මේ පොළොව මත සොබාදහම සහ මිනිසා දැඩි තරගයක නිරත වන භූමි භාගයක් වේ නම් ඒ ජපානයයි. ජපානයේ මිනිසා ස්වකීය අති දියුණු තාක්ෂණය යොදා ගනිමින් සොබාදහම හා තරග කරන අතර වරින් වර සොබාදහමද තම උපරිමය යොදවා මිනිසා පරාජයට පත් කර පෙන්වයි. මේ තරගයෙන් දිනන කිසිවකු නැති වුවද වරින් වර සොබාදහමේ පහරට මුහුණ දෙන ජපන් ජනතාව දණින් වැටුණද ක්ෂණිකව යළි නැගිට පෙර සිටියාටත් වඩා විධිමත්ව සොබාදහමට මුහුණ දීමට සැරසේ.
මේ සඳහා තවත් හොඳ උදාහරණ සපයමින් මහා සුළිකුණාටුවක් පසුගිය සෙනසුරාදා ඊසාන සහ නැගෙනහිර ජපානයට කඩා වැදුණි. හගිබිස් නම්වූ මේ සුළි කුණාටුව මේ වන විට ගණන් බලා ඇති අන්දමට දැනට ජපානය මුහුණ දී ඇති දරුණුතම ස්වභාවික ව්‍යසන අතරින් සය වැනි ස්ථානය දිනා ගැනීමට තරම් ප්‍රභල වී තිබේ. ජපානයේ ප්‍රධානතම දූපත වන හොන්ෂු හි භූමි ප්‍රමාණයෙන් සැලකිය යුතු ප්‍රමාණයක් මහා වර්ෂාව සමග උතුරා ගිය ගංගා හේතුවෙන් පිරී ගිය අතර දින කිහිපයක් පුරාම බැස නොගිය මේ ජලකඳ හේතුවෙන් ද අමතර ගැටලුවලට මුහුණ දීමට සිදුවී තිබේ. ගංගා 200ක් පමණ උතුරා ගිය අතර ඒ අතරින් අරකාවා, බුකුමා සහ ටාමා ඇතුළු ප්‍රධාන ගංගා කිහිපයක පිටාර විනාශය වැඩි කිරීමට දායක වී තිබේ. 
දැනට ගණන් බලා ඇති අන්දමට නිවාස 33000ක් ගංවතුර හේතුවෙන් විනාශයට පත් වී ඇති අතර ඒ අතරින් නිවාස 2000ක් සම්පූර්ණයෙන්ම විනාශයට පත් වී තිබේ. ජීවිත හානිද 80කට වැඩි සංඛ්‍යාවක් වාර්තා වන අතර දැනට පුද්ගලයන් කිහිපදෙනක්ද අතුරුදන්ය. පෙර කරන ලද අනතුරු ඇඟවීම් නොසලකා හැරීම ජීවිත හානි වැඩිවීමට හේතුව ලෙස ප්‍රකාශ වී තිබේ. සුළි කුණාටුවට ඍජුවම විවෘත වන ප්‍රදේශවල වෙසෙන ජනතාව මිලියනයකට පමණ ආරක්ෂිත ස්ථාන කරා යන ලෙසට දැනුම් දුන්නද ඒ 
නිවේදන අනුව යමින් ආරක්ෂිත ස්ථාන කරා ගොස් ඇත්තේ 50000ක් පමණක් බවද වාර්තා වී තිබේ.
කෙසේවුවද වර්ෂාව ආරම්භ වූ දින සිට ලක්ෂයක පමණ පිරිසකගෙන් යුත් මුදාගැනීමේ කණ්ඩායම් මහවැසි මධ්‍යයේ සේවයේ යෙදී තිබේ. එසේ වුවද හගිබිස් ජපානයට සිදු කළ හානිය අවම කිරීමට එය ප්‍රමාණවත් වී නැත.
දේපළ හානි ඉතා විශාල වශයෙන් වාර්තා වන අතර නගානෝ හි ශින්කන්සෙන් දුම්රිය රැඳවුම්පොළේ නවත්වා තිබූ විදුලි දුම්රිය කිහිපයක්ද සම්පූර්ණයෙන් හානියට පත්ව තිබේ. ගංගා හරහා ඉදිකර තිබූ පාලම් රාශියක්ද විනාශ වී ඇත.
