම සඳහා ලොරියක යට පැත්තේ එල්ලී පැමිණි 18 හැවිරිදි සංක්‍රමණික තරුණයකු අනතුරට පත්ව තිබේ.
2016 - කෙන්ට් ප්‍රාන්තයේදී ප්‍රංශයේ සිට පැමිණි ලොරියක තිබී සංක්‍රමණිකයකුගේ මළ සිරුරක් හමුවී තිබේ.
මේ වාර්තා මහා බ්‍රිතාන්‍යයට පමණක් සීමා වූ වාර්තා වන අතර යුරෝපයේ සෙසු රටවල් රාශියකින් මෙවැනි තොරතුරු විශාල සංඛ්‍යාවක් ලැබී තිබේ. ඇතැම් සිදුවිම් වාර්තා අතරට ඇතුළත් වී නොමැත. එ් අතරින් බොහෝ සිදුවීම් සටහන් වන්නේ මහා ඛේදවාචක ලෙසිනි. උදාහරණයක් ලෙස 2015 ඔස්ට්‍රියාවේ මහා මාර්ගයක් අද්දර අත්හැර ගොස් තිබූ ලොරියක පුද්ගල සිරුරු 71ක් තිබී හමුවීම දැක්විය හැකිය. ශ්‍රී ලාංකිකයන් ද මෙවැනි අවිධිමත් එමෙන්ම නීති විරෝධී ක්‍රම මගින් බටහිර රටවලට ඇතුළු වීමට උත්සාහ දැරීමේදී කන්ටේනර් රථ අභ්‍යන්තරයේ හුස්ම හිරවීමෙන් මරණයට පත්වූ අවස්ථා මීට දශක කිහිපයකට පෙර වාර්තා විය.
මේ හැර වාර්ශිකව ඇල්බේනියාවේ සිට කුඩා බෝට්ටු මගින් ඉතාලියට ඇතුළු වීමට උත්සාහ දරණ ආසියානු සහ අප්‍රිකානු ජනතාව අති විශාලය. එම බෝට්ටු මුහුද මැදදී හෝ සූවස් ඇලේදී අනතුරට පත්වීම සාමාන්‍ය සිදුවීමක් බවට පත්ව ඇති අතර ඒ හේතුවෙන් ජීවිත අහිමි වන්නේ සිය දහස් ගණනිනි.
මෙවර ලන්ඩන් නගරය මැද හුදකලා වූ මේ සිරුරු හිමි පුද්ගලයන්ගේ කතාවද ඒ හා සමාන වීමට ඇති ඉඩකඩ විශාලය. ලන්ඩන් පොලිසියේ අනාගත වාර්තා ඒ සම්බන්ධ නිවැරදි තොරතුරු ඉදිරිපත් කරනු ඇත. එතෙක් පැවසිය යුත්තේ ‘උපන් බිමට වැඩිය තැනක් කොහිද තිබෙන්නේ‘ කියාය.
