ප්‍රජාතන්ත්‍රවාදී පාලන ක්‍රමයක් සහිත රටවල ජනතාව ප්‍රජාතන්ත්‍රවාදයට පටහැනි ක්‍රම යොදමින් පාලනය කරන්නට වෙර දරන්නේ නම් එම පාලකයන්ගේ ඉදිරිය අපැහැදිලි බවට ලෝක ඉතිහාසය පුරා උදාහරණ ඕනෑතරම්ය. මේ ‘ප්‍රජාතන්ත්‍රවාදයට පටහැනි‘ යන්නට ඇතුළත් වන ක්‍රම සංඛ්‍යාවෙන් අසීමාන්තිකය. එහෙත් පැහැදිලිවම ඥාති සංග්‍රහය අයත් වන්නේ ඒ අතරට බව කිවහැකිය. ඒ මන්දයත් ඥාති සංග්‍රහය ස්වකීය පාලනය අතරට ගෙන ආ පාලකයන් බොහෝ දෙනෙකුට දේශපාලන වේදිකාවලින් බැස යෑමට සිදුවූ බැවිනි. තමන් ඥාති සංග්‍රයන්හි නිතර වූ බව මහජනතාවට හෙළි වූ පසු ප්‍රජාතන්ත්‍රවාදී දේශපාලන පොරපිටියකට බැස තවදුරටත් සටන් කිරීමේ හැකියාව මේ දේශපාලනඥයන්ට අහිමි වූ අතර ජනතා අප්‍රසාදය ඒ වෙනුවට ඔවුන් වෙත එල්ල විය.
පසුගියදා මේ සඳහා හොඳම උදාහරණයක් අමෙරිකාවෙන් වාර්තා විය. ඔබාමාගේ උප ජනාධිපති ධූරය හෙබවූ ජෝ බයිඩන් සහ උටාහි සෙනෙට් සභික මිට් රොම්නිගේ ලේලිය වන රොනා මැක්ඩැනියෙල් මේ ඥාති සංග්‍රහ කතාබහට මැදි වූ ප්‍රධාන චරිත විය. හිටපු උප ජනාධිපති ජෝ බයිඩන්ගේ පුත්‍රයකු වන හන්ටර්ට යුක්රේන බලශක්ති සමාගමේ විධායක ධූරයක් ලැබීමට නියමිත බවත් ඒ සඳහා ඔහුට විශාල වැටුපක්ද හිමිවීමට නියමිත බවත් ABC පුවත් සේවය ප්‍රකාශ කළ ප්‍රවෘත්තියක සඳහන් විය. මේ ප්‍රවෘත්තිය ඇසූ පසු මිට් රොම්නිගේ ලේලිය වන රොනා වහාම ට්වීටර් පණිවිඩයක් නිකුත් කරමින් මෙවන් තනතුරක් දැරීම සඳහා ජෝ බයිඩන්ගේ පුත්‍රයා සතුවන සුදුසුකම් මොනවාදැයි ප්‍රශ්න කර සිටියාය. වෙනත් කිසිම සුදුසුකමක් නොමැති හන්ටර් වැනි තරුණයකු මේ ධූරය සඳහා පත්වීම් ලැබීම ඥාති සංග්‍රහය මිස අන් කුමක්දැයි රොනා තම ට්වීටර් පණිවිඩය මගින් ප්‍රශ්න කර සිටියාය.
බැලූ බැල්මට මෙය ප්‍රබල දේශපාලන විවේචනයක් වුවද රොනාට ට්වීටර් පණිවිඩය නිකුත් කිරීමෙන් සුළු වේලාවක සිට මුහුණ දෙන්නට සිදුවූයේ නොසිතූ ප්‍රතිචාරවලටය. දසතින් ජනතාව ඇයගේ පණිවිඩයට ප්‍රතිචාර එල්ල කරමින් ඇයගේ ප්‍රකාශය විවේචනයට හා හාස්‍යයට ලක් කරන්නට වූහ. 
එහිදී ඔවුන් විමසා සිටින්නට වූයේ ජෝ බයිඩන්ගේ පුත්‍රයාගේ වෘත්තිමය පත්වීම ප්‍රශ්න කරන රොනා සිටින ස්ථානය කුමක්ද යන්නයි. රොනා දැනට රිපබ්ලිකන් පක්ෂයේ ජාතික කමිටුවේ සභාපති ධූරය හොබවන්නීය. එහෙත් ඊට පෙර ඇය ඌටා ප්‍රාන්තයේ සෙනෙට් සභික මිට් රොම්නිගේ ලේලිය බවද සඳහන් කළ යුතුය. මේ ඥාති සම්බන්ධය උපුටා දැක්වූ සාමාන්‍ය ජනතාව ‘බයිඩන්ගේ පුත්‍රයා ප්‍රශ්න කිරීමට පෙර තමන් සිටින ස්ථානය ප්‍රශ්න කරන‘ ලෙස ඇයට ප්‍රකාශ කළහ.
දිගින් දිගටම ඇයගේ ප්‍රකාශය හාස්‍යයට ලක් කෙරෙන ට්විටර් ප්‍රතිචාර පිරී යන්නට වූ අතර රොනා මැක්ඩැනියෙල්ට නිහඩවම පසුවීමට සිදුවිය. මේ අතර මිට් රොම්නිට අමතරව රොනාට ඇති තවත් දේශපාලන ඥාති සබඳකම් ට්වීටර් මගින් හෙළිදරවු වන්නට විය. එක් අයෙකු අපකීර්තියට ලක් කිරීමේ අරමුණින් චෝදනා නැගීමට පැමිණි රොනාට අවසානයේ සිදු වූයේ තම දේශපාලන අනාගතය පවා අවිනිශ්චිත වන මට්ටමේ ප්‍රතිචාරයන්ට මුහුණ පෑමටය.
අමෙරිකාව යනු පියාගෙන් පුතාට ජනාධිපති ධූරය හිමිවුණු රටකි. ජෝර්ජ් බුෂ් සහ ජෝර්ජ් එච්.ඩබ්. බුෂ් එයට උදාහරණය. ඒ රිපබ්ලිකන් පක්ෂයෙනි. මීට අමතරව ඩිමොක්‍රටික් පක්ෂයෙන් බිල් ක්ලින්ටන්ගේ බිරිය හිලරි ක්ලින්ටන් ජනාධිපති අසුන ආසන්නයටම පැමිණි අතර තියුණු තරඟයකින් පසුව වත්මන් ජනාධිපති ඩොනල්ඩ් ට්‍රම්ප් හමුවේ පරාජය බාර ගත්තාය. එසේ නොවිනි නම් සැමියාගෙන් බිරියටද ජනාධිපති අසුන හිමි වූ රටක් බවට අමෙරිකාව පත් වන්නට බෙහෙවින් ඉඩ තිබිණි.
එය එසේ වුවද දේශපාලන නායකත්වයේ සිටින ප්‍රබලයන්ගේ ආනුභාවයෙන් ඔහුගේ ඥාතීන්ට වරප්‍රසාද අමෙරිකාවේදී නම් හිමිවන්නේ නැත. රොනා මැක්ඩැනියෙල් ජෝ බයිඩන් හිටපු ජනාධිපතිවරයාගේ පුත්‍රයාට එරෙහිව එල්ල කළ චෝදනාව කොතරම් සාධාරණ වුවද ඇයද එම ක්‍රමය තුළම පවතින බව අමතක කළ බැවින් ජනතාවගේ හාස්‍යයට ගොදුරු වූවාය.