සේ සියලු ව්‍යසනයන්ට මුහුණ දීමෙන් පසුව මේ වන විට ආශ්චර්යමත් ජපානය පෙර පරිදිම අදහා ගත නොහැකි වේගයකින් යළි නැගිටිමින් සිටී. යළිත් සොබාහදම පරයමින් මිනිසා ජයගන්නා මොහොත ජපානය තුළ ක්‍රියාත්මක වෙමින් තිබේ. ගංවතුර බැස යෑමෙන් පසු ප්‍රථමයෙන්ම ඔවුන් අවධානය යොමු කර සිටියේ ප්‍රවාහන පද්ධතිය යළි සකස් කර ගැනීම කෙරෙහිය. මහාමාර්ග ගලා ගිය ජලධාරාවන්ගෙන් නිදහස් වූ පසු ඒ සමග ඇදී ආ මඩ ධාරාවන්ගෙන් පිරිසිදු කර ගැනීම ඔවුන්ට සරල ක්‍රියාවක් විය. බිඳි විනාශ වූ නිවාසවල අබලි ද්‍රව්‍යයන්ගෙන් මහාමාර්ග පිරී පැවති බැවින් ඔවුන්ට ආරම්භක පියවර ලෙස මේ අබලි ද්‍රව්‍ය කළමනාකරණය කර ගැනීමට සිදුවිය. 
එහිදී සැමදා පිළිවෙල අගය කරන ජපන් ජනතාව මහාමාර්ගවල තිබූ අබලි ද්‍රව්‍ය වර්ගීකරණය කරමින් එම ද්‍රව්‍ය අදාළ තැන්වලට ඉවත් කිරීමේ කටයුතුවල නිරත වූහ. මහාමාර්ග පිරිසිදු කිරීම ආරම්භ කරන ලද්දේ ඉන්පසුවය. මේ අන්දමින් මහාමාර්ග පිරිසිදු කර යළි ගමනාගමනය පිණිස සකස් කරනු ලැබූවද ගංගා හරහා ඉදිකර තිබූ පාලම් රාශියක්ම යළි ඉදිකිරීමට ජපන් ජාතිකයන්ට සිදුවිය.
එම ඇතැම් පාලම් ඉදිකිරීමට ඔවුන්ට පැය විසිහතරකට වඩා ගත නොවීම විශ්මයට කරුණක් විය. ඔවුන්ගේ තාක්ෂණය ඒ සා විශාල විය. එමෙන්ම බිඳී සේදී ගිය මාර්ග ප්‍රතිසංස්කරණයේදී පෙර පැවති දෝෂ හඳුනාගනිමින් ඒවාට විකල්පද යොදමින්, එහිදී සොබාදහමට හානි නොවන සේ පරිසරයද ආරක්ෂා කර ගනිමින් ඉදිකිරීම් සිදුකිරීමට මේ මහා ව්‍යසනයක් අතර වුවත් ජපන් ජනතාවට හැකිව තිබිණි. 
ආපදා අවස්ථාවේදී ජනතාව අතරට ගිය ජපන් අගමැති ශින්සෝ අබෙ ඔවුන් සනසමින් ඔවුන්ට ඉක්මන් පහසුකම් ලබා දීමට කටයුතු යෙදුවේය. අතිරේක අයවැයක් ප්‍රකාශ කරමින් ඩොලර් මිලියන 6.5ක් විපතට පත් ජනතාව වෙනු
වෙන් වෙන් කොට හගිබිස් ඇති කළ ව්‍යසනයේ මතක මුළුමනින්ම අතුගා දැමීමට කටයුතු කිරීමට ජපාන අගමැතිවරයා වගබලා ගත්තේය. සැබවින්ම ජපානය දැනට ප්‍රායෝගිකව ඔප්පු කර ඇති අන්දමට තවත් දින කිහිපයක් ඉක්ම යන විට සුළිකුණාටුවක ස්වභාවික විපතකට මුහුණ දුන් ලකුණු සියල්ල ජපාන භූමියෙන් තුරන් කර දැමීමට ඔවුන් කටයුතු කරණු නිසැකය.
දරුණු ප්‍රතිවාදීන් සමඟ නිතර ගැටෙන විට එයට මුහුණ දෙන්නාද ඉබේම ප්‍රතිවාදියා තරම්ම ශක්තිමත් වේ. ඒ එසේ නොවන්නේ නම් විනාශ වී යන බැවිනි. එබැවින්ම ජපන් පොළොව මත දී ස්වභාවදහමද මිනිසාද එකසේ දක්ෂය. එකෙක්ට එකෙක් නොදෙවෙනිය.
එබැවින්ම කුමන ව්‍යසන පැමිණියද ජපානය නොසැලෙන්නේය. එමෙන්ම ජපානයට වරින් වර තලා පෙලා පොඩිකර දැමීමට ස්වභාව ධර්මයාද අමතක කරන්නේ නැත. මෙහිලා අප ඒ සඳහා දකුණු ආසියාව හැර ජපානයම තෝරා ගැනීම සම්බන්ධව ස්වභාව දහමට පින් දිය යුතුය.
